កណ្តាល ៖ លោកវរសេនីយ៍ឯក សេង សុជាតិ អធិការនគរបាលស្រុកស្អាងថា កាលពីថ្ងៃ សុក្រ ០១កើត ខែចេត្រ ឆ្នាំច សំរិទ្ធស័ក ព.ស ២៥៦២ ត្រូវនឹងថ្ងៃទី ០៥ ខែ មេសា ឆ្នាំ២០១៩ វេលាម៉ោង ១៧និង០០នាទី កម្លាំងប្រឆាំងបទល្មើសគ្រឿងញៀនសហការជាមួយប៉ុស្តិ៍រដ្ឋបាលរកាខ្ពស់ធ្វើការចាប់បង្ក្រាបករណីជួញដូរនូវសារធាតុញៀនដោយខុសច្បាប់នៅចំណុច ភូមិ ព្រែកឡុង ឃុំរកាខ្ពស់ ស្រុកស្អាង ខេត្តកណ្តាល ឃាត់ខ្លួនជនសង្ស័យ២នាក់ ដកហូតវត្ថុតាងថ្នាំញៀន៨កញ្ចប់។
ជនសង្ស័យ ឃាត់ខ្លួន១ / ឈ្មោះ ឆេង ឆៃ ភេទប្រុស អាយុ៣២ឆ្នាំ ជនជាតិ ខ្មែរ មុខរបរ មិនពិតប្រាកដ។ ២ / ឈ្មោះ ណុប សោភ័ណ្ឌ ហៅ ម៉ន ភេទប្រុស អាយុ ១៧ឆ្នាំ ជនជាតិ ខ្មែរ មុខរបរ មិនពិតប្រាកដ។
អ្នកទាំងពីរនាក់មានទីលំនៅបច្ចុប្បន្នភូមិ ព្រែកឡុង ឃុំរកាខ្ពស់ ស្រុកស្អាង ខេត្តកណ្តាល។វត្ថុតាងចាប់យករួមមានម្សៅក្រាមពណ៌សថ្លាសង្ស័យថា ជាសារធាតុញៀន(ម៉ាទឹកកក) ចំនួន ០៨កញ្ចប់តូច។
លោកអធិការបញ្ជាក់ថា ក្រោយទទួលបានព័ត៌មានពីប្រជាពលរដ្ឋល្អថា មានករណីជួញដូរគ្រឿងញៀន នៅចំណុចកើតហេតុខាងលើ។ ភ្លាមនោះកម្លាំងផ្នែកប្រឆាំងបទល្មើសគ្រឿងញៀន សហការជាមួយ កម្លាំងប៉ុស្តិ៍នគរបាលរដ្ឋបាលរកាខ្ពស់ បានចុះដល់ចំណុចកើតហេតុ ធ្វើការត្រួតពិនិត្យឈ្មោះ ណុប សោភ័ណ្ឌ ហៅ ម៉ន បានរកឃើញម្សៅក្រាម ពណ៍សថ្លា សង្ស័យជាសារធាតុញៀន(ម៉ាទឹកកក)ចំនួន ០១កញ្ចប់តូច រួចឃាត់ខ្លួនជនសង្ស័យ រួមនឹងវត្ថុតាង ដើម្បីសាកសួរ។
នៅចំពោះមុខសមត្ថកិច្ចនគរបាល ឈ្មោះ ណុប សោភ័ណ្ឌ ហៅ ម៉ន បានសារភាពថា ឈ្មោះ ឆេង ឆៃ ភេទប្រុស អាយុ៣២ឆ្នាំ ប្រើខ្លួនឲ្យយកគ្រឿងញៀន(ម៉ាទឹកកក)ចំនួន ០២កញ្ចប់តូច តម្លៃ ៥០,០០០៛ ដើម្បីយកទៅលក់ឲ្យគេមិនស្គាល់ឈ្មោះអស់០១កញ្ចប់តូច នៅសល់០១កញ្ចប់តូច ក៏ត្រូវសមត្ថកិច្ចឃាត់ខ្លួន។
ដោយមានការចូលរួមពីលោកមេភូមិព្រែកឡុង សមត្ថកិច្ចនគរបាល បានបន្តទៅឃាត់ខ្លួនឈ្មោះ ឆេង ឆៃ រកឃើញម្សៅក្រាម ពណ៌សថ្លាសង្ស័យជាសារធាតុញៀន(ម៉ាទឹកកក)ចំនួន ០៧កញ្ចប់តូច នៅនឹងខ្លួន ដើម្បីសាកសួរ។
នៅចំពោះមុខសមត្ថកិច្ចនគរបាល ឈ្មោះ ឆេង ឆៃ បានសារភាពថា ខ្លួនបានទិញគ្រឿងញៀន(ម៉ាទឹកកក)ចំនួន ១០កញ្ចប់តូច តម្លៃ ២០០,០០០៛ ពីឈ្មោះ ចយ ភេទប្រុស អាយុ ៣៤ឆ្នាំ នៅចំណុចក្រោយរោងចក្រព្រែកឡុង ដើម្បីយកទៅលក់បន្ត ក្នុង០១កញ្ចប់តូច តម្លៃ ២៥,០០០៛។
ទន្ទឹមនឹងនោះ ឈ្មោះ ឆេង ឆៃ បានសារភាពទៀតថា ខ្លួនពិតជាបានប្រើឈ្មោះ ណុប សោភ័ណ្ឌ ហៅ ម៉ន ដើម្បីយកគ្រឿងញៀន(ម៉ាទឹកកក)ចំនួន ០២កញ្ចប់តូច ទៅលក់ឲ្យគេពិតប្រាកដមែន និង០១កញ្ចប់តូចទៀត ប្រើប្រាស់ជាមួយគ្នា។
បច្ចុប្បន្នជនសង្ស័យទាំងពីរនាក់ បានឃាត់ខ្លួននៅអធិការដ្ឋាននគរបាលស្រុកស្អាងដើម្បីបន្ដអនុវត្ដតាមនីតិវិធី៕
Source: Kampuchea Thmey Daily
0 Comments