ប្រទេស​ថៃ​ប្រមូល​ទឹក​ពិសិដ្ឋ​សម្រាប់​ពិធី​ឡើង​គ្រងរាជ្យ​របស់​ព្រះមហាក្សត្រ

ប្រទេស​ថៃ​បានចាប់ផ្តើម​ធ្វើ​ពិធី​សាសនា​នានា​កាលពី​ថ្ងៃ​សៅរ៍​សម្រាប់​ការ​សោយរាជ្យ​របស់​ព្រះមហាក្សត្រ Maha Vajiralongkorn នៅ​ខែ​ក្រោយនេះ​ដោយ​ក្រុមមន្ត្រី​បាន​ប្រមូល​ទឹកមន្ត​នៅក្នុង​ពិធីបុណ្យ​នានា​នៅ​ទូទាំងប្រទេស​សម្រាប់​ការប្រើប្រាស់​ក្នុង​ពិធី​បន្សុទ្ធ​។​

ពិធី​គ្រង​រាជសម្បត្តិ​ដ៏​ខ្ពង់ខ្ពស់​សម្រាប់​ព្រះមហាក្សត្រ Vajiralongkorn នឹង​ប្រព្រឹត្តទៅ​រយៈពេល​៣​ថ្ងៃ​ចាប់ពី​ថ្ងៃទី​៤​ដល់​ថ្ងៃទី​៦​ខែឧសភា​ក្នុង​រាជធានី​បាងកក​ដោយមាន​ពិធីបុណ្យ​បែប​ព្រះពុទ្ធសាសនា​និង​ព្រហ្មញ្ញសាសនា​ជាច្រើន​ត្រូវបាន​ធ្វើឡើង​ក្នុង​រយៈពេល​មួយខែ​មុន​ព្រឹត្តិការណ៍​នេះ​ចូលមក​ដល់​។​

ព្រះអង្គ Vajiralongkorn ព្រះជន្ម​៦៦​វស្សា​បាន​ក្លាយជា​ព្រះមហាក្សត្រ​តាម​រដ្ឋធម្មនុញ្ញ​របស់​ប្រទេស​ថៃ​ក្រោយ​ការ​សោយ​ទិវង្គត​របស់​ព្រះបិតា Bhumibol Adulyadej ក្នុង​ឆ្នាំ​២០១៦​បន្ទាប់ពី​ការ​គ្រង​រាជ​រយៈពេល​៧០​ឆ្នាំ​។​

ការ​សោយរាជ្យ​របស់​ទ្រង់​ត្រូវបាន​ពន្យារពេល​រហូត​ដល់​ក្រោយ​ការ​កាន់ទុក្ខ​សម្រាប់​ព្រះបាទ Bhumibol ដែល​ត្រូវបាន​បូជា​នៅ​ខែតុលា​ឆ្នាំ​២០១៧​។ សម្រាប់​ប្រជាជន​ថៃ​ភាគច្រើន ពិធី​សោយរាជ្យ​អាចជា​ការ​ឃើញ​លើកដំបូង​នៅក្នុង​ជីវិត​របស់​ពួកគេ​។​

ទឹកមន្ត​ដែល​ប្រមូលបាន​នៅ​ថ្ងៃ​សៅរ៍​នឹងត្រូវ​ប្រើ​សម្រាប់​ពិធី​អភិសេកព្រះ​មហាក្សត្រ​នៅ​ថ្ងៃទី​៤​ខែឧសភា​មុន​ពិធី​ឡើង​គ្រងរាជ្យ​។​

ការប្រើប្រាស់​ទឹក​គឺ​ផ្អែកទៅលើ​ប្រពៃណី​ព្រាហ្មណ៍​ដែលមាន​តាំងពី​ពិធី​ឡើង​គ្រងរាជ្យ​សតវត្សរ៍​ទី​១៨​មកម្ល៉េះ​ចាប់តាំងពី​ការបង្កើត​រាជវង្ស​ចក្រី​មក​។​

ថ្ងៃ​សៅរ៍​គឺជា​ថ្ងៃ​ចក្រី​នៅក្នុង​ប្រទេស​ថៃ​ដែល​គេ​យល់​មើលថា​ជាការ​ចាប់ផ្តើម​នៃ​រាជវង្ស​នេះ​។​
​ស្ដេច Vajiralongkorn បានទទួល​ព្រះ​បរម​ងារ​ជា​ស្តេច​រាមា​ទី​១០​ឬ​ស្ដេច​ទី​១០​នៃ​រាជវង្ស​ចក្រី​។​

ទឹក​ត្រូវបាន​គេ​ប្រមូល​ក្នុងពេល​ដំណាលគ្នា​ចន្លោះ​ពី​ម៉ោង​១១:៥២​នាទី​ទៅដល់​ម៉ោង​១២:៣៨​នាទី​ថ្ងៃ​សៅរ៍​ដែល​ត្រូវបាន​គេ​ចាត់ទុកថា​ជា​ពេលវេលា​ពិសេស​នៅក្នុង​ហោរាសាស្ត្រ​ថៃ​។ ទឹក​នេះ​ត្រូវបាន​ប្រមូល​ដោយ​មន្ត្រីជាន់ខ្ពស់​មកពី​ប្រភពទឹក​ជាង​១០០​នៅ​ទូទាំង​ខេត្ត​ចំនួន​៧៦​របស់​ប្រទេស​ថៃ​៕ REUTERS

​

[caption id="attachment_1044761" align="alignnone" width="700"] ​[/caption]

Source: Kampuchea Thmey Daily