ភ្នំពេញ ៖ កញ្ញា ធី សុវណ្ណថា បច្ចុប្បន្នជាប្រធានយុវជនកិច្ចការសង្គមរបស់គណបក្សប្រជាជនកម្ពុជា និងមានប្រវត្តិជាអតីតសមាជិក និងជាឃោសនិកពិសេសរបស់គណបក្សសង្គ្រោះជាតិដ៏ល្បីឈ្មោះផងនោះ បានអះអាងថា ពីមុនមនុស្សដែលនាងស្អប់ គឺ សម្ដេចតេជោ ហ៊ុន សែន ហើយ នាងតែងតែវាយប្រហារ ប្រមាថធ្ងន់ៗគ្រប់រូបភាពទាំងអស់ តែទីបំផុត សម្ដេច គឺមនុស្សដែលបានជួយជីវិតរបស់នាងទៅវិញ។
កញ្ញា ធី សុវណ្ណថា រៀបរាប់បែបនេះ កាលពីល្ងាចថ្ងៃទី០៥ ខែមេសា ឆ្នាំ២០១៩ នៅលើបណ្តាញសង្គមហ្វេសប៊ុកផ្លូវការរបស់ខ្លួន។ កញ្ញាបានបញ្ជាក់យ៉ាងនេះថា “ឆ្នាំ២០១៣ អាយុ១៨ឆ្នាំ ខ្ញុំចូលប្រឡូកក្នុងនយោបាយ ដោយទទួលនយោបាយលាបពណ៌ពីបក្សប្រឆាំង ខ្ញុំចាត់ទុកសម្តេចតេជោ ហ៊ុន សែន ជាសត្រូវ ចាត់ទុក លោក សម រង្សី កឹម សុខា ជាវីរបុរស។ កាលនោះ ខ្ញុំមានឆន្ទៈ និងក្លាហានទាំងល្ងឹតល្ងង់ ប្រើរថយន្តផ្ទាល់ខ្លួន ចំណាយថវិកា កម្លាំងកាយ និងកម្លាំងចិត្ត ចូលរួមដឹកនាំហែបក្ស បាតុកម្ម ទាំងថ្ងៃយប់ ក្តៅរងាភ្លៀង ប្រឈមនឹងបញ្ហាបាតុកម្មហិង្សាជាច្រើន”។
កញ្ញា ធី សុវណ្ណថា លើកឡើងទៀតថា “ឆ្នាំ២០១៤ កញ្ញា កឹម មនោវិទ្យា កូនលោក កឹម សុខា ប្រើអំណាចឪពុក ព្យាយាមលាបពណ៌ រំខានសកម្មភាពរបស់ខ្ញុំ និងដាក់ចេញជាគោលនយោបាយប្រឆាំងខ្ញុំ។ ប្រាប់សប្បុរសជនក្នុង និងក្រៅប្រទេសមិនឲ្យផ្ញើប្រាក់មូលនិធិឲ្យខ្ញុំ ដែលកាលនោះ ខ្ញុំទទួលបានរាប់ម៉ឺនដុល្លារក្នុង១ខែៗ រយៈពេល២ឆ្នាំ ខ្ញុំទទួលប្រាក់មូលនិធិខ្ទង់៧០ម៉ឺនដុល្លារ។ ប្រាប់សារព័ត៌មាន និងសកម្មជនមិនឲ្យថតរូប និងផ្សព្វផ្សាយពីខ្ញុំ, បណ្ដេញ និងរារាំងខ្ញុំ ពីវេទិកាបក្ស ក្បួនហែបក្សផ្សេងៗ, ចេញលិខិតបក្សបញ្ចប់តួនាទីខ្ញុំពីអ្នកឃោសនិកពិសេស និងបណ្ដេញខ្ញុំចេញពីបក្ស។ ខ្ញុំអត់ធ្មត់២ឆ្នាំ ព្យាយាមតស៊ូមតិ រកខុសរកត្រូវ ទាមទារយុត្តិធម៌ពី លោក សម រង្សី និង កឹម សុខា និងថ្នាក់ដឹកនាំបក្សប្រឆាំង។ ជាលទ្ធផល លោកសម រង្សី កឹម សុខា មួរ សុខហួរ អេង ឆៃអ៊ាង ថ្នាក់ដឹកនាំជាច្រើន មិនហ៊ាននិយាយ ក៏ស្របតាមកូនលោក កឹម សុខា បណ្ដេញខ្ញុំចេញពីបក្សយ៉ាងអយុត្តិធម៌”។
ទោះជា ប្រឈមនឹងបញ្ហាផ្ទៃក្នុងយ៉ាងខ្លាំង កញ្ញា ធី សុវណ្ណថា អះអាងថា "ខ្ញុំនៅតែពង្រឹងឆន្ទៈខ្លួន ចូលរួមគ្រប់សកម្មភាព បក្សប្រឆាំងបាតុកម្មផ្សេងៗ។ សកម្មភាពបាតុកម្មហិង្សាជាច្រើន ដូចជា បាតុកម្មបិទផ្លូវជាតិលេខ៤ ជិតបន្ទាយ៩១១, បាតុកម្មហិង្សា ទីលានប្រជាធិបតេយ្យ, បាតុកម្មគប់ដបដុំថ្ម នៅស្ទឹងមានជ័យ, បាតុកម្មគប់ដបសាំង នៅផ្លូវវេស្រេង...តែងមានមនុស្ស១ក្រុម ប្រាប់ខ្ញុំ កៀងការពារសុវត្ថិភាពខ្ញុំ ចេញពីការផ្ទុះអំពើហិង្សា បើគ្មានក្រុមនោះទេ ពេលនេះ ធី សុវណ្ណថា នឹងក្លាយជារូបសំណាក។ រហូតដល់ឆ្នាំ២០១៧ ទើបខ្ញុំដឹងក្រុមដែលតែងកៀងការពារជីវិតខ្ញុំ ពីអំពើហិង្សាបាតុកម្មផ្សេងៗ គឺជាអាជ្ញាធរសំងាត់ ដែល សម្ដេចតេជោ បញ្ជាឲ្យការពារជីវិតខ្ញុំ។ ពូមីង បងប្អូន សាកគិតពីអារម្មណ៍បែបនេះ អ្នកដែលខ្ញុំគោរពស្រលាញ់ជាវីរបុរសជាតិ។ សម រង្សី កឹម សុខា បែរជាមនុស្សគ្មានហេតុផល មិនស្គាល់ល្អអាក្រក់ ខុសត្រូវ ផ្តល់អយុត្តិធម៌ឲ្យខ្ញុំ បណ្ដោយឲ្យកូនចេញលិខិតបក្សដកតួនាទីខ្ញុំ។ បណ្ដេញខ្ញុំចេញពីបក្សយ៉ាងអាម៉ាស់។ ពេលនោះ អ្នកដែលខ្ញុំស្អប់ គឺសម្ដេចតេជោ ហ៊ុន សែន ខ្ញុំតែងគិតថា ជាមនុស្សអាក្រក់ សាហាវឃោរឃៅ ហើយខ្ញុំតែងតែវាយប្រហារ ប្រមាថសម្តេចធ្ងន់ៗ គ្រប់រូបភាព...សម្តេចបែរជាមនុស្ស ដែលជួយសង្គ្រោះជីវិតខ្ញុំ និងជួយតាមការពារខ្ញុំ”។
ធី សុវណ្ណថា រៀបរាប់ទៀតថា ក្រោយមក សម្តេច បានផ្តល់កម្លាំងចិត្តលើកសរសើរខ្ញុំក្នុងវេទិកាបរិស្ថានពីការដឹកនាំសកម្មភាពទេសចរណ៍ ធ្វើឲ្យខ្ញុំកាន់តែមានភាពកក់ក្តៅ និងការងារសង្គមរបស់ខ្ញុំ កាន់តែរឹងមាំ។ ខ្ញុំក៏សម្រេចចិត្តដ៏ច្បាស់លាស់ រឹងមាំដាក់លិខិតសុំខមាទោសពី សម្ដេចតេជោ សម្តេចបានផ្តល់ការអនុគ្រោះ យោគយល់ មិនប្រកាន់ទោសកំហុសរបស់ខ្ញុំ និងបានផ្តល់ឱកាសឲ្យខ្ញុំ កសាងគុណសម្បត្តិ ក្លាយជាមន្ត្រីដឹកនាំនយោបាយ នៅមូលដ្ឋាននៅឃុំត្រើយស្លា ស្រុកស្អាង។ ខ្ញុំចូល CPP មានក្រុមប្រឆាំងរាប់ម៉ឺន សែននាក់ ជេរប្រមាថខ្ញុំយ៉ាងខ្លាំង តែខ្ញុំអាចទ្រាំបាន ព្រោះខ្ញុំមិនអាចក្បត់សេចក្តីពិត មិនអាចក្បត់អំពើល្អ ក្តីមេត្តាករុណារបស់សម្តេចតេជោ បានទេ។ ទោះជាសម្តេចតេជោ បានអធ្យាស្រ័យលើកលែងទោសឲ្យខ្ញុំ មិនប្រកាន់ខ្ញុំ តែខ្ញុំនៅតែឈឺចាប់ ខ្មាសអៀន និងមានវិប្បដិសារីយ៉ាងខ្លាំង ចំពោះទង្វើរបស់ខ្លួនឯង នេះហើយជាមូលហេតុ ដែលខ្ញុំមិនអាចទប់ទឹកភ្នែកបានរាល់ពេលខ្ញុំមើលមុខសម្ដេចតេជោ។
តាមកញ្ញា ធី សុវណ្ណថា នេះជារឿងពិត នៃខ្សែជីវិតដ៏កម្សត់របស់នាង ដែលគ្រប់ថ្នាក់ដឹកនាំ និងមហាជនទូទៅបានដឹង “បើពូមីង បងប្អូនគឺជាខ្ញុំ តើបងប្អូនធ្វើយ៉ាងណា?។ កម្ពុជា ក្រោមការដឹកនាំរបស់សម្តេច ហ៊ុនសែន សម្បូរសប្បាយ អភិវឌ្ឍន៍ រីកចម្រើនជាខ្លាំង ទោះជាកើតមានចំណុចអសកម្មខ្លះ របស់មន្ត្រីខិលខូច សម្ដេចបានវះកាត់ កែទម្រង់ជាតិកាន់តែល្អ ជីវភាពប្រជាជនកាន់តែប្រសើរ។ ខ្ញុំជាប់ជំពាក់គុណសម្ដេចតេជោ ហ៊ុន សែន គឺគុណសង្គ្រោះជីវិត ដែលគ្មានអ្វីតបសង់បានទេ។ នាងខ្ញុំ ធី សុវណ្ណថា សូមស្បថចំពោះវត្ថុស័ក្ដិសិទ្ធិ និងមហាជនក្នុង Facebook ដោយស្មោះស្ម័គ្រ ចូលរួមជាមួយអ្នកគាំទ្រ CPP ចូលរួមជាមួយកងទ័ព និង ប៉ូលិស ហ៊ានពលីជីវិតការពារសន្តិភាព ការពារសម្ដេចតេជោ ហ៊ុន សែន និងក្រុមគ្រួសារជារាងរហូត”។
សូមបញ្ជាក់ថា កញ្ញា ធី សុវណ្ណថា អតីតសមាជិក និងជាឃោសនិកពិសេស ព្រមទាំងជាអ្នកគាំទ្រគណបក្សសង្គ្រោះជាតិដ៏ល្បីឈ្មោះ បានស្នើសុំចូលជាសមាជិកគណបក្សប្រជាជនកម្ពុជា កាលពីថ្ងៃទី៣១ ខែឧសភា ឆ្នាំ២០១៧ ហើយបានក្លាយជាសមាជិកគណបក្សប្រជាជនកម្ពុជាផ្លូវការ នៅថ្ងៃទី២៦ ខែកក្កដា ឆ្នាំ២០១៧។ នាងត្រូវបាន សម្ដេចអគ្គមហាសេនាបតីតេជោ ហ៊ុន សែន ប្រធានគណបក្ស សម្រេចតែងតាំងជាអនុប្រធានទី១ នៃគណៈពង្រឹងមូលដ្ឋានឃុំត្រើយស្លា តាមតាមសេចក្តីសម្រេចចុះថ្ងៃទី០៩ ខែមីនា ឆ្នាំ២០១៨ ស្ដីពីការកែសម្រួល និងតែងតាំងមន្ត្រីគណៈពង្រឹងមូលដ្ឋានឃុំ និងភូមិ នៃឃុំត្រើយស្លា ស្រុកស្អាង ខេត្តកណ្ដាល៕
Source: Kampuchea Thmey Daily
0 Comments