រថយន្តបាឡែន បើករំលោភចំណែកផ្លូវ បុករថយន្តហ្វ៊ុយហ្ស៊ូមួយទំហឹង ខូចខាតធ្ងន់ធ្ងរ

Cambodia News April 08, 2019

កំពង់ឆ្នាំង ៖ បុរសអ្នកបើកបររថយន្តម្នាក់ មានសំណាងណាស់ គ្រាន់តែរងរបួសស្រាល ខណៈដែលរថយន្តរបស់គាត់បានរេចង្កូតបុករថយន្តហ៊្វុយសូ ក្នុងទិសដៅបញ្ច្រាសគ្នាយ៉ាងពេញទំហឹង បណ្តាលឲ្យរថយន្តគាត់ខូចខាតយ៉ាងដំណំ តែពិតជាសំណាងល្អ គ្រាន់តែរងរបួសស្រាល។

ករណីគ្រោះថ្នាក់ចរាចរណ៍នេះបានកើតឡើងនៅតាមផ្លូវជាតិលេខ៥ ចំណុចភូមិក្បាលថ្នល់ ឃុំសែប ស្រុកកំពង់ត្រឡាច ខេត្តកំពង់ឆ្នាំង។

សមត្ថកិច្ចនគរបាលមូលដ្ឋាននៅកន្លែងកើតហេតុបានឲ្យដឹងថា រថយន្តបាឡែនជាអ្នកបង្កគ្រោះថ្នាក់នេះពាក់ស្លាកលេខ ភ្នំពេញ2AE2137 ចំណែករថយន្តរងគ្រោះម៉ាកFUSO ពាក់ស្លាក លេខភ្នំពេញ3C5705 ដែលករណីនេះ រថយន្តបាឡែនបានបើករំលោភចំណែកផ្លូវខាងស្តាំរបស់គេ ទៅបុករថយន្តហ្វ៊ុយហ្ស៊ូ ក្នុងទិសដៅច្រាស់គ្នា។

ក្រោយពេលកើតហេតុ ម្ចាស់រថយន្តទាំង២កំពុងតែសម្របសម្រួលគ្នា ដោយម្ចាស់រថយន្តជាអ្នកបង្កបានទទួលស្គាល់ថា ខ្លួនគាត់ពិតជាបានបើកបររេចង្កូតចូលទៅចំណែកផ្លូវខាងស្តាំរបស់រថយន្តFUSO ដែលធ្វើដំណើរបញ្ច្រាសទិសគ្នាពិតមែន ដោយគាត់សុខចិត្តចេញសងថ្លៃខូចខាតដល់ម្ចាស់ភាគីរថយន្តFUSO ពេញតម្លៃ ដើម្បីបញ្ចប់រឿង។ ប៉ុន្តែសមត្ថកិច្ចមិនបានប្រាប់ពីអត្តសញ្ញាណអ្នកបើកបររថយន្តទាំង២គ្រឿងនេះឡើយ ដោយបានប្រាប់ថា គេត្រូវរ៉ូវគ្នា ហើយមិនបាច់ផ្សាយឈ្មោះពួកគេទេ។

ទាក់ទងនឹងព័ត៌មានខាងលើនេះ លោក ឈឹម សារ៉ុន នាយការិយាល័យចរាចរណ៍ផ្លូវគោកនៃស្នងការនគរបាលខេត្តកំពង់ឆ្នាំងបានបញ្ជាក់នៅរសៀលថ្ងៃទី៧ ខែមេសា ឆ្នាំ២០១៩ ថា នៅក្នុងករណីនេះមិនមានអ្នករងបួសធ្ងន់ធ្ងរទេ ថ្វីត្បិតតែរថយន្តខូចខាតធ្ងន់ធ្ងរក៏ពិតមែន គឺម្ចាស់រថយន្តទាំងពីរកំពុងសម្របសម្រួលចរចាត្រូវរ៉ូវគ្នាហើយ ដើម្បីបញ្ចប់រឿង៕