ក្លិបបឹងកេត សមាជិករបស់លីគកំពូលកម្ពុជា បានប្រកាសថា ក្រុមរបស់ខ្លួនត្រៀមចេញទៅប្រកួតមិត្តភាពអន្តរជាតិនៅប្រទេសថៃ ជាមួយក្រុមតារាចំរុះថៃ នៅថ្ងៃអង្គារ ទី៩ ខែមេសា ឆ្នាំ២០១៩ខាងមុខនេះ ក្នុងគោលដៅប្រកួតមិត្តភាពសប្បុរសធម៌ លើទីលានកីឡដ្ឋាន Pathum Thani របស់ក្លិបកងទ័ពអាកាសថៃ Air Force United។
យោងតាមវិបសាយផ្លូវការរបស់ក្លិបបឹងកេតអែហ្វស៊ី បានបញ្ជាក់ថា «បន្ទាប់ពីពួកយើងប្រកួតចប់សប្តាហ៍ទី៣ ទល់នឹងអង្គរថាយហ្គឺរ នៅថ្ងៃអាទិត្យសប្តាហ៍នេះ កីឡាករ និងថ្នាក់ដឹកនាំរបស់ក្លិបបឹងកេត មួយចំនួន នឹងត្រូវចូលរួមជាមួយតារាសម្តែង តារាចម្រៀងរបស់កម្ពុជា ជាច្រើនរូបទៀត បង្ហាញវត្តមានក្នុងការប្រកួតនេះ ដែលកម្មវិធីនឹងចាប់ផ្តើមពីម៉ោង ៤រសៀល ដល់ម៉ោង ៩យប់ ដោយមានការសម្តែងជាច្រើនថែមទៀតផង»។
ប្រភពបានបន្តថា តាមក្រោយចប់គម្រោងនៃកម្មវិធីសប្បុរសធម៌នេះ ក្លិបបឹងកេត និងភាគីខាងថៃ មានគម្រោងមកធ្វើការប្រកួតមិត្តភាពសប្បុរសធម៌លើកទីពីរ នៅរាជធានីភ្នំពេញនាថ្ងៃអនាគត ដើម្បីចូលរួមរ៉ៃអង្គាសប្រាក់ជួយដល់មន្ទីរពេទ្យ និងកុមារកំព្រារបស់កម្ពុជា ផងដែរ។ ក្រុមបឹងកេត ត្រូវប្រកួតជាមួយក្រុមអង្គរថាយហ្គឺរ នៅសប្តាហ៍ទី២នៃពានរង្វាន់លីគកំពូលកម្ពុជា នៅចុងសប្ដាហ៍នេះពោលគឺនៅវេលាម៉ោង៣និង៣០នាទីរសៀលថ្ងៃអាទិត្យ ទី៧ ខែមេសា ឆ្នាំ២០១៩ លើទីលានកីឡដ្ឋានខេត្តសៀមរាប ព្រមទាំងមានផ្សាយផ្ទាល់តាមហ្វេសប៊ុករបស់ CNCC ផងដែរ។
សូមរំលឹកថា ក្រុមបឹងកេត ធ្លាប់ឈ្នះពានរង្វាន់លីគកំពូលកម្ពុជា ចំនួន៣លើកផងដែរ ខណៈនៅរដូវកាលឆ្នាំ២០១៨ ថ្មីៗនេះក្លិបដែលមានប្រភពមកពីខេត្តកំពង់ចាម បានបញ្ចប់បេសកកម្មរបស់ខ្លួនក្នុងចំណាត់ថ្នាក់លេខ២ Metfone Cambodian League មាន៤៩ពិន្ទុ ក្រោយឈ្នះបាន១៥ លើក ហើយស្មើគ្នាបាន៤ លើកនិង ចាញ់៣ប្រកួត។ ចំណែកក្នុងពានរង្វាន់សម្តេចតេជោ ហ៊ុន សែន វិញក្រុមបឹងកេត បានធ្លាក់ចេញត្រឹមវគ្គ៨ក្រុមចុងក្រោយចាញ់ក្រុមណាហ្គាវើល៕
Source: Kampuchea Thmey Daily
0 Comments