អ្នក​នយោបាយ​លេចធ្លោ​ថ្មី​របស់​ប្រទេស​ថៃ ​ត្រូវបាន​ចោទប្រកាន់​ពីបទ​បំបះបំបោរ​

មេដឹកនាំ​គណបក្ស​ថ្មី​មួយ​ដែល​បាន​ប្រកួតប្រជែង​នឹង​រដ្ឋាភិបាលយោធា​ថៃ​ត្រូវបាន​ចោទប្រកាន់​កាលពី​ថ្ងៃ​សៅរ៍​ពីបទ​បំបះបំបោរ​ ដែល​នេះ​ជា​សកម្មភាព​ផ្លូវច្បាប់​ចុងក្រោយ​បំផុត​ដែល​អ្នកនយោបាយ​លេចធ្លោ​ថ្មី​ត្រូវ​ប្រឈមមុខ​បន្ទាប់ពី​ការបោះឆ្នោត​ពោរពេញ​ដោយ​ជម្លោះ​កាលពី​ខែ​មិនា​។​

ការចោទប្រកាន់​ពីបទ​បះបោរ​ដែល​ត្រូវបាន​ដាក់​ដោយ​រដ្ឋាភិបាល​យោធា​ថៃ​គឺជា​ករណី​ព្រហ្មទណ្ឌ​ទី​២​ដែល​ប្រឆាំងនឹង​លោក Thanathorn Juangroongruangkit អាយុ​៤០​ឆ្នាំ​ចាប់តាំងពី​គាត់​បាន​បង្កើត​គណបក្ស​អនាគត​ឆ្ពោះទៅមុខ​កាលពី​ឆ្នាំមុន​។​

ករណី​ឆ្នាំ​២០១៥​បាន​លេចឡើង​ជាថ្មី​បន្ទាប់ពី​គណបក្ស​អនាគត​ឆ្ពោះទៅមុខ​បានទទួល​ភាពខ្លាំង​គួរ​ឲ្យ​ភ្ញាក់ផ្អើល​មួយ​នៅក្នុង​ការបោះឆ្នោត​ថ្ងៃទី​២៤​ខែមីនា​ដោយ​ជាប់​ចំណាត់ថ្នាក់​ទី​បី​ជាមួយ​សំឡេងឆ្នោត​៦.២​លាន​សំឡេង​។​

ទោះបីជា​យ៉ាងណាក៏ដោយ គេ​នៅតែ​មិន​ច្បាស់លាស់​ថា​តើ​គណបក្ស​មួយណា​ដែល​អាចបង្កើត​រដ្ឋាភិបាល​មួយ​បាន​បន្ទាប់ពី​ការបោះឆ្នោត​ជា​លើកដំបូង​ចាប់តាំងពី​រដ្ឋប្រហារ​យោធា​ឆ្នាំ​២០១៤​មក​។ លទ្ធផល​ចុងក្រោយ​អាច​នឹងមិន​បញ្ចេញ​ក្នុង​រយៈពេល​ប៉ុន្មាន​សប្តាហ៍​ទៀត​។​

គណបក្ស​អនាគត​ឆ្ពោះទៅមុខ​បាន​ចូលរួម​ក្នុង​សម្ព័ន្ធភាព “​លទ្ធិប្រជាធិបតេយ្យ​” ដែល​នឹង​ព្យាយាម​បង្កើត​រដ្ឋាភិបាល​មួយ​និង​រារាំង​លោកនាយក​រដ្ឋមន្ត្រី​ប្រា​យុទ្ធ​ចាន់​អូ​ចា​ពី​ការបន្ត​កាន់អំណាច​។​

ប៉ូលិស​បាន​ប្រាប់​រ៉​យ​ទ័​រថា ពាក្យបណ្តឹង​នេះ​មាន​តាំងពី​ឆ្នាំ​២០១៥​មកម្ល៉េះ​នៅពេលដែល​លោក Thanathorn ត្រូវបាន​គេ​ចោទប្រកាន់ថា បានផ្តល់​ជំនួយ​ដល់​មេដឹកនាំ​បាតុករ​ប្រឆាំងនឹង​រដ្ឋប្រហារ​យោធា​ឆ្នាំ​២០១៤​ដែល​រំលោភ​លើ​បម្រាម​របស់​រដ្ឋាភិបាល​លើ​ការប្រមូលផ្តុំ​នៃ​មនុស្ស​ច្រើនជាង​ប្រាំ​នាក់​។​

លោក Thanathorn ត្រូវបាន​គេ​ចោទប្រកាន់​ពីបទ​រំលោភ​មាត្រា​ទី​១១៦​នៃ​ក្រមព្រហ្មទណ្ឌ​ថៃ​ដែល​ស្មើនឹង​ការបះបោរ​និង​មាត្រា​ទី​១៨៩​សម្រាប់​ការជួយ​ដល់​អ្នកដទៃ​ដែល​បាន​ប្រព្រឹត្ត​បទឧក្រិដ្ឋ​ធ្ងន់ធ្ងរ​។​

គាត់​អាច​ប្រឈមមុខ​នឹង​ការជាប់​ពន្ធនាគារ​រយៈ​ពេល​៩​ឆ្នាំ​ប្រសិនបើ​រកឃើញ​កំហុស​។​

លោក Thanathorn ក៏​ប្រឈម​នឹង​ការចោទប្រកាន់​ពីបទ​ឧក្រិដ្ឋកម្ម​តាម​អ៊ីនធឺណិត​ដាច់ដោយឡែក​មួយទៀត​ផង​ដែរ​ពាក់ព័ន្ធ​សុន្ទរកថា​ដែល​លោក​ធ្វើ​ឡើងលើ Facebook ដែល​រិះគន់​រដ្ឋាភិបាល​ក្នុង​ខែកក្កដា​៕ REUTERS

​

Source: Kampuchea Thmey Daily