ខ្យល់កន្ត្រាក់ បោកបក់ចូលស្រុកកំរៀង រលំផ្ទះសង្កត់មនុស្សស្លាប់ម្នាក់

Cambodia News April 08, 2019

បាត់ដំបង ៖ ស្ត្រីម្នាក់ បានស្លាប់យ៉ាងអាណោចអាធ័មជាទីបំផុត ខណៈដែលស្ត្រីរងគ្រោះកំពុងជ្រកភ្លៀងនៅក្រោមផ្ទះ ក៏ស្រាប់តែមានខ្យល់កន្ត្រាក់មួយបានបោកបក់ចូលមកក្នុងភូមិ ព្រមទាំងបានវាយផ្ដួលលំនៅដ្ឋានអស់ជាច្រើនខ្នង រួមជាមួយនឹងផ្ទះរបស់ស្ត្រីរូបនេះផងដែរ។

ហេតុការណ៍ នៃគ្រោះធម្មជាតិនេះបានកើតឡើងកាលពីវេលាម៉ោង៥ល្ងាច ថ្ងៃទី៧ ខែមេសា ឆ្នាំ ២០១៩ នៅក្នុងឃុំបឹងរាំង ស្រុកកំរៀង ខេត្តបាត់ដំបង ដែលហេតុការណ៍នេះបានកើតឡើងស្របពេលដែលមេឃកំពុងធ្លាក់ភ្លៀងមួយមេយ៉ាងធំផងដែរ។

របាយការណ៍របស់សមត្ថកិច្ចបានឲ្យដឹងថា ខ្យល់កន្ត្រាក់នេះ បានបោកបក់ ដែលបង្កឲ្យមានការខូចខាតផ្ទះរបស់ប្រជាពលរដ្ឋ អស់សរុបចំនួន១៦ខ្នង ក្នុងនោះខូចខាតដំបូលចំនួន១២ខ្នង និង ដួលរលំទាំងស្រុងអស់ចំនួន៤ខ្នង ដែលការរលំទាំងស្រុងនេះ បានសង្កត់ទៅលើស្ត្រីម្នាក់បណ្តាលឲ្យស្លាប់ភ្លាមៗផងដែរ។

ស្ត្រីដែលជាជនរងគ្រោះមាន ឈ្មោះ សឿង ចំរើន អាយុ៣៧ឆ្នាំ មុខរបរជាកម្មករ រស់នៅក្រុមទី១៩ ភូមិដូង ឃុំបឹងរាំង ស្រុកកំរៀង ខេត្តបាត់ដំបង។ បច្ចុប្បន្នសព ត្រូវបានក្រុមគ្រួសារកំពុងរៀបចំធ្វើបុណ្យតាមប្រពៃណីហើយ៕