ភ្នំពេញ ៖ លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលបានអំពាវនាវឲ្យប្រជាពលរដ្ឋប្រុងប្រយ័ត្នខ្ពស់ចំពោះការពុលចំណីអាហារនៅក្នុងពិធីបុណ្យចូលឆ្នាំខែ្មរដែលនឹងប្រព្រឹត្តិទៅនៅថ្ងៃទី១៤,១៥និង១៦ខែមេសាឆ្នាំ២០១៩ខាងមុខនេះ។
ការអំពាវនាវនេះ ដោយសារនៅក្នុងពិធីបុណ្យចូលឆ្នាំខ្មែរម្តងៗតែងតែមានការពុលចំណីអាហារនិងបន្លែផ្លែឈើផ្សេងៗព្រោះថា ពិធីបុណ្យនេះមានមនុស្សប្រមូលផ្តុំគ្នាកកកុញច្រើនដែលមានអាហារស្អាតនិងមិនស្អាតនៅឡាយឡំគ្នា។ ជាក់ស្តែងគិតត្រឹមខែមីនា ឆ្នាំ២០១៩នេះ មានអ្នកពុលចំណីអាហារចំនួន១៦លើក ដោយមានអ្នកពុលចំនួន២៤៦នាក់ក្នុងនោះស្លាប់២នាក់ ខណៈ ឆ្នាំ២០១៨កន្លងទៅ មានករណីពុលចំណីអាហារចំនួន១៩លើក ដោយមានអ្នកពុលចំនួន៨៥២នាក់ក្នុងនោះស្លាប់១៣នាក់។
លោកសាស្ត្រាចារ្យ ម៉មប៊ុនហេងបានមានប្រសាសន៍ថា «ខ្ញុំសូមប្រកាសធ្វើការក្រើនរំលឹកជូនដល់ប្រជាជនទាំងអស់ឲ្យមានការប្រុងប្រយ័ត្នខ្ពស់លើបញ្ហាសុខភាពដែលអាចកើតមាននៅក្នុងអំឡុងពិធីបុណ្យចូលឆ្នាំខ្មែរប្រពៃណីជាតិដែលស្របគ្នាជាមួយនឹងអាកាសធាតុនៅលើផ្ទៃប្រទេសកម្ពុជាមានការកើនកម្ដៅខ្លាំងជាពិសេសទៅលើការបរិភោគចំណីអាហារនិងភេសជ្ជៈការរៀបចំអាហារនិងការទុកដាក់ឲ្យបានត្រឹមត្រូវដើម្បីចៀសផុតពីបញ្ហាឈឺពោះរាគរួសដែលបណ្តាលមកពីការបរិភោគចំណីអាហារមិនមានអនាម័យ អាហារជូរផ្អូម ឬ ទិញស្រាមកពិសាដែលជាស្រាបានផលិត ឬ បានបិទដោយមិនមានលក្ខណៈបច្ចេកទេសត្រឹមត្រូវជាដើមបន្ថែមលើសពីនេះខ្ញុំសូមលើកទឹកចិត្តគ្រប់ជួបគ្នាឲ្យចូលរួមអនុវត្តវិធានការណាមួយកាលការប្រុងប្រយ័ត្នរួមទាំងការការពារផ្ទាល់ខ្លួននិងក្រុមគ្រួសាររបស់ខ្លួន»។
នៅក្នុងសេចក្តីជូនព័ត៌មានមួយរបស់ក្រសួងសុខាភិបាល ស្ដីពីការបង្ការជំងឺនិងបញ្ហាសុខភាពក្នុងអំឡុងពេលពិធីបុណ្យចូលឆ្នាំខ្មែរដែលចេញផ្សាយកាលពីល្ងាចថ្ងៃទី០៤ខែមេសាឆ្នាំ២០១៩នេះលោកសាស្ត្រាចារ្យ ម៉ម ប៊ុនហេងបានណែនាំឲ្យប្រជាពលរដ្ឋត្រូវប្រកាន់ខ្ជាប់នូវវិធានការអនាម័យឲ្យបានខ្ជាប់ខ្ជួនរួមមានផឹកស្អាតរស់នៅស្អាតនិងបរិភោគស្អាតដើម្បីការពារសុខភាពពីជំងឺដង្កាត់ផ្សេងៗដូចជាជំងឺឈឺពោះ ជំងឺរាករូស ឬ ក្អួតចង្អោរជាដើម ដែលបណ្តាលមកពីការបរិភោគចំណីអាហារគ្មានអនាម័យ។
លោក សាស្ត្រាចារ្យ ម៉ម ប៊ុនហេងបានជំរុញឲ្យប្រជាពលរដ្ឋត្រូវពិសារទឹកស្អាត ឬ ទឹកដាំពុះនិងបរិភោគចំណីអាហារដែលមានអនាម័យ ត្រូវលាងដៃនឹងសាប៊ូអំឡុងមុនពេលរៀបចំអាហារ មុនបរិភោគនិងក្រោយបន្ទោបង់ លាងសំអាតបន្លែផ្លែឈើ សំអាតសម្ភារៈប្រើប្រាស់សម្រាប់ចំអិនអាហារឲ្យបានស្អាតនិងត្រូវចំអិនអាហារឲ្យបានឆ្អិនល្អពិសេសសាច់ សត្វស្លាបនិង អាហារសមុទ្រ។
ជាមួយគ្នានេះដែរ លោកសាស្ត្រាចារ្យក៏បានណែនាំឲ្យប្រជាពលរដ្ឋនៅតាមតំបន់ជនបទត្រូវមានការប្រុងប្រយ័ត្នចំពោះការទទួលទានស្រាស ឬ ស្រាថ្នាំនិងត្រូវមើលប្រភពផលិតឲ្យបានច្បាស់លាស់និងមានការទទួលស្គាល់ពីមន្ត្រីជំនាញត្រឹមត្រូវជាមុនសិនមុនទិញមកបរិភោគដើម្បីជៀសវាងកុំឲ្យមានការពុលស្រាដែលធ្វើឲ្យប៉ះពាល់ដល់សុខភាព ឬ អាយុជីវិតដោយសារក្នុងស្រាស ឬ ស្រាថ្នាំមានសារធាតុមេតាណុលខ្ពស់ ខណៈឆ្នាំ២០១៨កន្លងទៅ មានករណីពុលស្រាចំនួន៥លើកដោយមានអ្នកពុលស្រាចំនួន២០៦នាក់ ក្នុងនោះស្លាប់១២នាក់។
ជាមួយគ្នានេះដែរ លោកសាស្ត្រាចារ្យបានណែនាំចំពោះមនុស្សពេញវ័យទាំងអស់សូមកុំពិសាគ្រឿងស្រវឹងក្នុងពេលបើកបរ ឬ ក្នុងពេលបញ្ជាគ្រឿងម៉ាស៊ីនសូមបើកបរដោយមានការប្រុងប្រយ័ត្នត្រូវពាក់ខ្សែក្រវាត់ជាប់ជានិច្ចក្នុងពេលបើកបរកុំបើកបរលឿនពេកនិងប្រកាន់ខ្ជាប់នូវច្បាប់ចរាចរណ៍ ដើម្បីរួមគ្នាបញ្ចៀសឲ្យបាននូវគ្រោះថ្នាក់ចរាចរណ៍នៅលើដងផ្លូវសាធារណៈដោយសារតែការបើកបរលឿនពេកនិងមិនគោរពច្បាប់បើកបរជាដើម។
លោក យង់ គឹមអេង ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាពបានគាំទ្រក្រសួងសុខាភិបាលដែលបានណែនាំដល់ប្រជាពលរដ្ឋឲ្យប្រុងប្រយ័ត្នចំពោះសុខភាពនៅក្នុងពិធីបុណ្យចូលឆ្នាំខ្មែរខាងមុខនេះ។
យ៉ាងណាក៏ដោយ លោកស្នើឲ្យក្រសួងគួរតែឲ្យបុគ្គលិកសុខាភិបាលនៅតាមមន្ទីរពេទ្យឬមណ្ឌលសុខភាពផ្សព្វផ្សាយសេចក្តីជូនដំណឹងនេះបន្ត ដល់ប្រជាពលរដ្ឋដើម្បីឲ្យពួកគេបានដឹងនិងមានការប្រុងប្រយ័ត្នចំពោះការពុលចំណីអាហារនិងពុលស្រានេះ៕
Source: Kampuchea Thmey Daily
0 Comments