ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានដាក់បញ្ជាឲ្យអភិបាលរាជធានី-ខេត្តចំនួន៤ ដែលក្នុងនោះមានរាជធានីភ្នំពេញ ខេត្តកណ្តាល ខេត្តកំពង់ស្ពឺ និងខេត្តព្រះសីហនុ ដោះស្រាយបញ្ហាផលប៉ះពាល់ក្នុងការបញ្ជូនខ្សែអគ្គិសនី២៣០ និង៥០០គីឡូវ៉ុល ភ្នំពេញ-ព្រះសីហនុ ក្នុងរយៈពេល៥ខែ ហើយក្នុងករណីចាំបាច់ត្រូវប្រើច្បាប់ស្ដីពីអស្សាមិករណ៍។
ការចេញបញ្ជារបស់នាយករដ្ឋមន្ត្រីនាពេលនេះ ត្រូវបានគេមើលឃើញថា បានធ្វើឡើង ខណៈការដោះស្រាយផលប៉ះពាល់ជួបបញ្ហា ដោយសារទីតាំងដីមួយចំនួនជារបស់ក្រុមហ៊ុនធំៗ និងមួយចំនួនទៀត ជារបស់អ្នកមានអំណាចនៅក្នុងរដ្ឋាភិបាល។
យោងតាមបទបញ្ជារបស់រាជរដ្ឋាភិបាលស្ដីពីវិធានការដោះស្រាយបន្ទាន់ចំពោះផលប៉ះពាល់គម្រោងខ្សែបញ្ជូន២៣០គីឡូវ៉ុល និង៥០០គីឡូវ៉ុល ភ្នំពេញ-ព្រះសីហនុ កាលពីថ្ងៃទី០៥ ខែមេសា ឆ្នាំ២០១៩ ចុះហត្ថលេខាដោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់ថា រាជរដ្ឋាភិបាលសង្កេតឃើញថា មានផលប៉ះពាល់ដល់គម្រោងខ្សែបញ្ជូន២៣០គីឡូវ៉ុល និង៥០០គីឡូវ៉ុល ដែលជាខ្សែបញ្ជូនអគ្គិសនី ដែលរាជរដ្ឋាភិបាលយកចិត្តទុកដាក់យ៉ាងខ្លាំង ដើម្បីបញ្ជូនថាមពលពីប្រភពភាគខាងត្បូងមកប្រើប្រាស់ក្នុងប្រព័ន្ធបណ្ដាញជាតិទាំងមូល ជាពិសេសនៅក្នុងរាជធានីភ្នំពេញ ហើយត្រូវបញ្ចប់ឲ្យបានមុនចុងខែមករា ឆ្នាំ២០២០ខាងមុខនេះ។
តាមបទបញ្ជា ខ្សែបញ្ជូននេះមានបង្គោលសរុប៤២១បង្គោល ហើយបានដោះស្រាយរួចរាល់ចំនួន៣៤៩បង្គោល នៅសល់ចំនួន៧២ បង្គោលទៀត ដែលមួយចំនួនជាប់ពាក់ព័ន្ធជាមួយនឹងដីរបស់បណ្ដាក្រុមហ៊ុនធំៗ និងអ្នកមានតួនាទីនៅក្នុងរាជរដ្ឋាភិបាល ស្ថិតនៅក្នុងភូមិសាស្ត្ររាជធានី ខេត្តចំនួន៤ រួមមាន រាជធានីភ្នំពេញ ខេត្តកណ្តាល ខេត្តកំពង់ស្ពឺ និងខេត្តព្រះសីហនុ ហើយដើម្បីធានាអោយការកសាងគម្រោងខ្សែបញ្ជូន២៣០គីឡូវ៉ុល និង៥០០គីឡូវ៉ុល បញ្ចប់ការសាងសង់ និងដាក់ឲ្យដំណើរការតាមផែនការ រាជរដ្ឋាភិបាលសូមដាក់ចេញនូវបទបញ្ជាដល់ក្រសួង ស្ថាប័នពាក់ព័ន្ធ និងអាជ្ញាធររាជធានី ខេត្ត ទាំង៤ ត្រូវ៖
ទី១, អភិបាលរាជធានីភ្នំពេញ អភិបាលខេត្តកណ្តាល កំពង់ស្ពឺ ខេត្តព្រះសីហនុ ត្រូវធ្វើជាប្រធានដឹកនាំការងារដោះស្រាយផលប៉ះពាល់ដោយផ្ទាល់តែម្ដង។ ទី២, ក្រុមការងារពិសេសថ្មីខាងលើនេះ ត្រូវបញ្ចប់ការដោះស្រាយផលប៉ះពាល់ និងប្រគល់ដីមកឲ្យក្រុមហ៊ុនសាងសង់ខ្សែបញ្ជូន២៣០គីឡូវ៉ុល និង៥០០គីឡូវ៉ុល ភ្នំពេញ ខេត្តព្រះសីហនុក្នុងរយៈពេល៥ខែយ៉ាងយូរ ចាប់ពីពេលនេះតទៅ។ទី៣, ក្នុងករណីចាំបាច់អភិបាលរាជធានី ខេត្ត ត្រូវប្រើវិធានការរដ្ឋបាលស្របតាមច្បាប់ស្ដីពីអស្សាមិករណ៍ជាធរមាន ក្នុងករណីសំណងសមស្របមិនត្រូវបានទទួលយក ដោយម្ចាស់ដីដើម្បីធានាថា គម្រោងដែលជាប្រយោជន៍ជាតិនេះពុំត្រូវបានអូសបន្លាយជាបន្ត។ ទី៤, អភិបាលរាជធានី ខេត្ត ទាំង៤ ខាងលើ ត្រូវធ្វើរបាយការណ៍ជារៀងរាល់ថ្ងៃអំពីវឌ្ឍនភាពនៃការដោះស្រាយផលប៉ះពាល់ខាងលើមករាជរដ្ឋាភិបាល៕
Source: Kampuchea Thmey Daily
0 Comments