បុរសជនជាតិជប៉ុន Akihiro Kato ប្រធានក្លិបអង្គរថាយហ្គឺរ បានប្រកាសលើគណនីហ្វេសប៊ុករបស់ខ្លួនអញ្ជើញអ្នកនិយមបាល់ទាត់ ពិសេសប្រជាពលរដ្ឋនៅខេត្តសៀមរាប ឲ្យចូលរួមទស្សនាការប្រកួតក្នុងទឹកដីលើកដំបូងរបស់ខ្លួនតទល់ក្រុមជើងឯក៣សម័យកាលបឹងកេតអែហ្វស៊ី នៅវេលាម៉ោង៣និង៣០នាទីរសៀលថ្ងៃអាទិត្យ ទី០៧ មេសា ឆ្នាំ២០១៩ នេះឲ្យបានដល់ចំនួន៥០០០នាក់ ដើម្បីបំបែកកំណត់ត្រារដូវកាលចាស់។
បុរសដែលមកវិនិយោគបាល់ទាត់នៅប្រទេសកម្ពុជានៅឆ្នាំ២០១៥ បានសរសេរបញ្ជាក់ថា «គម្រោងអ្នកគាំទ្រ៥០០០នាក់! ខ្ញុំចង់យកជ័យជម្នះលើបឹងកេត ក្នុងការប្រកួតលើកដំបូងរបស់យើងលើទឹកដីខេត្តសៀមរាប នាថ្ងៃទី០៧ មេសាខាងនេះ ជាមួយអ្នកគាំទ្រថាយហ្គឺរ៥០០០នាក់។ តើអ្នកនឹងចូលរួមជាមួយយើងទេ? សូមមកចូលរួមទស្សនា! កុំភ្លេចថ្ងៃទី០៧ មេសា!»។
គួររំឭកថា កាលពីរដូវកាល២០១៨កន្លងទៅ អង្គរថាយហ្គឺរបានបង្កើតកំណត់ត្រាទាក់ទាញបានអ្នកចូលរួមទស្សនាបានច្រើនជាងគេ សម្រាប់ការប្រកួតលីគកំពូលកម្ពុជា ពោលមានអ្នកទស្សនាផ្ទាល់នៅកីឡដ្ឋានខេត្តសៀមរាបប្រមាណជាង៤២០០នាក់ ព្រមទាំងឈ្នះពានរង្វាន់លើកទឹកចិត្តពីគណៈកម្មការប្រកួតបាល់ទាត់ជាតិកម្ពុជា (CNCC) ផងដែរចំពោះសកម្មភាពលើសគេនេះ។
កន្លងមកបុរសមកពីជប៉ុនខាងលើធ្លាប់បានលើកឡើងថា «៥ទៅ១០ឆ្នាំខាងមុខ ខ្ញុំដាក់គោលដៅឲ្យអង្គរថាយហ្គឺរ ក្លាយជាក្លិបលេខ១ក្នុងតំបន់អាស៊ាន ហើយខ្ញុំរំពឹងថា កីឡាករទាំងអស់នឹងលះបង់ខ្ពស់ ដើម្បីសម្រេចទស្សនវិស័យរបស់យើង។ អង្គរថាយហ្គឺរ ចង់ក្លាយជានិមិត្តរូបនៃក្ដីសុបិន្ត ក្ដីសង្ឃឹមនិងកម្លាំងចិត្ត សម្រាប់ប្រជាពលរដ្ឋខេត្តសៀមរាប ក៏ដូចជាកម្ពុជាទាំងមូល»។
លោក Akihiro Kato មានមកវិនិយោគក្លិបបាល់ទាត់នៅកម្ពុជា តាំងពីឆ្នាំ២០១៥ មកម្ល៉េះពោលគឺលោកបានកសាងក្លិបឡើងវិញក្រោយថ្នាក់ដឹកនាំក្លិបត្រាយអាស៊ី ចាកចេញ ហើយពេលនោះក្លិបបានប្តូរឈ្មោះទៅជាខេមបូឌាថាយហ្គឺរ និងបន្តប្តូរឈ្មោះមកអង្គរថាយហ្គឺរ វិញពេលប្តូរមូលដ្ឋានពីរាជធានីភ្នំពេញ ទៅកាន់ខេត្តសៀមរាប៕
Source: Kampuchea Thmey Daily
0 Comments