មេដឹកនាំគណបក្សប្រឆាំងវេណេហ្ស៊ូអេឡាលោក Juan Guaido បានជំរុញឲ្យអ្នកគាំទ្ររបស់គាត់ធ្វើបាតុកម្មនៅតាមដងផ្លូវនៅថ្ងៃសៅរ៍ដើម្បីរក្សាសម្ពាធទៅលើលោកប្រធានាធិបតី Nicolas Maduro ស្របពេលមានកំហឹងកាន់តែខ្លាំងឡើងជុំវិញការដួលរលំនៃសេវាសាធារណៈ។
អ្នកគាំទ្រគណបក្សប្រឆាំងរាប់ពាន់នាក់ត្រូវបានគេរំពឹងថានឹងដើរដង្ហែតាមរដ្ឋធានី Caracas ចាប់ពីម៉ោង១១ព្រឹកថ្ងៃសៅរ៍ទៅខណៈប្រទេសវេណេហ្ស៊ូអេឡាកំពុងតស៊ូជាមួយការដាច់ភ្លើងដ៏ធំនិងការដួលរលំនៃសេវាសាធារណៈ។
លោក Guaido ដែលត្រូវបានទទួលស្គាល់ជាប្រធានាធិបតីបណ្តោះអាសន្នដោយប្រទេសជាង៥០បាននិយាយនៅក្នុងសារ Twitter កាលពីថ្ងៃសុក្រថា “ចូរយើងរក្សាជំហររឹងមាំនៅតាមដងផ្លូវ។ នេះគឺដើម្បីជីវិតរបស់ប្រជាជនវេណេហ្ស៊ូអេឡាទាំងអស់”។
ទន្ទឹមនោះ លោក Maduro ដែលបានបន្ទោសអាមេរិកចំពោះការដាច់ចរន្តអគ្គិសនីនាពេលថ្មីៗនេះក៏បានអំពាវនាវឲ្យអ្នកគាំទ្ររដ្ឋាភិបាលដើរក្បួននៅក្នុងទីក្រុង Caracas ផងដែរ។
លោក Guaido បាននិយាយកាលពីដើមសប្តាហ៍នេះថា លោកភ័យខ្លាចការចាប់ពង្រត់ដោយភ្នាក់ងារ រដ្ឋាភិបាលបន្ទាប់ពីសមាជិកសភាដែលគាំទ្រលោក Maduro បានដកអភ័យឯកសិទ្ធិរដ្ឋសភារបស់លោកកាលពីថ្ងៃអង្គារហើយបានអនុញ្ញាតឲ្យតុលាការកំពូលរបស់ប្រទេសនេះធ្វើការចោទប្រកាន់លោកសម្រាប់ការប្រកាសខ្លួនឯងជាប្រធានាធិបតី។
សហរដ្ឋអាមេរិកគឺស្ថិតក្នុងចំណោមប្រទេសដំបូងគេដែលបានទទួលស្គាល់លោក Guaido នៅពេលដែលមេដឹកនាំរដ្ឋសភារូបនេះបានប្រកាសខ្លួនឯងជាប្រធានាធិបតីបណ្តោះអាសន្ននៅថ្ងៃទី២៣ខែមករាដោយរក្សាសម្ពាធជាអន្តរជាតិលើលោក Maduro ឲ្យលាលែងពីតំណែង។
ចំណែកលោកអនុប្រធានាធិបតី Mike Pence បានប្រកាសការដាក់ទណ្ឌកម្មថ្មីប្រឆាំងនឹងនាវាចំនួន៣៤គ្រឿងដែលជាកម្មសិទ្ធិរបស់ក្រុមហ៊ុនប្រេងរដ្ឋវេណេហ្ស៊ូអេឡានិងក្រុមហ៊ុនពីរដែលដឹកប្រេងឆៅទៅប្រទេសគុយបា៕ AFP
Source: Kampuchea Thmey Daily
0 Comments