លី​គ​កំពូល​ម៉ាឡេស៊ី​ ៖ ក្លិប​របស់ ចាន់ វឌ្ឍនាកា រកបាន​១​ពិន្ទុ តែ​ក្លិប​ធា​រី ចន្ថា​ប៊ី​ន បរាជ័យ​ក្នុង​សប្ដាហ៍​ទី​៨

​នៅ​ឆ្នាំ​២០១៩ នេះ​មាន​កីឡាករ​សមា​ជិត​ក្រុម​ជម្រើសជាតិ​កម្ពុជា ចំនួន​២​នាក់​កំពុង​ប្រកប​អាជីព​នៅ​លី​គ​កំពូល​ម៉ាឡេស៊ី (Malaysia Super League) ដោយ​ក្នុងនោះ​មាន​កីឡាករ ចាន់ វឌ្ឍនាកា ជា​សមាជិក​ក្លិប​បាល់ទាត់ PKNS (Kelab Bolasepak Perbadanan Kemajuan Negeri Selangor) និង​កីឡាករ ធា​រី ចន្ថា​ប៊ី​ន សមាជិក​របស់​ក្លិប​Terengganu FA​។

សម្រាប់​លទ្ធផល​ប្រកួត​សប្ដាហ៍​ទី​៨​ថ្មីៗ នេះ​ក្រុម​Terengganu FA ត្រូវ​បើកទ្វារ​កីឡដ្ឋាន​Stadium Sultan Ismail Nasiruddin Shah ក្នុង​ទីក្រុង Kuala Terengganu​របស់ខ្លួន​ទទួល​ស្វាគមន៍​ក្រុម PKNP យប់​ថ្ងៃទី​៦​ខែមេសា ឆ្នាំ​២០១៩ តែ​ត្រូវ​បរាជ័យ ២​ទល់​១ ខណៈ​ក្រុម PKNS វិញ​ត្រូវ​ធ្វើដំណើរ​ទៅកាន់​ទីក្រុង Ipoh ជួប​ម្ចាស់ផ្ទះ​Perak នៅ​យប់​ថ្ងៃទី​៧ ខែមេសា ឆ្នាំ​២០១៩ លើ​ទីលាន​កីឡដ្ឋាន​Stadium Perak ហើយ​ចប់​ការប្រកួត​បាន​ស្មើគ្នា​១​ទល់​១​។



សូម​រំលឹក​ថា ​រដូវ​កាល​ឆ្នាំ​២០១៩ នៅ​លី​គ​កំពូល​ប្រទេស​ម៉ាឡេស៊ី​មាន​សមាជិក​ចំនួន​១២​ក្រុម ដែល​ត្រូវ​ប្រកួត​ពី​ថ្ងៃ​ទី​១ ខែកុម្ភៈ ដល់​ថ្ងៃទី​២១ ខែកក្កដា ឆ្នាំ​២០១៩​។ ក្រុម​ទាំង​១២​ត្រូវ​ប្រកួត​សន្សំ​ពិន្ទុ​ចំនួន​២​ជើង ហើយ​ក្រុម​ជើងឯក​ទទួល​កៅអី​ទៅលេង​វគ្គ​ចែក​ពូ​ល​ពានរង្វាន់​កម្រិត​ទ្វីបអាស៊ី (AFC Champions League group stage) និង​ក្រុម​ជើងឯក​រង​ទទួលបាន​រង​ទទួលបាន​កៅអី​ចូល​លេង​វគ្គ​ជម្រុះ​ពានរង្វាន់ AFC Champions League ជុំ​ទី​២​។ ចំណែក​ក្រុម​បាត​តារាង​ចំនួន​២​ក្រុម វិញ​ត្រូវ​ធ្លាក់​ទៅលេង​នៅ​ពានរង្វាន់​លី​គ​លំដាប់​ទី​២Malaysia Premier League​។

សម្រាប់​កម្មវិធី​ប្រកួត​នៅ​សប្ដាហ៍​បន្ទាប់​ដែលជា​សប្ដាហ៍​ទី​៩ គឺ​ក្រុម Terengganu FA ត្រូវធ្វើ​ដំណើរ​ទៅកាន់​ទីក្រុង Alor Setar ជួប​ម្ចាស់ផ្ទះ Kedah នៅវេលា​ម៉ោង​៨​យប់​ថ្ងៃទី​១២ ខែមេសា ឆ្នាំ២០១៩ លើ​ទីលាន​កីឡដ្ឋាន Stadium Darul Aman​។ ចំណែក​ក្រុម​ត្រូវ​បើកទ្វា​កីឡដ្ឋាន Stadium Shah Alam ក្នុង​ទីក្រុង Shah Alam នៅ​នៅវេលា​ម៉ោង​យប់​ថ្ងៃទី​១៤​ខែមេសា ឆ្នាំ​២០១៩​។



ចំពោះ​ប្រទេស​កម្ពុជា ធ្លាប់មាន​កីឡាករ​៤​នាក់​ចេញទៅ​ប្រកប​អាជីព​នៅ​លី​គ​កំពូល​ប្រទេស​ម៉ាឡេស៊ី កាលពី​ឆ្នាំ​២០១៨ កន្លង​ទៅដោយ​ក្នុងនោះ​មាន​កីឡាករ ចាន់ វឌ្ឍនាកា ចូលរួម​ក្លិប Pahang FA ហើយ​កីឡាករ កែវ សុខ​ផេង ចូលរួម​ក្លិប PKNP កីឡាករ ប្រាក់ មុន្នី​ឧ​ត្ត​ម ចូល​ក្លិប​Negeri Sembilan និង​កីឡាករ ធា​រី ចន្ថា​ប៊ី​ន ចូលរួម​ក្លិប​Terengganu FA​។ ក្នុងចំណោម​កីឡាករ​ទាំង​៤​មាន​៣​នាក់​ត្រូវ​ក្លិប​សម្រេច​បញ្ចប់​កិច្ចសន្យា​ត្រឹម​ពាក់កណ្ដាល​រដូវ​កាល​ហើយ​មានតែ ធា​រី ចន្ថា​ប៊ី​ន ប៉ុណ្ណោះ​ក្លិប​រក្សាកិច្ច​សន្យា​រហូត​ដល់​ចប់​រដូវ​កាល​ ព្រមទាំង​បន្ត​កិច្ច​សន្យា​រហូត​ដល់​ឆ្នាំ​២០១៩​នេះ​ទៀត​៕

Source: Kampuchea Thmey Daily