ការប្រកួតប្រដាល់ដណ្តើមពានរង្វាន់ជើងឯកTV5 Knock Out Series ទម្ងន់៥៤គីឡូក្រាម លើសង្វៀនTV5 ព្រែកកំពឹស នៅថ្ងៃសៅរ៍ ទី០៤ ខែឧសភា ឆ្នាំ២០១៩នេះ ជាការចាប់ផ្ដើមប្រកួតលើកដំបូង ក្នុងជម្រុះជុំទី២ ដែលមានអ្នកប្រដាល់៤រូប ដែលឆ្លងផុតពីជុំទី១មក ដើម្បីប្រជែងយកកៅអីសម្រាប់ជុំទី៣ ដែលជាវគ្គ១ភាគ៤ផ្ដាច់ព្រ័ត្រនោះ។
ព្រឹត្តិការណ៍ប្រដាល់ដណ្តើមពានរង្វាន់ជើងឯកTV5 Knock Out Series ទម្ងន់៥៤គីឡូក្រាម ជុំទី២ ជាការជម្រុះក្នុងចំណោម១៦នាក់ ទុក៨នាក់ ហើយជុំទី៣ គឺជម្រុះក្នុង៨នាក់ទុក៤នាក់ និងជុំទី៤ និងទី៥ ជាការប្រកួតដំណាក់កាលផ្ដាច់ព្រ័ត្រ គឺពាក់កណ្ដាលផ្ដាច់ព្រ័ត្រ និងផ្ដាច់ព្រ័ត្រ។
សម្រាប់ការប្រកួតជម្រុះលើកទី១ ក្នុងជុំទី២នេះ ម៉ន ភារម្យ អ្នកប្រដាល់ក្លិបការិយាល័យទី៥កងទ័ពជើងគោក នឹងជួបប្រកួតជាមួយ សឺន ថៃសាន់ អ្នកប្រដាល់ក្លិបតាព្រហ្មមានជ័យ។
ការប្រកួតក្នុងជុំទី២នេះ ក៏ប្រកួតតែបីទឹក ដូចក្នុងជុំទី១ដែរ ហើយអ្នកដែលឈ្នះបានឡើង និងអ្នកដែលចាញ់ត្រូវជ្រុះធ្លាក់ត្រឹមនេះ។
រវាងម៉ន ភារម្យ និងសឺន ថៃសាន់ នេះ ពួកគេទោះបីជាអ្នកប្រដាល់ចាស់វស្សាដូចគ្នា ហើយធ្លាប់ជួបគ្នាម្តងកាលពីក្នុងឆ្នាំ២០១៧កន្លងមក ដោយក្នុងការជួបពេលនោះ សឺន ថៃសាន់ ឈ្នះ ម៉ន ភារម្យ ត្រឹមពិន្ទុប៉ុណ្ណោះ។ ទោះជាយ៉ាងណា ពួកគេទាំងពីរនាក់ មានកម្រិតទីតាំងសមត្ថភាពប្រហាក់ប្រហែលគ្នាទេ ដែលពេលនោះ ម៉ន ភារម្យ រាងអន់កម្លាំងស៊ុហ្វ ទើបគេវាយចាញ់ ថៃសាន់ ដោយពិន្ទុ នោះ។
ប៉ុន្តែទោះជាយ៉ាងនេះក្តី សម្រាប់ពេលនេះ សឺន ថៃសាន់ មិនប្រាកដថា ឈ្នះម៉ន ភារម្យ ទៀតនោះទេ។ ភារម្យ ឥឡូវគេល្អ ខ្លាំង ព្រមទាំងមានល្បិចកលប្រកួត កណ្ដាប់ដៃ និងជើងទាត់ខ្លាំង ហើយវាយចេញលឿនរហ័ស ដែលខុសពី សឺន ថៃសាន់ ឥឡូវរាងស្រុតធ្លាក់ជាងមុនបន្តិច។
កាលពីក្នុងជុំទី១ ម៉ន ភារម្យ គេវាយឈ្នះ ប៊ុន គន្ធា សមាគមកីឡាប្រដាល់ក្រសួងការពារជាតិ ដោយពិន្ទុ។ ឯ សឺន ថៃសាន់ គេឈ្នះរិទ្ធ ប្រាក់ប៊ិន ក្លិបកងពលតូចលេខ៧០ ដោយពិន្ទុដែរ។
សម្រាប់ការជួបគ្នា រវាង ម៉ន ភារម្យ និង សឺន ថៃសាន់ នេះ ជាការជួបគ្នាដ៏មានលក្ខណៈតឹងតែងបំផុត ដែលក្រុមអ្នកវិភាគប្រដាល់មិនហ៊ានអះអាងមុនថា នរណាជាអ្នកឈ្នះនោះឡើយ។ តែយ៉ាងណា គេនៅតែរំពឹងថា ម៉ន ភារម្យ អាចនឹងយកឈ្នះ សឺន ថៃសាន់ បានវិញមិនខាន។ ចាំមើល តើម៉ន ភារម្យ អាចយកឈ្នះសឺន ថៃសាន់ បានមែនឬអត់?។
ចំពោះការប្រកួតមួយគូទៀតនោះ ជាការជួបគ្នារវាងឡុង ណងសៅ អ្នកប្រដាល់ក្លិបសាលវ័ន្តកីឡា និង គួន សុវណ្ណ អ្នកប្រដាល់ក្លិបយុវវាលស្បូវខណ្ឌច្បារអំពៅ។ ពីរនាក់នេះ មិនធ្លាប់ជួបគ្នាទេកន្លងមក ព្រោះថាឡុងណងសៅ ជាអ្នកប្រដាល់ជើងថ្មី ឯ គួនសុវណ្ណគេជាជើងចាស់យូរហើយ។
សម្រាប់ការជួបគ្នាលើកនេះ មិនដឹងថានរណា ជាអ្នកមានសំណាងបានឡើងទៅប្រកួតបន្តទៀតនោះទេ ? តែយ៉ាងណា ឡុង ណងសៅ គេមានតែមត្រង់ខ្ពស់ជាង និង មានផ្លែល្អជាងគួន សុវណ្ណ ហើយម្យ៉ាងទៀត ណងសៅគេនៅក្មេង កម្លាំងស៊ុហ្វខ្លាំង និងរឹងមាំជាងគួន សុវណ្ណ។
ប៉ុន្តែឡុង ណងសៅ ក៏មិនអាចធ្វេសប្រហែសឬមើលស្រាល ចំពោះជើងចាស់គួន សុវណ្ណ នេះបានដែរ ព្រោះសុវណ្ណនេះ គេក៏មានល្បិចកលនិងបច្ចេកទេសវាយល្អដែរ និយាយរួមពីរនាក់នេះ គឺត្រូវមានការប្រយ័ត្នរៀងៗខ្លួន។ យ៉ាងណា ការប្រកួតរវាងអ្នកប្រដាល់ទាំងពីរ ទោះជាអ្នកណាឈ្នះ ក៏ឈ្នះដោយវេទនាដែរ ។
កាលពីប្រកួតក្នុងជុំទី១នោះ ឡុង ណងសៅ គេបានផ្តួលប្រាក់ ស៊ីណាត ក្លិបតាឯកដំបងដែកមានរិទ្ធខេត្តព្រៃវែងតែក្នុងទឹកទី១ប៉ុណ្ណោះ ឯ គួន សុវណ្ណ គេវាយឈ្នះសួ ចាន់រាជ ក្លិបតាព្រហ្មមានជ័យ ដោយពិន្ទុ ។ ចាំមើល ក្នុងជុំទី២ រវាងឡុង ណាងសៅ និង គួន សុវណ្ណ នេះ តើនរណានៅ នរណាដើរចេញពីការប្រកួតនេះ ? ។
ការប្រកួតជម្រុះដណ្តើមពានរង្វាន់ជើងឯកTV5 Knock Out Series ទម្ងន់៥៤គីឡូក្រាមជុំទី១ ដែលបានបញ្ចប់កាលពីថ្ងៃទី២៧មេសាកន្លងទៅនេះ បានចម្រាញ់បានអ្នកប្រដាល់ចំនួន១៦រូប ក្នុងចំណោមអ្នកប្រដាល់ចំនួន ៣២ ដែលត្រូវប្រកួតបន្តក្នុងជុំទី២នេះ គឺ ម៉ន ភារម្យ ក្លិបការិយាល័យទី៥កងទ័ពជើងគោក ,ចាន់ សាន់ ក្លិបតាព្រហ្មមានជ័យ , ឡុង ណងសៅ ក្លិបសាលវ័ន្តកីឡា, គួន សុវណ្ណ ក្លិបយុវវាលស្បូវកីឡា , អេ ហនុមាន ក្លិបអេភូថងកីឡា , ផាន់ សុផាត ក្លិបពុទ្ធសេរីវង្សកីឡា,គឿម សុវណ្ណឌឿត ក្លិបមោងឫស្សីមរតកគុនខ្មែរ, ខេម ចាន់ ក្លិបកងពលតូចទ័ពឆ័ត្រយោង៩១១ , ឫទ្ធិ សាស្ត្រាវុធ ក្លិបអាណាចក្រគុនខ្មែរ ,សូត្រ វាសនា ក្លិបបក្សីស្លាបដែក ,អេអាំម៉ារីន ភូថង ក្លិបអេភូថងកីឡា , ជី ឆៃលី ក្លិបកងពលធំអន្តរាគមន៍លេខ២ ,សេក សារ៉ាន់ ក្លិបអង្គរមានជ័យខេត្តសៀមរាប , លី តក់ ក្លិបប្រយុទ្ធគុនខ្មែរ ,គីន ខ្លឹម ក្លិបកងពលតូចទ័ពឆ័ត្រយោង៩១១ និង លីន សេងហុង ក្លិបបូរីរាជសីហ៍មានរិទ្ធ៕
Source: Kampuchea Thmey Daily
0 Comments