ក្រុមប្រឹក្សារដ្ឋធានីហូឡង់បាននិយាយកាលពីថ្ងៃព្រហស្បតិ៍ថា រាល់រថយន្ត និងម៉ូតូដែលដើរដោយប្រេងសាំងនិងម៉ាស៊ូតនឹងត្រូវហាមឃាត់ពីទីក្រុង Amsterdam ចាប់ពីឆ្នាំ២០៣០ទៅក្នុងគោលបំណងអនុវត្តកិច្ចខិតខំប្រឹងប្រែងសម្អាតខ្យល់ទីក្រុងឱ្យស្អាតឡើងវិញ។
សមាជិកក្រុមប្រឹក្សាចរាចរណ៍ក្រុងលោក Sharon Dijksmaបានឱ្យដឹងថា "ការបំពុលតែងតែជាឃាតកដ៏ស្ងៀមស្ងាត់និងជាគ្រោះថ្នាក់សុខភាពដ៏ធំបំផុតក្នុងចំណោមគ្រោះថ្នាក់ដទៃទៀតក្នុងទីក្រុង Amsterdam។"
គេសង្កេតឃើញថាបើទោះការប្រើប្រាស់កង់មានលក្ខណៈទូលំទូលាយដោយប្រជាជនហូឡង់ក៏ពិតមែនតែការបំពុលបរិយាកាសនៅហូឡង់នៅតែមានកម្រិតអាក្រក់ជាងនៅអឺរ៉ុបទៅឡើយក៏ដោយសារតែបញ្ហាចរាចរណ៍កកស្ទះយ៉ាងធ្ងន់ធ្ងរក្នុងរដ្ឋធានី Amsterdam និងក្រុង Rotterdam។ក្រសួងសុខាភិបាលបានព្រមានថាកម្រិតនីដ្រូសែនឌីអុកស៊ីតក្នុងពេលបច្ចុប្បន្ននិងការបញ្ចេញភាគល្អិតតូចៗអាចនាំឱ្យមានជំងឺផ្លូវដង្ហើមផ្សេងៗដែលជាជំងឺរ៉ាំរ៉ៃនិងអាចកាត់បន្ថយអាយុរំពឹងទុករបស់មនុស្សបានច្រើនជាង១ឆ្នាំឯណោះ។
អាជ្ញាធរនៃទីក្រុង Amsterdam បាននិយាយថាខ្លួនមានគោលបំណងជំនួសរាល់គ្រឿងម៉ាស៊ីនទាំងឡាយណាដែលប្រើប្រេងសាំងនិងម៉ាស៊ូតដោយយានជំនិះដែលមិនមានបញ្ចេញផ្សែងដូចជារថយន្តអគ្គិសនីនិងរថយន្តដែលដើរដោយថាមពលអ៊ីដ្រូសែននៅចុងទសវត្សរ៍ក្រោយនេះ។
រដ្ឋធានីមួយនេះនឹងចាប់ផ្ដើមផែនការនេះដោយហាមឃាត់រថយន្តប្រើម៉ាស៊ូតទាំងអស់ដែលផលិតមុនឆ្នាំ២០០៥ចេញពីទីក្រុងនៅឆ្នាំក្រោយនិងបន្តពង្រីកសកម្មភាពរបស់ខ្លួនលើយានយន្តដែលត្រូវហាមឃាត់បន្ថែមទៀត៕ REUTERS
Source: Kampuchea Thmey Daily
0 Comments