ស្វាយរៀង ៖ កាលពីរសៀលថ្ងៃទី០៣ ខែឧសភា ឆ្នាំ២០១៩ នៅស្នងការដ្ឋាននគរបាល ខេត្តស្វាយរៀង បានធ្វើពិធីប្រគល់វិទ្យុទាក់ទងម៉ូដែល Motorola 4GLTE ស៊េរីទំនើបចំនួន១៧៥គ្រឿង សរុបជាទឹកប្រាក់ ប្រមាណ១៩,២៥០ដុល្លារ ដែលជាអំណោយដ៏ថ្លៃថ្លារបស់ លោកនាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិជូនដល់អង្គភាពចំណុះស្នងការដ្ឋាននគរបាលខេត្តស្វាយរៀង ដែលពិធីនេះ ក្រោមអធិបតីភាព លោកឧត្ដមសេនីយ៍ទោ កឹង ឃន ស្នងការនគរបាលខេត្ត តំណាងដ៏ខ្ពង់ខ្ពស់ លោកនាយឧត្ដមសេនីយ៍ សន្តិបណ្ឌិត អគ្គស្នងការនគរបាលជាតិ។
លោកឧត្ដមសេនីយ៍ទោ កឹង ឃន បានឲ្យដឹងថា វិទ្យុទាក់ទងដែលត្រូវចែកជូននាឱកាសនេះ ត្រូវបានបែងចែកជូនដល់ លោក លោកស្រី ស្នងការរង លោកអនុប្រធានសេនាធិការ អនុប្រធានការិយាល័យកណ្តាល លោក លោកស្រី នាយការិយាល័យ លោកអធិការនគរបាលទាំង៨ ក្រុង.ស្រុក លោកមេបញ្ជាការវរនគរបាលការពារព្រំដែន ទាំង២ លោក លោកស្រី នាយប៉ុស្តិ៍នគរបាលរដ្ឋបាលទាំង៨០ប៉ុស្តិ៍ លោកនាយប៉ុស្តិ៍នគរបាលការពារព្រំដែន និង មន្ត្រីនគរបាលពាក់ព័ន្ធមួយចំនួនទៀត។
លោកស្នងការ បានផ្ដាំផ្ញើដល់កងកម្លាំងទាំងអស់ ត្រូវបន្តថែរក្សា សន្តិសុខ សណ្ដាប់ធ្នាប់ ជូនប្រជាពលរដ្ឋ និងសង្គមជាតិ ឲ្យបានល្អប្រសើរ ដើម្បីតបស្នងដល់លោកនាយឧត្ដមសេនីយ៍ សន្តិបណ្ឌិត អគ្គស្នងការនគរបាលជាតិ ដែលតែងតែគិតគូរ ដល់កងកម្លាំងនគរបាលគ្រប់លំដាប់ថ្នាក់៕
Source: Kampuchea Thmey Daily
0 Comments