ស្ទឹងត្រែង ៖ ជនសង្ស័យជនជាតិឡាវ ឈ្មោះ ជឿ ហាយ ភេទប្រុស អាយុ៣៣ឆ្នាំ រស់នៅភូមិចាំមឺយ ស្រុកភុងសាលី ខេត្តភុងសាលី ប្រទេសឡាវ ជាប់ព្រំដែនប្រទេសចិន បាននាំយកថ្នាំញៀនមួយគីឡូក្រាម ចូលមកទឹកដីខេត្តស្ទឹងត្រែង ត្រូវបានកម្លាំងកងរាជអាវុធហត្ថឃាត់ខ្លួនបាន។
ក្នុងប្រតិបត្តិការបង្ក្រាបគ្រឿងញៀន និងឃាត់ខ្លួនជនសង្ស័យ បានធ្វើឡើងនៅចំណុចស្ពានទី២ភូមិខាំផាន់ សង្កាត់សាមគ្គី ក្រុងស្ទឹងត្រែងនៅវេលាម៉ោង១២និង៣០នាទី ថ្ងៃទី៨ ខែឧសភា ឆ្នាំ២០១៩ រួមជាមួយថ្នាំញៀនមួយកញ្ចប់ធំ។
លោកវរសេនីយ៍ឯក ដួង វិចិត្រ មេបញ្ជាការរងកងរាជអាវុធហត្ថខេត្តបានបញ្ជាក់ថា ក្រោមការបញ្ជាផ្ទាល់ពីលោកមេបញ្ជាការ និងមានការសម្របសម្រួលពីព្រះរាជអាជ្ញាអមសាលាដំបូងខេត្តជនសង្ស័យ ត្រូវបានឃាត់ខ្លួនជាមួយថ្នាំញៀនមួយកញ្ចប់ធំ និងបាននាំខ្លួនមកទីបញ្ជាការដ្ឋានកងរាជអាវុធហត្ថខេត្តធ្វើការសាកសួរបន្ត។
ជនសង្ស័យ ឈ្មោះ ជឿ ហាយ ជាជនជាតិឡាវបានឆ្លើយសារភាពចំពោះមុខព្រះរាជអាជ្ញា និងសមត្ថកិច្ចថា របស់នេះមិនមែនជារបស់ខ្លួនទេ គឺមានមនុស្សម្នាក់ហុចឲ្យនៅក្នុងផ្សារខេត្តភុងសាលីប្រទេសឡាវ ដោយគេឲ្យឈ្នួលក្នុងតម្លៃ៥លានគីប ស្មើ២.៥០០.០០០ប្រាក់រៀលខ្មែរ ដើម្បីប្រគល់ឲ្យគេនៅក្បែរព្រំដែនកម្ពុជាតែមិនទាន់បានប្រគល់ឲ្យគេផង ក៏ត្រូវបានសមត្ថកិច្ចចាប់ខ្លួនតែម្តង។
ការធ្វើតេស្តនៅចំពោះមុខ លោក គឹម ហុងសាន ព្រះរាជអាជ្ញារងអមសាលាដំបូងខេត្ត ជាក់ស្ដែងដែលវត្ថុតាងរឹបអូសបាននេះជាប្រភេទថ្នាំញៀន(មេតំហ្វេតាមីនម្សៅក្រាមពណ៌សថ្លា) មានទម្ងន់សរុប១០៤៤,៧ក្រាម ស្មើទម្ងន់សុទ្ធ១០០២,៥ក្រាម។
សូមបញ្ជាក់ថា នេះជាលើកទី២ហើយ នៅដើមខែឧសភានេះ ដែលកម្លាំងកងរាជអាវុធហត្ថខេត្តបង្ក្រាបបទល្មើសគ្រឿងញៀន ហើយទាក់ទិនករណីខាងលើនេះ សមត្ថកិច្ចបានរៀបចំសំណុំរឿងបញ្ជូនទៅសាលាដំបូងតាមនីតិវិធីផងដែរ៕
Source: Kampuchea Thmey Daily
0 Comments