ភ្នំពេញ ៖ យុវជនម្នាក់ បានទៅរកទិញទូរស័ព្ទ ខណៈដែលអ្នក់លក់យកទូរស័ព្ទឲ្យមើល គាប់ជួន អ្នកលក់ភ្លេចខ្លួន ក៏ឆ្លៀតឱកាសលួចយកគេចខ្លួនមិនបានប៉ុន្មានម៉ោងផង ត្រូវជាប់ខ្នោះដៃរបស់កម្លាំងសមត្ថកិច្ច។
មន្ត្រីនគរបាលមូលដ្ឋានបានឲ្យដឹងថា ការឃាត់ខ្លួនជនសង្ស័យក្នុងករណីលួច(ទូរស័ព្ទដៃ)នេះ ធ្វើឡើង នៅថ្ងៃទី០៨ ខែឧសភា ឆ្នាំ២០១៩ វេលាម៉ោង០៣និង១៥នាទី ក្រោយពីធ្វើសកម្មភាពលួចកាលពីថ្ងៃទី០៦ ខែឧសភា ឆ្នាំ២០១៩ វេលាម៉ោង១១និង៣០នាទី នៅចំណុចហាងលក់ទូរស័ព្ទដៃយីហោជីម៉ី ដែលមានទីតាំងផ្ទះលេខ៥៩Eo ផ្លូវលេខ១៤៨ភូមិ៨ សង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ។
ជនសង្ស័យត្រូវឃាត់ខ្លួន គឺ ឈ្មោះ សោម ពិទូ ភេទប្រុស អាយុ៣២ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅផ្ទះជួលផ្លូវលេខ៤៧ សង្កាត់ស្រះចក ខណ្ឌដូនពេញ រាជធានីភ្នំពេញ។
ជនរងគ្រោះ ឈ្មោះ ប៉ាល់ វិរៈ ភេទប្រុស អាយុ២៥ឆ្នាំ ជនជាតិខ្មែរ មុខរបរលក់ទូរស័ព្ទដៃ ស្នាក់នៅផ្ទះជួលលេខ៥៩Eo ផ្លូវ១៤៨ ភូមិ៨ សង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ។
ប្រភពព័ត៌មានដដែលបានបន្តទៀតថា ដំណើររឿងហេតុនោះ គឺកាលថ្ងៃទី០៦ ខែឧសភា ឆ្នាំ២០១៩វេលាម៉ោង១១និង៣០នាទី ជនរងគ្រោះឈ្មោះ បាល់ វិរៈ ភេទប្រុស អាយុ២៥ឆ្នាំ កំពុងតែអង្គុយលក់ដូរនៅក្នុងហាងលក់ទូរស័ព្ទដៃយីហោជីម៉ី ពេលនោះជនសង្ស័យ ឈ្មោះ សោម ពិទូ ភេទប្រុសអាយុ៣២ឆ្នាំ ក៏បានមកសួររកទិញទូរស័ព្ទដៃម៉ាកអាយហ្វូន7ផ្លើស ហើយប្រើល្បិចសុំទូរស័ព្ទដៃ ជនរងគ្រោះមើល គោលបំណងចង់ទិញ និងតថ្លៃ ពេលឃើញជនរងគ្រោះភ្លេចខ្លួន ស្រាប់តែជនសង្ស័យបានលួចយកទូរស័ព្ទដៃគេចខ្លួនបាត់តែម្តង។ បន្ទាប់ពីទទួលបានពាក្យបណ្តឹងពីជនរងគ្រោះ កម្លាំងនគរបាលប៉ុស្តិ៍រដ្ឋបាលផ្សារកណ្តាលទី១ ក៏បានធ្វើការស្រាវជ្រាវរហូតដល់ថ្ងៃទី០៨ ខែឧសភាឆ្នាំ២០១៩ វេលាម៉ោង០៣និង១៥នាទី ទើបឃាត់ខ្លួនជនសង្ស័យឈ្មោះ សោម ពិទូ បាននៅចំណុចមុខសណ្ឋាគារកាសា ផ្លូវលេខ៤៧ សង្កាត់វត្តភ្នំ ខណ្ឌដូនពេញ យកមកធ្វើការសាកសួរតែម្តង។
សម្ភារៈបាត់បង់ ទូរស័ព្ទដៃមួយគ្រឿងម៉ាកអាយហ្វូន7ផ្លើសផ្កាឈូក១គ្រឿង។ ចំពោះមុខ កម្លាំងខណ្ឌ ប៉ុស្តិ៍ កំពុងប្រើវិធានការជំនាញស្រាវជ្រាវរកបក្ខពួក និងសកម្មភាពបានប្រព្រឹត្តកន្លងមក និងបានកសាងសំណុំរឿងតាមនីតិវិធី៕
Source: Kampuchea Thmey Daily
0 Comments