ក្រុមមន្ត្រីបាននិយាយថា ការរញ្ជួយដីដ៏ខ្លាំងក្លាប៉ុន្តែមានជម្រៅជ្រៅកម្រិត៧.២រ៉ិចទ័របានធ្វើឲ្យរញ្ជួយប្រទេសប៉ាពួញូហ្គីណេនៅថ្ងៃអង្គារដោយបានកាត់ផ្តាច់អគ្គិសនីនិងបង្កការបំផ្លិចបំផ្លាញថ្វីបើមិនមានរបាយករណ៍ភ្លាមៗអំពីការខូចខាតធ្ងន់ធ្ងរក៏ដោយ។
យោងតាមក្រុមស្ទាបស្ទង់ភូគព្ភសាស្ត្រសហរដ្ឋអាមេរិកបានឲ្យដឹងថា ការរញ្ជួយនេះបានកើតឡើងនៅជម្រៅ១២៧គីឡូម៉ែត្រចម្ងាយប្រហែល៣០គីឡូម៉ែត្រពីទីប្រជុំជន Bulolo ហើយរង្គើដល់រដ្ឋធានី Port Moresby ដែលមានចម្ងាយប្រហែលជា២៥០គីឡូម៉ែត្រពីទីនោះ។
ក្រុមមន្ត្រីបាននិយាយថា មិនមានរបាយការណ៍ភ្លាមៗអំពីការខូចខាតធំដុំទេហើយជម្រៅនៃការរញ្ជួយនេះមានន័យថា គ្មានការគំរាមកំហែងពីរលកយក្សស៊ូណាមិឡើយ។មេបញ្ជាការប៉ូលិសក្រុង Bulolo លោក Leo Kaikas បានប្រាប់ AFP ថា “យើងមិនទាន់មានសេចក្ដីរាយការណ៍នៅឡើយទេ”។ លោកបន្តថា “យើងនៅតែកំពុងវាយតម្លៃអំពីស្ថានការណ៍នេះ”។
យោងតាមទិន្នន័យរបស់អង្គការសហប្រជាជាតិបានបង្ហាញថា មានមនុស្សប្រហែល១១០,០០០នាក់រស់នៅក្នុងចម្ងាយ៥០គីឡូម៉ែត្រនៃចំណុចកណ្តាលនៃការរញ្ជួយ។ការិយាល័យគ្រប់គ្រងគ្រោះមហន្តរាយជាតិដែលមានមូលដ្ឋាននៅទីក្រុង Moresby បាននិយាយថា ខណៈពេលដែលមិនមានរបាយការណ៍ពីការខូចខាតដំបូងនោះប៉ុន្តែព័ត៌មានពីតំបន់រញ្ជួយអាចត្រូវការពេលវេលាដើម្បីទទួលបាន។
អ្នកនាំពាក្យម្នាក់បានប្រាប់ AFP ថា “យើងកំពុងរង់ចាំការវាយតម្លៃ”។គួរបញ្ជាក់ថា តំបន់ខ្ពង់រាបរបស់ប្រទេសនេះត្រូវបានវាយប្រហារដោយការរញ្ជួយដីកម្រិត៧.៥រ៉ិចទ័រកាលពីខែកុម្ភៈឆ្នាំមុនដែលបានកប់ផ្ទះសម្បែងនិងបង្កឲ្យមានការបាក់ដីដែលសម្លាប់មនុស្សយ៉ាងតិច១២៥នាក់។ ទំហំនៃគ្រោះមហន្តរាយនោះមិនត្រូវបានបង្ហាញច្បាស់លាស់ទេក្នុងរយៈពេលប៉ុន្មានថ្ងៃដោយសារតែទំនាក់ទំនងនិងហេដ្ឋារចនាសម្ព័ន្ធអន់ខ្សោយរបស់ប៉ាពួញូហ្គីណេ៕ AFP
Source: Kampuchea Thmey Daily
0 Comments