ភ្នំពេញ ៖ សមត្ថកិច្ចបានចាប់ខ្លួនបុរសម្នាក់ ជាបុគ្គលិកបម្រើការងារនៅក្រុមហ៊ុនឯកជនមួយតាមបណ្តឹងចោទរបស់តំណាងថៅកែក្រុមហ៊ុន ពីបទរំលោភទំនុកចិត្ត ប្រើល្បិចលួចយកលុយអស់ជិត២ម៉ឺនដុល្លារ នៅថ្ងៃ ទី៦ ខែឧសភា ឆ្នាំ២០១៩ ដោយប្រាប់ថា លុយទាំងនោះបាត់ដោយសារចោរមកប្លន់ ប៉ុន្តែថៅកែមិនជឿ។
ជនសង្ស័យ ឈ្មោះ ដឹក ទីន ភេទប្រុស អាយុ២៨ឆ្នាំ មានទីលំនៅក្នុងបុរីពិភពថ្មី ភូមិក្រាំងអង្ក្រង សង្កាត់ក្រាំធ្នង់ ខណ្ឌសែនសុខ មានមុខរបរបម្រើការងារជាបុគ្គលិកក្រុមហ៊ុន អាយប៊ីស៊ី មានទីតាំងនៅសង្កាត់ក្រាំងធ្នង់។ ជននេះ ជាជនដែលត្រូវបានចាប់ខ្លួនពីបទ សង្ស័យឆបោក(រំលោភទំនុកចិត្ត) ធ្វើឲ្យបាត់លុយរាប់ម៉ឺនដុល្លារខាងលើ។
លោក លី ជូងី អាយុ៣១ឆ្នាំ មុខរបរប្រធានរដ្ឋបាលក្រុមហ៊ុនអាយប៊ីស៊ី ដែលជាអ្នកដើមចោទ បាននិយាយប្រាប់សមត្ថកិច្ចថា កាលពីថ្ងៃទី០១ ខែឧសភា គាត់បានជាប់រវល់ទៅដើរលេងលំហែកាយនៅប្រទេសថៃ ដោយឲ្យឈ្មោះ ដឹក ទីន មើលការងារខុសត្រូវប្រមូលលុយជំនួសមួយរយៈខ្លី លុះពេលត្រឡប់មកវិញនៅថ្ងៃទី០៤ឧសភា ដដែល ក៏ស្រាប់តែ ជននេះប្រាប់ថា បាត់លុយអស់ចំនួន
១៦.៨០០ដុល្លារ ដោយសារចោរប្លន់។
លោក លី ជូងី បានបញ្ជាក់ថា លោកមិនជឿលើករណីចោរប្លន់នេះទេ ពីព្រោះតែលោកបានបើកកាមេរ៉ាសុវត្ថិភាពនៅមុខក្រុមហ៊ុនមើលឃើញមានភាពមិនប្រក្រតី ដូច្នេះវាអាចជាការមិនពិត ជាការសំដែង ទើបលោកប្តឹងឲ្យសមត្ថកិច្ចឃាត់ខ្លួនសិនដើម្បីធ្វើការស្រាវជ្រាវបន្ត៕
Source: Kampuchea Thmey Daily
0 Comments