កំពត ៖ បុរសម្នាក់ បានរងរបួសយ៉ាងដំណំ ដោយសារគ្រោះថ្នាក់ចរាចរណ៍ ជិះម៉ូតូលឿនពេក ជ្រុលទៅបុកឆ្កែមួយក្បាលនៅលើកំណាត់ផ្លូវលំ បណ្តាលឲ្យឆ្កែនោះងាប់ ចំណែកភាគីខាងម៉ូតូរងរបួសធ្ងន់ ត្រូវបានគេដឹកយកទៅសង្គ្រោះនៅឯមន្ទីរពេទ្យបង្អែកស្រុកកំពង់ត្រាច។
ហេតុការណ៍ខាងលើនេះ បានកើតឡើងនៅវេលាម៉ោង ៦និង៤៥នាទីព្រលប់ ថ្ងៃទី០៨ ខែឧសភា ឆ្នាំ២០១៩ ត្រង់ចំណុចផ្លូវលំ ស្ថិតក្នុងភូមិដាសស្គរ ឃុំបឹងសាលាខាងជើង ស្រុកកំពង់ត្រាច ខេត្តកំពត។
តាមប្រភពព័ត៌មាននៅចំណុចកើតហេតុបាននិយាយថា មុនពេលកើតហេតុ គេឃើញជនរងគ្រោះជិះម៉ូតូម្នាក់ឯងម៉ាកC125 ពណ៌ខ្មៅ ស៊េរីឆ្នាំ២០១៩ តាមផ្លូវលំក្នុងទិសដៅពីកើតទៅលិច លុះមកដល់កន្លែងកើតហេតុក៏មានឆ្កែមួយក្បាលរត់ឆ្លងផ្លូវ គាប់ជួនម៉ូតូមកដល់គេចមិនទាន់ក៏បុកប្រាវ បណ្ដាលឲ្យឆ្កែប្រកាច់ងាប់ភ្លាមៗ ចំណែកអ្នកបើកម៉ូតូរងរបួសធ្ងន់ដេក សន្លប់ស្តូកនៅលើដងផ្លូវ។
ប្រភពដដែលបានឲ្យដឹងទៀតថា លុះបន្តិចក្រោយមក សមត្ថកិច្ចមូលដ្ឋាន ក៏បានទំនាក់ទំនងស្រាវជ្រាវរកសាច់ញាតិ ទើបដឹងថា បុរសរងគ្រោះ មានឈ្មោះ អ៊ុង ចន្ថា អាយុ៣១ឆ្នាំ មុខរបរជាគ្រូបង្រៀន រស់នៅភូមិភ្នមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប។ ជនរងគ្រោះជិះម៉ូតូម៉ាកឌ្រីមសង់ពណ៌ខ្មៅ ផលិតឆ្នាំ២០១៩ ពាក់ស្លាកលេខ កែប 1B-3454 ហើយករណីបែបនេះផ្តើមមកពីជនរងគ្រោះស្រវឹងស្រា ជិះម៉ូតូលឿនពេក ទើបជួបរឿងហេតុបែបនេះ។
បច្ចុប្បន្នម៉ូតូជនរងគ្រោះត្រូវបានសមត្ថកិច្ច យកទៅរក្សាទុក ដើម្បីរង់ចាំម្ចាស់យកទៅជួសជុលវិញ៕
Source: Kampuchea Thmey Daily
0 Comments