អ្នកប្រដាល់ជើងចាស់កម្ពុជាប៉ោ ភារិទ្ធ ឬយ៉េន ឌីណា ត្រូវគេផ្តល់ឱកាសឲ្យជួបប្រកួតសងសឹកអ្នកប្រដាល់ថៃ លំ ឡេង (Loom Leng) នៅលើសង្វៀន TV5 ព្រែកកំពឹស នាយប់ថ្ងៃសៅរ៍ ទី ១១ ខែឧសភា ឆ្នាំ២០១៩នេះ។ ពួកគេប្រកួតគ្នាក្នុងប្រភេទទម្ងន់៦៣,៥០០គីឡូក្រាម។
លំ ឡេង អ្នកប្រដាល់ថៃ ដែលមកជួបប៉ោ ភារិទ្ធ នេះ គេជាម្ចាស់ខ្សែក្រវាត់ខារ៉ាបាវទម្ងន់៦៣,៥០០ ហើយក៏ជាអ្នកប្រដាល់ជើងចាស់ ធ្លាប់មកប្រកួតនៅកម្ពុជាប្រមាណ១២លើកហើយកន្លងមក។ ក្នុងនោះ ធ្លាប់ឈ្នះប៉ោ ភារិទ្ធ ដោយពិន្ទុ កាលពីជួបគ្នាថ្ងៃទី៣១ ខែមីនា ឆ្នាំ២០១៧កន្លងទៅ។
អ្នកប្រដាល់ជើងខ្លាំងរបស់ថៃរូបនេះ ដែលមិនងាយមាននរណាវាយឈ្នះគេទេ។ គេប្រកួតមានប្លង់តាមលក្ខណៈបច្ចេកទេស ទាំងកណ្តាប់ដៃ ទាំងជើងទាត់ ជង្គង់កែង គឺមានកំប្លេតែម្តង។ លំ ឡេង ធ្លាប់មកប្រកួត និងធ្លាប់ឈ្នះ និងចាញ់អ្នកប្រដាល់កម្ពុជាច្រើននាក់ ហើយកន្លងមក។ អ្នកប្រដាល់ថៃរូបនេះ មានកំណត់ត្រាប្រកួតចំនួន៧៩លើក ឈ្នះ៦៦លើកចាញ់១២លើក និងស្មើ០២លើក។ ឯ នៅស្រុកថៃគេក៏ជាអ្នកប្រដាល់ជើងខ្លាំងជើងចាស់ដែរ ក្នុងប្រភេទទម្ងន់៦៣,៥០០ គ.ក្រនេះ។ អ្នកប្រដាល់ថៃរូបនេះ គេវាយខ្លាំង និងល្អ។
ទោះជាយ៉ាងណា អ្នកប្រដាល់ថៃរូបនេះ មិនប្រាកដថា អាចឈ្នះប៉ោ ភារិទ្ធបាននោះឡើយ ហើយប៉ោ ភារិទ្ធ ក៏មិនដឹងថាអាចយកឈ្នះលំ ឡេងនេះ បានឬអត់នោះដែរ ? ព្រោះប៉ោ ភារិទ្ធ មួយរយៈពេលប្រហែល១ឆ្នាំចុងក្រោយនេះ គេបានឃ្លាតចោលសង្វៀនប្រដាល់ហើយមុនបាត់មុខនេះសោតទៀត ភារិទ្ធ ក៏ស្រុតធ្លាក់ចុះខ្សោយជាងមុនច្រើនដែរ។
ប៉ោ ភារិទ្ធ ពីមុនជាជើងខ្លាំងរបស់កម្ពុជាក្នុងប្រភេទទម្ងន់៦៣,៥០០គីឡូក្រាមនេះ។ គេមានបទពិសោធន៍ច្រើនក្នុងការប្រកួត ដោយគេវាយជាមួយថៃដូចវាយជាមួយខ្មែរគ្នាឯងអីចឹង គឺគ្មានញញើតខ្លាចអ្វីបន្តិចទេ។ ភារិទ្ធ មានកណ្ដាប់ដៃល្អ វាយចេញចូលរហ័ស ហើយស្នៀតទាត់ និងជង្គង់ កែង ក៏ល្អថែមទៀត ប៉ុន្តែមួយរយៈចុងក្រោយនេះ គេចុះខ្សោយដោយវាយចាញ់ថៃជាបន្តបន្ទាប់។
លំ ឡេង អ្នកប្រដាល់ថៃរូបនេះ មានកម្ពស់ស្មើគ្នាជាមួយប៉ោ ភារិទ្ធបន្តិច គឺ១,៦៧ម៉ែត្រដូចគ្នា ហើយប្រវត្តិប្រកួតរបស់ប៉ោ ភារិទ្ធ ក៏ប្រហាក់ប្រហែលថៃដែរ គឺចំនួន៧៨លើក ឈ្នះ៦២លើក ចាញ់១២លើក និង ស្មើ០៤លើក។ចាំមើល ប៉ោ ភារិទ្ធ គេអាចយកឈ្នះលំ ឡេង សងសឹកឲ្យមិត្តរួមជាតិនិងខ្លួនឯងបានឬអត់?។
គួរបញ្ជាក់ថា លំ ឡេង កាលពីថ្ងៃទី២០ ខែមេសា ឆ្នាំ២០១៩ គេបានផ្តួលអ្នកប្រដាល់កម្ពុជា សេង ស្រឿន ក្លិបមហិទ្ធរិទ្ធមេសរថ្ងកខេត្តស្វាយរៀងក្នុងទឹកទី៤៕
Source: Kampuchea Thmey Daily
0 Comments