រុស្ស៊ី​ បើក​ការស៊ើបអង្កេត​អំពី​កំហុសឆ្គង ​បន្ទាប់ពី​ហេតុការណ៍​ផ្ទុះ​យន្តហោះ

ប្រព័ន្ធ​ផ្សព្វ​ផ្សាយ បាន​រាយការណ៍​ថា ក្រុម​អ្នកស៊ើប​អង្កេត​រុស្ស៊ី​កំពុង​ពិចារណា​លើ​កំហុសឆ្គង​របស់​ភី​ឡុ​ត​ថា​ជា​មូលហេតុ​នៃ​ការឆេះ​យន្តហោះ​នៅ​អាកាសយានដ្ឋាន​ដ៏​មមាញឹក​បំផុត​របស់​ទីក្រុង​មូ​ស្គូ​ដែល​បានសម្លាប់​មនុស្ស​ចំនួន​៤១​នាក់​។​

អាកាសយានដ្ឋាន​បាន​និយាយ​កាលពី​ថ្ងៃ​អង្គា​រថា រថយន្ត​ពន្លត់​អគ្គិភ័យ​ដំបូងបង្អស់​បានមក​ដល់​កន្លែងកើតហេតុ​ត្រឹមតែ​ពីរ​នាទី​ប៉ុណ្ណោះ​បន្ទាប់ពី​យន្តហោះ​នេះ​បាន​ចុះចត​និង​ឆាបឆេះ​។​

បណ្តាញ​ទូរទស្សន៍​រុស្ស៊ី Ren TV បាន​បង្ហោះ​នូវ​អ្វីដែល​ខ្លួន​និយាយថា គឺជា​ការសន្ទនា​រវាង​អាកាសយានិក​និង​អ្នកត្រួតពិនិត្យ​ចរាចរណ៍​ផ្លូវអាកាស​ដែល​បង្ហាញថា ភី​ឡុ​ត​នៅតែ​ស្ងប់ស្ងាត់​នៅពេលដែល​គាត់​បានស្នើ​សុំ​ការ​ចុះចត​ជាបន្ទាន់​និង​មិនបាន​វាយតម្លៃ​ស្ថានភាព​នេះ​ថា​ជា​ស្ថានភាព​សំខាន់​ទេ​។​

យន្តហោះ Sukhoi Superjet-100 កាលពី​ល្ងាច​ថ្ងៃអាទិត្យ ទើបតែ​ហោះ​ចេញពី​អាកាសយានដ្ឋាន Sheremetyevo នៅពេល​វា​បញ្ជូន​សញ្ញា​អាសន្ន​និង​បក​ក្រោយ​ត្រលប់​មកវិញហើយ​ឆេះ​លើផ្លូវ​រត់​។​

ប្រភព​ក្នុងការ​ស៊ើបអង្កេត​បាន​ប្រាប់​សារព័ត៌មាន Kommersant ថា អ្នកបើក​យន្តហោះ​របស់​ក្រុមហ៊ុន Aeroflot បាន​បង្កកំហុស​មួយចំនួន​រួមទាំង​ការហោះហើរ​ចូលទៅក្នុង​ព្យុះ​ហើយ​ចុះចត​ដោយមាន​ប្រេង​ពេញ​ធុង​ជាជាង​ការហោះ​ឆ្វែល​សិន​ដើម្បី​កាត់បន្ថយ​ប្រេង​ផងដែរ​។​

ប្រភព​ជាច្រើន​បាន​និយាយប្រាប់​សារព័ត៌មាន RBK ថា អាកាសយានិក​បាន​បើក​បង្អួច​កាប៊ីន​ដែលជា​ហេតុ​បញ្ឆេះ​ឲ្យ​ភ្លើង​រាលដាល​ហើយ​មិនបាន​ពន្លត់​ម៉ាស៊ីន​ភ្លាមៗ​ទេ​បន្ទាប់ពី​ចុះចត​។​

ទោះបីជា​យ៉ាងណាក៏ដោយ ក្រុម​អ្នកស៊ើប​អង្កេត​នៅតែ​កំពុង​ពិនិត្យ​ប្រអប់​ខ្មៅ​ពី​យន្ដហោះ​ហើយ​រហូតមក​ទល់​ពេលនេះ​មិនបាន​ផ្តល់​ហេតុផល​ជា​ផ្លូវការ​ណាមួយ​សម្រាប់​គ្រោះថ្នាក់​នេះ​ទេ​។​

អ្នកបើក​យន្តហោះ​ឈ្មោះ Denis Yevdokimov បាន​ប្រាប់​ប្រព័ន្ធ​ផ្សព្វផ្សាយ​ថា រន្ទះបាញ់​ដែល​វាយប្រហារ​ភ្លាមៗ​បន្ទាប់ពី​ការហោះហើរ​បាន​បណ្តាល​ឲ្យ​យន្តហោះ​បាត់​ការទាក់ទង​និង​បង្ខំ​ចុះចត​ជាបន្ទាន់​។​

នៅក្នុង​ឯកសារ​នៃ​ទំនាក់ទំនង​របស់គាត់​ជាមួយ​អ្នកត្រួតពិនិត្យ​ចរាចរណ៍​ផ្លូវអាកាស​, លោក Yevdokimov បាន​និយាយថា “​យើង​ស្នើសុំ​វិល​ត្រលប់​ទៅវិញ​ដោយសារតែ​ការបាត់បង់​ទំនាក់ទំនង​តាម​វិទ្យុ​”​។ គាត់​បាន​និយាយថា យន្ដហោះ​នេះ​ត្រូវបាន​វាយប្រហារ​ដោយ​រន្ទះ​។​

គាត់​បាន​បន្ថែមថា ប្រព័ន្ធគ្រប់គ្រង​ការហោះហើរ​ស្វ័យប្រវត្តិ​របស់​យន្តហោះ​នេះ​គឺ​មិន​ដំណើរការ​ទេ​។ គាត់​បាន​បញ្ជាក់ថា គាត់​នឹង​ចុះចត​ដោយ​ប្រើតែ​ឧបករណ៍​ប៉ុណ្ណោះ​ហើយ​បាន​ប្រាប់​អ្នកត្រួតពិនិត្យ​ចរាចរណ៍​អាកាស​ថា គាត់​ត្រូវការ​ជំនួយ​៕ AFP

​

Source: Kampuchea Thmey Daily