កាសែត Wall Street បានរាយការណ៍កាលពីថ្ងៃច័ន្ទថា ក្រុមហ៊ុន Alphabet Incរបស់ Google ត្រៀមនឹងដាក់ចេញនូវមុខងារថ្មីមួយនៅលើ Browser Chrome ដើម្បីឱ្យអ្នកប្រើប្រាស់អាចទប់ស្កាត់ការតាមដាន Cookies លើ Browser របស់ពួកគេ។
Cookies គឺជាសំណុំអក្សរតូចៗដែលតាមដានអ្នកប្រើប្រាស់អ៊ីនធើណិតនិងត្រូវបានប្រើដោយក្រុមអ្នកផ្សាយពាណិជ្ជកម្មដើម្បីកំណត់គោលដៅអតិថិជនរបស់ខ្លួនជុំវិញចំណង់ចំណូលចិត្តដែលអ្នកប្រើប្រាស់ទាំងនោះបង្ហាញឡើងពេលកំពុងស្វែងរកអ្វីមួយលើអ៊ីនធើណិត។
យោងតាមក្រុមហ៊ុនស្រាវជ្រាវeMarketerបានឱ្យដឹងថាអ្នកប្រើប្រាស់ប្រមាណ៣ពាន់លាននាក់របស់ Google បានជួយឱ្យក្រុមហ៊ុនរុករកលើអ៊ីនធើណិតមួយនេះក្លាយជាអ្នកលក់ពាណិជ្ជកម្មលើអ៊ីនធើណិតធំបំផុតរបស់ពិភពលោក ដោយទាញបាន១ភាគ៣នៃប្រាក់ចំណូលសរុប នាំមុខ Facebook Inc ដែលជាដៃគូប្រជែងដល់ទៅ២០%។
eMarketerក៏បានទស្សន៍ទាយផងដែរថា ការចំណាយលើការផ្សាយពាណិជ្ជកម្មលើឌីជីថលសរុបក្នុងសហរដ្ឋអាមេរិកនឹងកើនឡើង១៩% គឺជិត១៣០ពាន់លានដុល្លារក្នុងឆ្នាំ២០១៩នេះ។
មែនទែនទៅ Google បានធ្វើការលើគម្រោង Cookies នេះហោចណាស់ក៏៦ឆ្នាំហើយដែរប៉ុន្តែក៏បានបង្កើនសន្ទុះឡើងវិញបន្ទាប់ពីមានករណីផ្ទុះឡើងថាព័ត៌មានឯកជនរបស់អ្នកប្រើប្រាស់ Facebook ជាច្រើននាក់ត្រូវបានបែកធ្លាយនិងចែកចាយទៅកាន់ក្រុមហ៊ុន Cambridge Analytica កាលពីឆ្នាំទៅ។
គួរបញ្ជាក់ថាក្រុមហ៊ុន Apple Incបានបញ្ឈប់ការតាមដាន Cookies របស់អ្នកប្រើប្រាស់នៅលើកម្មវិធីរុករក Safari ក្នុងឆ្នាំ២០១៧ចំណែកក្រុមហ៊ុន Mozilla Corp's Firefox ក៏បានធ្វើដូចគ្នាដែរក្នុងឆ្នាំ២០១៨៕ REUTERS
Source: Kampuchea Thmey Daily
0 Comments