ក្រុមហ៊ុនដោះដូររូបិយប័ណ្ណឌីជីថលធំបំផុតរបស់ពិភពលោកBinanceបានឱ្យដឹងកាលពីថ្ងៃពុធថាពួកក្រុម Hacker បានលួចយកកាក់ Bitcoin តម្លៃ៤១លានដុល្លារពីក្រុមហ៊ុនទៅដែលនេះជាករណីចុងក្រោយបង្អស់នៃករណីចោរកម្មរូបិយប័ណ្ណឌីជីថលទូទាំងពិភពលោក។
យោងតាមការចុះផ្សាយនៅលើវិបសាយក្រុមហ៊ុនBinance ដោយនាយកប្រតិបត្តិលោក Zhao Changpeng ថា Bitcoinចំនួន៧ពាន់ត្រូវបានដកយកចេញដោយក្រុម Hacker ប្រើវិធីសាស្ត្រចម្រុះរួមទាំងការប្រើអ៊ីម៉េលស្ទូច (Phising) ធ្វើជាមេរោគនិងវិធីវាយប្រហារផ្សេងៗទៀត។
ការចុះផ្សាយនេះបានឱ្យដឹងបន្ថែមថាប្រាក់របស់អតិថិជនមិនមានការប៉ះពាល់អ្វីឡើយព្រោះខាងក្រុមហ៊ុននឹងប្រើមូលនិធិទ្រព្យសម្បត្តិដែលមានសុវត្ថិភាពបង្វិលជូនអតិថិជនវិញចំពោះការបាត់បង់នេះ។តម្លៃ Bitcoin បានធ្លាក់ចុះដល់ ៤,២% ក្នុងទីផ្សារអាស៊ីស្របពេលដែលមានព័ត៌មានលេចឮពីការវាយប្រហាររបស់ក្រុម Hacker នេះ។
ការស្រាវជ្រាវពីក្រុមហ៊ុនសន្តិសុខបច្ចេកវិទ្យាទូរគមនាគមន៍ដែលមានមូលដ្ឋាននៅសហរដ្ឋអាមេរិកបានបង្ហាញថាកាលពីឆ្នាំមុនរូបិយប័ណ្ណឌីជីថលប្រមាណ៩៥០លានដុល្លារក៏ត្រូវបានលួចចេញពីក្រុមហ៊ុនដោះដូរនិងក្រុមហ៊ុនសេវាកម្មហេដ្ឋារចនាសម្ព័ន្ធជាច្រើនដូចជា Walletsជាដើមដែលជាតួលេខកើនឡើងជិត២៦០% ធៀបជាមួយឆ្នាំកន្លងទៅ៕ REUTERS
Source: Kampuchea Thmey Daily
0 Comments