ក្រុមបាល់ទាត់សូលទីឡូអង្គរ ត្រូវទទួលក្រុមក្រសួងការពារជាតិ (ទ័ព) ខណៈក្រុមអគ្គស្នងការដ្ឋាននគរបាលជាតិ (ប៉ូលីស) ត្រូវជួបក្រុមគីរីវង់សុខសែនជ័យ និងក្រុមបាល់ទាត់វិសាខា ទទួលក្រុមខេត្តកំពង់ចាម ប្រចាំសប្ដាហ៍ទី៥ នៃពានរង្វាន់លីគកំពូលកម្ពុជាឆ្នាំ២០១៩ (Metfone Cambodian League 2019) នៅល្ងាចថ្ងៃសៅរ៍ ទី៤ ខែឧសភា ឆ្នាំ២០១៩។
*សូលទីឡូអង្គរ ទទួលក្រសួងការពារជាតិ
ក្រុមបាល់ទាត់សូលទីឡូអង្គរ ត្រូវទទួលក្រុមក្រសួងការពារជាតិ នៅវេលាម៉ោង៣និង៣០នាទីរសៀល លើទីលានកីឡដ្ឋានខេត្តសៀមរាប ហើយប្រកួតនេះមានផ្សាយផ្ទាល់តាមប៉ុស្តិ៍ BTV News ផងដែរ។ ក្រុមទាំង២ធ្លាប់ប៉ះគ្នាតែចំនួន២លើកនោះទេដោយសារក្រុមសូលទីឡូអង្គរ ទើបបានឡើងមកលេងលីគកំពូលកម្ពុជា កាលពីរដូវកាលមុនប៉ុណ្ណោះ។ ប្រកួតជើងទី១នៅឆ្នាំ២០១៨ ទ័ព ឈ្នះសូលទីឡូអង្គរ ៣ទល់១ និងជើងទី២ក្រុមទាំង២ស្មើគ្នា២ទល់២។
ក្រុមសូលទីឡូអង្គរ កំពុងតែស្ថិតនៅដុនដាបនៅឡើយដែរ ព្រោះថាទើបតែមាន២ពិន្ទុកាន់ប៉ុណ្ណោះ ខណៈក្រុមនេះបានប្តូរផ្លាស់តំណែងគ្រូបង្វឹកតែប៉ុន្មានថ្ងៃមុនរដូវកាលចាប់ផ្តើមប៉ុណ្ណោះ។
លោក ភា សុភត្រា គ្រូបង្វឹករបស់ក្រុមក្រសួងការពារជាតិ កំពុងតែរៀបចំកូនក្រុមឡើងវិញបន្ទាប់ពីបរាជ័យដោយថ្វីជើងក្រុមជើងឯក៣សម័យកាលបឹងកេត កាលពីពេលថ្មីៗ។ ខ្សែប្រយុទ្ធជនជាតិDzarma Bata កំពុងតែឈរឈ្មោះក្នុងបញ្ជីកីឡាកររកគ្រាប់បាល់ចូលទីគូប្រកួតបានច្រើនជាងគេ ក្រោយបំប៉ោងសំណាញ់ទីឲ្យក្រសួងការពារជាតិ បានរហូតដល់៩គ្រាប់ម្នាក់ឯង។
*ប៉ូលីស ជួបគីរីវង់សុខសែនជ័យ
ក្រុមអគ្គស្នងការដ្ឋាននគរបាលជាតិ ត្រូវជួបក្រុមគីរីវង់សុខសែនជ័យ នៅវេលាម៉ោង៣និង៣០នាទីរសៀល លើទីលានកីឡដ្ឋានអគ្គីសនីកម្ពុជា ក្នុងរាជធានីភ្នំពេញ ប្រកួតនេះមានផ្សាយផ្ទាល់តាមហ្វេសប៊ុករបស់កម្ពុជាថ្មីផងដែរ។ ជំនួបចុងក្រោយក្នុងលីគកំពូលកម្ពុជាកាលពីឆ្នាំ២០១៧ ក្រុមប៉ូលីស បានយកឈ្នះគីរីវង់សុខសែនជ័យ ២ទល់១។
ក្រុមអគ្គស្នងការដ្ឋាននគរបាលជាតិ ក្រោមការដឹកនាំពីសំណាក់លោក ប្រាក់ សុវណ្ណារ៉ា អតីតគ្រូបង្វឹកក្រុមជម្រើសជាតិកម្ពុជា ដែលកំពុងតែកាន់អាជ្ញាប័ណ្ណ Pro License។ យ៉ាងណាក្តីក្រុមនេះនៅតំបន់បាតតារាងនៅឡើយនោះទេ ក្រោយប្រកួតឈ្នះតែ១លើក ស្មើគ្នាបាន១លើកនិងចាញ់រហូតដល់៣លើក។ ចំណែកក្រុមគីរីវង់សុខសែនជ័យ វិញ នៅរដូវកាលនេះបានយកគ្រូបង្វឹកជនជាតិថៃ Ekapob Potisai មកដឹកនាំក្រុមខណៈក្រុមនេះរកបានពិន្ទុតាំងពីប្រកួតបើកឆាកម្តងតែប៉ុណ្ណោះ ហើយ៤ប្រកួតចុងក្រោយបរាជ័យទាំងអស់។ កីឡាករជនជាតិម៉ាលី Souleymane Coulibaly ជាខ្សែប្រយុទ្ធគួរឲ្យចាប់អារម្មណ៍នៅក្នុងក្រុម។
*វិសាខា ទទួលខេត្តកំពង់ចាម
ក្រុមវិសាខា ត្រូវទទួលក្រុមខេត្តកំពង់ចាម នៅវេលាម៉ោង៦ល្ងាចលើទីលានកីឡដ្ឋានវិសាខា ក្នុងរាជធានីភ្នំពេញ ហើយប្រកួតនេះមានផ្សាយផ្ទាល់តាមហ្វេសប៊ុករបស់ CNCC ផងដែរ។ ក្រុមទាំង២មិនធ្លាប់មានប្រវត្តិប៉ះគ្នាពីមុនមកនោះទេ ព្រោះវិសាខាទើបបានឡើងមកលេងលីគកំពូលកម្ពុជាកាលពីឆ្នាំ២០១៨ ហើយក្រុមខេត្តកំពង់ចាម ទើបបានឡើងមកលេងលីគកំពូលកម្ពុជា នៅឆ្នាំ២០១៩នេះ។
ក្រុមវិសាខា ជាក្រុមបេក្ខភាពមួយមិនអាចមើលរំលងក្នុងការប្រជែងយកពាននៅឆ្នាំនេះ។ លោក ហុក សុជីវ័ន្ត ដែលជាគ្រូបង្វឹកក្រុមវិសាខា បានត្រឹមខកចិត្តកាលពីប្រកួតចុងក្រោយថ្មីៗនេះក្រោយចាញ់ក្រុមម្ចាស់ផ្ទះអង្គរថាយហ្គឺរ ២ទល់១។ ចំណែកក្រុមខេត្តកំពង់ចាម វិញ ឆ្លងកាត់តែ៥ប្រកួតដើមរដូវកាលតែរបួតគ្រាប់បាល់រហូតដល់៣២គ្រាប់ ស្របពេលលោក ថុល កុសល នៅមានឆន្ទៈបន្តដឹកនាំកូនក្រុមរក្សាកៅអីឲ្យបានក្នុងលីគកំពូលកម្ពុជាជាបន្ត។ កីឡាករ សារី តៃម៉ូ ជាខ្សែប្រយុទ្ធតែម្នាក់គត់ដែលរកគ្រាប់បាល់បាន១គ្រាប់ឱ្យក្រុម ក្នុងប្រកួតកន្លងមក។
ចំណែក៤គូផ្សេងនៅសប្ដាហ៍ទី៦នេះគឺត្រូវប្រកួតនៅថ្ងៃអាទិត្យ ទី៥ខែឧសភា ឆ្នាំ២០១៩ ម្តងដោយក្រុមអាស៊ីអឺរ៉ុប ទទួលក្រុមអគ្គីសនីកម្ពុជា នៅវេលាម៉ោង៣និង៣០នាទីរសៀលលើទីលាន AEU Sport Park ហើយក្រុមណាហ្គាវើល ទទួលក្រុមភ្នំពេញក្រោន នៅវេលាម៉ោង៦ល្ងាចលើទីលានស្តាតចាស់ ខណៈក្រុមយុវជនសាលាបាល់ទាត់ជាតិបាទី ប៉ះក្រុមបឹងកេត នៅវេលាម៉ោង៣និង៣០នាទីរសៀល លើទីលានសាលាបាល់ទាត់ជាតិ ក្នុងស្រុកបាទី ខេត្តតាកែវ និងចុងក្រោយក្រុមព្រះខ័នរាជស្វាយរៀង ទទួលក្រុមអង្គរថាយហ្គឺរ នៅវេលាម៉ោង៦ល្ងាចលើទីលានកីឡដ្ឋានខេត្តស្វាយរៀង៕
Source: Kampuchea Thmey Daily
0 Comments