ភ្នំពេញ ៖ បុរសក្មេងៗចំនួនពីរនាក់ ត្រូវបានសមត្ថកិច្ចនគរបាលខណ្ឌសែនសុខចាប់ខ្លួនពីបទជាប់ពាក់ព័ន្ធទិញ និងប្រើប្រាស់គ្រឿងញៀន កាលពីម៉ោងពីទៀបភ្លឺឈានចូលថ្ងៃទី៣១ ខែធ្នូ ឆ្នាំ២០១៤ នៅតាមបណ្តោយផ្លូវសហព័ន្ធរុស្សី ស្ថិតក្នុងភូមិសេប៉េសេ សង្កាត់ទឹកថ្លាខណ្ឌសែនសុខ។
មន្ត្រីនគរបាលមូលដ្ឋានប៉ុស្តិ៍ទឹកថ្លាបានឲ្យដឹងថា ការឃាត់ខ្លួនជនជាប់ចោទទាំងពីរធ្វើឡើងខណៈពេលដែលកម្លាំងយាមល្បាតបានប្រទះឃើញពួកគេជិះម៉ូតចូលក្នុងភូមិត្រពាំងឈូក រួចចេញមកវិញដោយមានការសង្ស័យក៏បោះដៃតាមវិទ្យុទាក់ទងឲ្យកម្លាំងផ្សេងៗទៀតត្រៀមស្ទាក់ឃាត់សួរនាំ និងឆែកឆេររកឃើញថ្នាំមួយកញ្ចប់តូចនៅក្នុងហោប៉ៅរបស់ពួកគេ ទើបចាប់ឃាត់ខ្លួនបញ្ជូនទៅទីស្នាក់ការប៉ុស្តិ៍តែម្តង ដើម្បីសួរនាំ។ តាមចម្លើយសារភាពរបស់ពួកគេបានបញ្ជាក់ថា ថ្នាំញៀនមួយកញ្ចប់នេះបានទិញតម្លៃ៣០.០០០រៀលពីមនុស្សប្រុសម្នាក់មិនស្គាល់ឈ្មោះ។
ជនជាប់ចោទបានប្រាប់ថា ពួកគេទាំងពីរនាក់ ឈ្មោះ កយ សារ៉ាត់ អាយុ១៨ឆ្នាំ មានទីលំនៅក្នុងសង្កាត់កាកាប ខណ្ឌពោធិសែនជ័យ និងមានមុខរបរជាអ្នកហៅភ្ញៀវប្រចាំហាងខារ៉ាអូខេ ពិភពតារា នៅផ្លូវ២០០៤។ និងម្នាក់ទៀតឈ្មោះ លេង ពេជ្រ អាយុ១៩ឆ្នាំ ទីលំនៅនិងមុខរបរដូចគ្នា។
ជនជាប់ចោទទាំងពីរនាក់ ត្រូវបានបញ្ជូនទៅឃុំខ្លួននៅអធិការដ្ឋាននគរបាលខណ្ឌសែនសុខបន្តដើម្បីត្រៀមបញ្ជូនទៅតុលាការវិនិច្ឆ័យទោស៕
សឿន
0 Comments