បាត់ដំបង ៖ យុវជនម្នាក់ ត្រូវបានសមត្ថកិច្ចដឹកបញ្ជូនទៅមន្ទីរពេទ្យភ្លាមៗ ដើម្បីសង្គ្រោះដោយស្ថិត
នៅក្នុងស្ថានភាពដ៏ធ្ងន់ធ្ងរ បន្ទាប់ពីយុវជនរូបនេះបានបើកបរម៉ូតូដែលគ្មានប្រើប្រាស់ហ្វ្រាំង ហើយបានទៅបុកនឹងគូទរថយន្តពីក្រោយ កាលពីថ្ងៃទី១៦ ខែមករា ឆ្នាំ២០១៥ វេលាម៉ោង៥និង៣០នាទីស្ថិតនៅតាមបណ្តោយផ្លូវជាតិលេខ៥ ត្រង់ចំណុចភូមិអន្លង់វិល ឃុំអន្លង់វិល ស្រុកសង្កែ ខេត្តបាត់ដំបង។ យោងតាមប្រភពមួយចំនួនបាននិយាយថា ដំបូងគេឃើញមានម៉ូតូមួយគ្រឿងម៉ាកសង់
កូរេពណ៌ក្រហម គ្មានស្លាកលេខ ដែលបើកបរយ៉ាងលឿនដោយយុវជនម្នាក់ក្នុងទិសដៅពីលិចទៅកើត ព្រមទាំងមានរថយន្តមួយគ្រឿងទៀតបើកស្របគ្នានៅពីមុខផងដែរ។
ប្រភពបានបន្តទៀតថា រថយន្តដែលបើកបរនៅពីមុខនោះម៉ាកកាម៉ាស់ ពាក់ស្លាកលេខក0485ភព6 ដែលជារថយន្តដឹកស្រាបៀ លុះទៅដល់ចំណុចកើតហេតុ ស្រាប់តែរថយន្តនោះបានឈប់សំចតភ្លាមៗតែម្តង ទើបធ្វើឲ្យម៉ូតូដែលកំពុងបើកយ៉ាងលឿននៅពីក្រោយបានជ្រុលទៅបុកនឹងគូទរថយន្តយ៉ាងពេញទំហឹង បណ្ដាលឲ្យអ្នកបើកបរម៉ូតូផ្លោងបោកក្បាលទៅនឹងរថយន្តបែកឈាមនិងសន្លប់ស្តូកស្តឹងនៅពីក្រោយរថយន្តនោះតែម្តង។
ក្រោយពេលកើតហេតុភ្លាមៗ សមត្ថកិច្ចនៃអធិការដ្ឋាននគរបាលស្រុកសង្កែបានចុះទៅត្រួតពិនិត្យគឺសង្កេតឃើញថា អ្នកបើកបរម៉ូតូគឺជាកម្មករឡដុតនំបុ័ងនៅខាងក្រោយផ្សារថ្មីបាត់ដំបងហើយម៉ូតូសង់កូរ៉េដែលគេបានប្រើប្រាស់នោះគឺគ្មានហ្វ្រាំងទាំងអស់ ទោះបីជាហ្វ្រាំងដៃឬហ្វ្រាំងជើង
ក៏ដោយ ហើយម្យ៉ាងទៀតការបើកបររបស់គេក៏មានសភាពលឿនថែមទៀត ដែលមិនអាចទប់ជាប់
ពេលដែលជួបនឹងឧប្បត្តិហេតុអ្វីមួយ។ ដោយឡែកអ្នកបើកបររថយន្តពេលដែលឃើញសភាពមិនសូវល្អ ព្រោះជនរងគ្រោះកំពុងស្ថិតក្នុងដង្ហើមចង្រិតទៅហើយនោះ គេក៏បានគេចចេញពីកន្លែងកើតហេតុទៅបាត់តែម្តង។
បន្ទាប់ពីបានបញ្ជូនជនរងគ្រោះទៅកាន់មន្ទីរពេទ្យរួចមក សមត្ថកិច្ចបាននាំយកមធ្យោបាយ
ធ្វើដំណើរទាំងពីរគ្រឿងទៅរក្សាទុកនៅអធិការដ្ឋានដើម្បីរង់ចាំធ្វើការដោះស្រាយជាក្រោយ៕
សោ និយមរ័ត្ន
0 Comments