ព្រះសីហនុ ៖ កាលពីរសៀលថ្ងៃទី១៩ ខែមករា ឆ្នាំ២០១៥ លោក ឈិត សុខុន អភិបាលនៃគណៈអភិបាលខេត្តព្រះសីហនុ លោកជំទាវអភិបាលរងខេត្ត និងមន្ត្រីពាក់ព័ន្ធជាច្រើនទៀត បានចូលរួមពិនិត្យមើលការដ្ឋានចាក់អ៊ុតកៅស៊ូ ពង្រីកផ្លូវវិថី៧មករា ដែលមានទីតាំងស្ថិតនៅក្នុងសង្កាត់លេខ៤ ក្រុង ខេត្តព្រះសីហនុ។
លោក ឈិត សុខុន បានមានប្រសាសន៍ឲ្យដឹងថា ផ្លូវវិថី៧មករា ត្រូវធ្វើការពង្រីក ចាក់អ៊ុតកៅស៊ូដែលមានទទឹង១៥ម៉ែត្រ និងបណ្តោយ១.០០០ម៉ែត្រ ហើយមានផ្ទៃក្រឡាស្មើនឹង១៥.០០០ម៉ែត្រការ៉េ ដែលតភ្ជាប់ពីកែងស្តុបស្ថានីយប្រេងឥន្ធនៈតេលា (មន្ទីរពេទ្យចំការចេក) រហូតដល់ផ្លូវកែងនឹងស្ថានីយប្រេងឥន្ធនៈតូតាល់ ដែលត្រូវចំណាយថវិកាចំនួនជាង៣ពាន់លានរៀល ដែលជាថវិកាអភិវឌ្ឍន៍ខេត្តព្រះសីហនុ។
លោកបានបន្តថា ផ្លូវវិថី៧មករានេះស្ថាបនាតាមលក្ខណបច្ចេកទេសត្រឹមត្រូវ ធានាការប្រើប្រាស់បានយូរអង្វែងរហូតដល់១០ឆ្នាំ ដូច្នេះប្រជាពលរដ្ឋដែលមានទីលំនៅតាមបណ្តោយផ្លូវនេះ ចូលរួមថែរក្សា និងរក្សាអនាម័យបរិស្ថានឲ្យបានល្អ ព្រោះផ្លូវមួយខ្សែនេះមិនមែនជារបស់ប្រជាពលរដ្ឋណាម្នាក់នោះទេ គឺជាផ្លូវរបស់យើងទាំងអស់គ្នា ព្រោះផ្លូវមួយខ្សែនេះមានសារសំខាន់ណាស់ ក្នុងការចូលរួមលើកសោភ័ណភាពក្នុងក្រុងព្រះសីហនុប្រកបដោយភាពស្រស់ស្អាត ជាទីក្រុងទេសចរបៃតង ជាតារារះនាទិសនិរតី ក្នុងការទាក់ទាញភ្ញៀវទេសចរជាតិ និងអន្តរជាតិឲ្យចូលមកទស្សនាកំសាន្តនៅខេត្តព្រះសីហនុកាន់តែច្រើនឡើងជារៀងរាល់ឆ្នាំ ព្រមទាំងចូលរួមចំណែកលើកកំពស់ជីវភាពរស់នៅរបស់ប្រជាពលរដ្ឋនៅក្នុងក្រុងព្រះសីហនុបានកើនឡើងមួយកម្រិតថែមទៀតផងដែរ។ ហើយផ្លូវមួយខ្សែនេះអាចជួយកាត់បន្ថយការកកស្ទះចរាចរណ៍របស់ប្រជាពលរដ្ឋក្នុងមូលដ្ឋាន ក៏ដូចជាភ្ញៀវទេសចរជាតិ និងអន្តរជាតិ។
គួរបញ្ជាក់ដែរថា ផ្លូវវិថី៧មករា ត្រូវបានមន្ទីរសាធារណៈការ និងដឹកជញ្ជូនខេត្តព្រះសីហនុបើកការដ្ឋានកាលពីថ្ងៃទី១០ ខែតុលា ឆ្នាំ២០១៤កន្លងមក និងកំពុងធ្វើការពង្រីកចាក់អ៊ុតកៅស៊ូ រួចរាល់នៅចុងខែមករាខាងមុខនេះ៕
ស៊ុយ ចាន់ធា
0 Comments