ភ្នំពេញ ៖ មន្ត្រីអគ្គិសនីកម្ពុជា បានចុះមកសហការជាមួយអាជ្ញាធរខណ្ឌដូនពេញបើកការប្រជុំមួយដើម្បីផ្សព្វផ្សាយពីការចុះតបណ្ដាញអគ្គិសនី និងដាក់កុងទ័រដល់ផ្ទះកម្មករ-កម្មការិនីដែលកំពុងស្នាក់នៅផ្ទះជួលនៅក្នុងមូលដ្ឋានសង្កាត់ស្រះចក ដែលមានការចូលរួមពីលោក សុខ ពេញវុធ អភិបាលរងខណ្ឌដូនពេញជួសមុខឲ្យលោក គួច ចំរើន អភិបាលខណ្ឌដែលមានធុរៈរួមជាមួយម្ចាស់ផ្ទះជួលមេភូមិ មេក្រុម និងចៅសង្កាត់ កាលពីរសៀលថ្ងៃទី១៩ ខែមករា ឆ្នាំ២០១៥ នៅសាលាខណ្ឌដូនពេញ។ ជាមួយគ្នានោះដែរ មន្ត្រីអគ្គិសនីកម្ពុជាបានជម្រាបជូនដល់ម្ចាស់ផ្ទះជួលទាំងអស់ដែលមកចូលរួមថា សម្ដេចនាយករដ្ឋមន្ត្រី ហ៊ុន សែន បានអំពាវនាវឱ្យភាគីពាក់ព័ន្ធបញ្ចុះតម្លៃអគ្គិសនីដល់កម្មករនៅតាមបន្ទប់ជួលនៅត្រឹមតម្លៃ៦១០រៀល ក្នុងមួយគីឡូវ៉ាត់ បើពួកគេប្រើក្រោម៥០គីឡូវ៉ាត់ ក្នុងមួយខែនោះ ដូច្នេះយើងជាម្ចាស់ផ្ទះជួលទាំងអស់ ត្រូវតែរៀបចំបង់លេខបន្ទប់ឲ្យបានត្រឹមត្រូវនិងជម្រាបដល់កម្មករ-កម្មការិនីទាំងអស់ឲ្យដាក់កុងទ័រនៅតាមបន្ទប់របស់ខ្លួន ព្រោះការដាក់កុងទ័រថ្មីដែលគ្រប់គ្រងដោយអគ្គិសនីកម្ពុជានេះ គឺត្រូវកក់មុនត្រឹមតម្លៃ៣០.៧៥០រៀលប៉ុណ្ណោះ ដោយផ្នែកជំនាញអគ្គិសនីជាអ្នកចាត់ចែងដូចជាអូសខ្សែភ្លើងជាដើម។
ក្នុងឱកាសនោះដែរ លោកបានជម្រាបដល់ម្ចាស់ផ្ទះជួលទាំងអស់ ត្រូវសហការជាមួយមន្ត្រីអគ្គិសនីក្នុងពេលចុះធ្វើការងារ ជាពិសេសទៀតមេភូម និងមេក្រុមក៏ត្រូវសហការជាមួយផ្នែកជំនាញអគ្គិសនីដែរ ព្រោះការធ្វើដូច្នេះកុំឲ្យមានការរាំងស្ទះដល់ការងាររបស់ជំនាញ។
លោកបានបន្តទៀតថា សម្ដេចនាយករដ្ឋមន្ត្រី ហ៊ុន សែន បានអំពាវនាវឱ្យភាគីពាក់ព័ន្ធ ចាប់ផ្ដើមត្រួតពិនិត្យមើលការបញ្ចុះតម្លៃទឹកនិងតំលៃអគ្គិសនីបន្ថែមទៀតសម្រាប់លក់ជូនកម្មករ ដើម្បីសម្រួលដល់ជីវភាពរបស់ពួកគេកាន់តែប្រសើរជាងមុន។ ការអំពាវនាវនេះបានធ្វើឡើង ខណៈសម្ដេចចុះចែកសញ្ញាបត្រដល់និស្សិតនៃសកលវិទ្យាល័យស្វាយរៀង នាព្រឹកថ្ងៃទី១៩ ខែមករា ឆ្នាំ២០១៥កន្លងមកនេះ៕
រស្មី
0 Comments