តម្លៃ​ប្រេង​រអិល​ធ្លាក់​ក្រោម​៥០​ដុល្លារ​ក្នុង​មួយ​បារ៉ែល បន្ទាប់ពី​អ៊ីរ៉ាក់​បាន​ប្រកាស​ជា​ផ្លូវការ​អំពី​ទិន្នផល​ផលិត​របស់​ខ្លួន​

តម្លៃ​ប្រេង​ឆៅ​Brent បាន​ធ្លាក់​ចុះក្រោម​៥០​ដុល្លារ​ក្នុង​មួយ​បារ៉ែល​នៅ​ថ្ងៃ​ចន្ទ បន្ទាប់ពី​ប្រទេស​អ៊ីរ៉ាក់​បាន​ប្រកាស​ជា​ផ្លូវការ​អំពី​ការផលិត​ប្រេង ហើយនឹង​ទស្សនវិស័យ​សេដ្ឋកិច្ច​ពិភព​លោក​មាន​សភាព​ខ្មៅ​ងងិត​នោះ។​

រដ្ឋមន្ត្រីក្រសួង​ប្រេង​អ៊ីរ៉ាក់ លោក Adel Abdel-Mehdi បាន​និយាយ​កាលពី​ថ្ងៃអាទិត្យ​ថា អ៊ីរ៉ាក់​បាន​បូម​ប្រេង​៤​លាន​បារ៉ែល​ក្នុង​មួយថ្ងៃ នៅក្នុង​ខែធ្នូ ជា​កម្រិត​ខ្ពស់​បំផុត​មិន​ធ្លាប់​មាន​របស់​ខ្លួន ដោយ​សារ​ទិន្នផល​កាន់តែ​ខ្ពស់​ពី​ស្ថានីយ​នៅ​ភាគ​ខាង​ត្បូង​របស់​ខ្លួន និង​ការ​កញ្ជ្រោល​ឡើង​នៅក្នុង​ការ​ផ្គត់ផ្គង់​ពី​ភាគ​ខាងជើង។​

លោក Adel Abdel-Mehdi​ បាន​បន្ត​ថា អ៊ីរ៉ាក់​មាន​ផែនការ​បង្កើន​ការនាំចេញ​ដ៏​ធំ​មួយ​ពី​ទីក្រុង​KirKuk នៅ​ភាគ​ខាងជើង ​និង​តំបន់​Kurdistan ដែល​នឹង​បង្កើន​ការផលិត​ទៅដល់​៦០០.០០០​បារ៉ែល​ក្នុង​មួយថ្ងៃ ចាប់ពី​ខែមេសា​ទៅ។​

ប្រេង​ឆៅ​Brent ជួញដូរ​ក្នុង​តម្លៃ​ប្រហែល​៤៩.៤០​ដុល្លារ​ក្នុង​មួយ​បារ៉ែល នៅ​វេលា​ម៉ោង​១០១៥​ម៉ោង សាកល​ធ្លាក់ចុះ​៧៧​សេន។ ប្រេង​ឆៅ​អាមេរិក ការ​ជួញដូរ​ធ្លាក់ចុះ​៧៤​សេន គឺ​ក្នុង​តម្លៃ​៤៧.៩៥​ដុល្លារ​ក្នុង​មួយ​បារ៉ែល។​

លោក​Hans van Cleef អ្នកសេដ្ឋកិច្ច​ថាមពល​នៅ​ABN Amro បាន​និយាយ​ថា "​នៅ​តែ​មាន​ការ​ផ្គត់ផ្គង់​ច្រើនជាង​តម្រូវការ​ និង​ថា​សភាពការណ៍​នេះ​នឹង​មិនអាច​ផ្លាស់ប្ដូរ​នៅក្នុង​រយៈពេល​តែ​ប៉ុន្មាន​សប្ដាហ៍​នោះ​បាន​ទេ។​

តម្លៃ​ប្រេង​បាន​ធ្លាក់ចុះ​ជាង​ពាក់កណ្ដាល​ចាប់តាំងពី​ខែមិថុនា​មក ខណៈ​ដែល​ទិន្នផល​នៅ​ទូទាំង​ពិភពលោក​បាន​ឡើង​ខ្ពស់​នៅ​ពេល​ដែល​កំណើន​តម្រូវការ​មាន​សភាព​យឺត។ ទោះបីជា​ភ្នាក់​ងារ​ថាមពល​អន្តរ​ជាតិ​(IEA) បាន​និយាយ​កាលពី​សប្ដាហ៍​កន្លងមក​ថា ការ​ធ្វើ​បញ្ច្រាស​និន្នាការ​នេះ​គឺ​អាច​ទៅរួច​នៅក្នុង​ឆ្នាំនេះ​ក៏ដោយ ក៏​ភ្នាក់ងារ​នេះ​បាន​បន្ថែម​ថា តម្លៃ​អាច​ធ្លាក់ចុះ​បន្ថែម​ទៀត​នៅមុន​វា​ឡើង​មក​វិញ។​

អ្នកវិភាគ​បាន​និយាយ​ថា តម្លៃ​បាន​រក​ឃើញ​ការ​គាំទ្រ​មួយចំនួន​ពី​ការ​ធ្លាក់​ចុះ​នៅ​កន្លែង​ខួង​ប្រេង​របស់​អាមេរិក​មានន័យ​ថា ទំនងជា​ធ្លាក់ចុះ​នៅក្នុង​ការផលិត​នៅពេល​អនាគត។ ប៉ុន្តែ​ពួកគេ​បាន​និយាយ​ថា មិន​មាន​បន្ទប់​ច្រើន​ទេ សម្រាប់​ការ​ទទួល​បាន​មកវិញ​នោះ។​

ប្រទេស​ចិន ជា​អ្នកប្រើប្រាស់​ថាមពល​ធំ​បំផុត​នៅ​លើ​ពិភព ត្រូវ​បាន​គេ​រំពឹង​ថា នៅ​ថ្ងៃ​អង្គារ ទី​២០ ខែមករា នឹង​រាយការណ៍​អំពី​កំណើនសេដ្ឋកិច្ច​ដ៏​ខ្សោយ​បំផុត​របស់​ខ្លួន​សម្រាប់​រយៈពេល​ជាង​២​ទសវត្សរ៍។ ទិន្នន័យ​ពី​ការិយាល័យ​ស្ថិតិ​ជាតិ​របស់​ចិន​បាន​បង្ហាញ​អំពី​តម្លៃ​ផ្ទះ​នៅ​ថ្ងៃអាទិត្យ បាន​ធ្លាក់​ចុះ​នៅ​ខែ​ទី​៤៕​

ថា​លី​យ៉ាន​