កំពង់ឆ្នាំង ៖ យុវជនម្នាក់បានស្លាប់នៅពេលដឹកមកសង្គ្រោះនៅមន្ទីរខេត្តកំពង់ឆ្នាំង និង២នាក់ទៀត បានរងរបួសធ្ងន់និងស្រាល នៅក្នុងហេតុការណ៍គ្រោះថ្នាក់ចរាចរណ៍ រវាងម៉ូតូនិងម៉ូតូបុកគ្នាឯងយ៉ាងពេញទំហឹង។ ករណីនេះបានកើតឡើងកាលពីវេលាម៉ោង៦និង២០នាទីយប់ ថ្ងៃទី៥ ខែមករា ឆ្នាំ២០១៥ នៅលើផ្លូវក្រាលកៅស៊ូ ចំណុចត្រពាំងថ្លាន់ ស្ថិតក្នុងភូមិអណ្ដូងរនុក ឃុំត្រងិល ស្រុកកំពង់លែង។ មន្ត្រីនគរបាលស្រុកកំពង់លែងបាននិយាយឲ្យដឹងថា ជនរងគ្រោះដែលស្លាប់នោះមាន
ឈ្មោះ ឆៃ ប៊ុនរាជ អាយុ២០ឆ្នាំ មានទីលំនៅភូមិខ្លែងពរ័ ឃុំត្រងិល ចំណែកយុវជនរងរបួសធ្ងន់មាន ឈ្មោះ សឿន វ៉ាន់នី ហៅម៉ាប់ អាយុ១៩ឆ្នាំ មានទីលំនៅភូមិអណ្ដូងរនុក និងម្នាក់ទៀតរងរបួសស្រាលមិនស្គាល់ឈ្មោះ។ ពួកគេទាំង៣នាក់ជាមិត្តភក្ដិនិងគ្នា(អាចហៅថាជាសម្លាញ់អាប់ក៏បាន)។
ប្រភពដដែលបានបន្តថា មុនពេលកើតហេតុ យុវជនរងគ្រោះឈ្មោះ ឆៃ ប៊ុនរាជ បានជិះម៉ូតូម៉ាកឌ្រីម១២៥ ពណ៌ខ្មៅ ទៅបបួលឈ្មោះ សឿន វ៉ាន់នី ទៅផឹកស្រានៅតៀមអ្នកលក់ស្រាចុងភូមិ ក្រោយពីផឹកបានមួយស្របក់ ឈ្មោះ ឆៃ ប៊ុនរាជ ក៏បានប្រាប់ថា ទៅហៅមិត្តភក្ដិម្នាក់ទៀតសិន ហើយក៏ជិះម៉ូតូចេញទៅ។ មួយស្របក់ក្រោយមកដោយចាំយូរពេកឈ្មោះ សឿន វ៉ាន់នី បានយកម៉ូតូម្ចាស់តៀមស្រាម៉ាកស្មាស់ ពណ៌ស ជិះទៅតាម ស្រាប់តែមកដល់ចំណុចត្រពាំងថ្លាន់ ចៃដន្យក៏បានបុកជាមួយម៉ូតូ ឈ្មោះឆៃ ប៊ុនរាជ យ៉ាងពេញទំហឹង ខណៈដែលឈ្មោះនេះជិះម៉ូតូដឹកមិត្តភក្ដិត្រឡប់មកវិញ បណ្ដាលឲ្យឈ្មោះឆៃ ប៊ុនរាជ និងឈ្មោះ សឿន វ៉ាន់នី រងរបួសជាទម្ងន់ ហើយត្រូវបានក្រុមគ្រួសារដឹកមកសង្គ្រោះនៅមន្ទីរពេទ្យខេត្ត តែដោយសារឈ្មោះឆៃ ប៊ុនរាជ របួសធ្ងន់ពេក ក៏បានស្លាប់ពេលមកដល់មន្ទីរពេទ្យខេត្តបានបន្តិច។ ចំណែកឈ្មោះ សឿន វ៉ាន់នី នៅមិនទាន់ដឹងខ្លួននៅឡើយទេ។ គ្រូពេទ្យខេត្តប្រាប់ថា រូបគេក៏ប៉ះពាល់ដល់ក្បាលធ្ងន់ធ្ងរផងដែរ។
សពជនរងគ្រោះត្រូវបានក្រុមគ្រួសារដឹកបញ្ជូនទៅកាន់លំនៅដ្ឋានវិញ ដើម្បីធ្វើបុណ្យតាមប្រពៃណី ចំណែកម៉ូតូទាំង២គ្រឿងកំពុងរក្សាទុកនៅអធិការដ្ឋាននគរបាលស្រុកកំពង់លែងដើម្បីរង់ចាំការដោះស្រាយជាមួយភាគីទាំង៣តាមនីតិវិធីច្បាប់៕ ( ឈៀង ថារិទ្ធ )
0 Comments