កណ្ដាល ៖ ចោរកាច់កម៉ូតូម្នាក់ត្រូវបានប៉ូលិសប៉ុស្តិ៍តាក្តុលសហការជាមួយប៉ូលិសក្រុងតាខ្មៅ ធ្វើការឃាត់ខ្លួនភ្លាមៗ ខណៈដែលជនសង្ស័យកំពុងជិះម៉ូតូតាមដងផ្លូវ លុះដល់ចំណុចមុខអាហារដ្ឋានសេះស បន្ទាប់ពីធ្វើសកម្មភាពយកម៉ូតូពីរតាក្តុលរួចជិះគេចខ្លួនកាលពីវេលាម៉ោង១២និង៣០នាទី ថ្ងៃទី០៦ ខែមករា ឆ្នាំ២០១៥។
បើតាមលោក គីវ ស៊ីវថា អធិការរងនគរបាលក្រុងតាខ្មៅទទួលផែនយុត្តិធម៌ បានឲ្យដឹងថា ជនសង្ស័យដែលត្រូវឃាត់ខ្លួននោះមានឈ្មោះ អន ឆេងលី ភេទប្រុស អាយុ៣៥ ទីលំនៅភូមិព្រែក ខេត្តស្ទឹងត្រែង ស្នាក់នៅមិនប្រាកដនៅរាជធានីភ្នំពេញ។ ជនសង្ស័យខាងលើបានធ្វើសកម្មភាពកាច់កយកម៉ូតូ របស់ជនរងគ្រោះឈ្មោះ ហ៊ុន វិសាល ភេទប្រុស អាយុ៤៥ឆ្នាំ រស់នៅភូមិ/ឃុំកើតហេតុខាងលើ មានមុខរបរជាសន្តិសុខឯកជន។
លោក គីវ ស៊ីវថា បានឲ្យដឹងទៀតថា មុនពេលកើតហេតុជនរងគ្រោះទុកម៉ូតូរបស់ខ្លួនម៉ាក HONDA DREAM125 ពណ៌ខ្មៅ ពាក់ស្លាកលេខ ភ្នំពេញ1AN 0326 នៅមុខផ្ទះហើយចូលសម្រាក បន្តិចមកក៏លឺស្នូរម៉ូតូរបស់ខ្លួនត្រូវគេជិះចេញ ហើយក៏ប្ដឹងសមត្ថកិច្ចតាមទូរស័ព្ទ។ ក្រោយមកសមត្ថកិច្ចក៏ចេញធ្វើការពួនស្ទាក់ឃាត់បានជនសង្ស័យដែលលួចម៉ូតូរបស់ជនរងគ្រោះនៅគោលដៅចរាចរណ៍ចំណុចសេះស ផ្លូវជាតិលេខ២ ភូមិសង្កាត់តាខ្មៅ។
បច្ចុប្បន្នជនសង្ស័យ និងរួមទាំងវត្ថុតាង ត្រូវបានសមត្ថកិច្ចជំនាញកំពុងកសាងសំណុំរឿងបញ្ចូនទៅតុលាការដើម្បីចាត់ការតាមផ្លូវច្បាប់៕
មុនី
0 Comments