ថៃ​ប៊ុន​ហាន ​និង​យុគ​យក្ស​ផ្លែ​ជួប​ថៃ​ក្នុង​កម្មវិធី​ប្រដាល់​ថ្មី​របស់​បាយ័ន

អ្នក​ប្រដាល់​កម្ពុជា​២​រូប គឺ​ថៃ ប៊ុន​ហាន ក្លិប​ឫទ្ធី​ពោធិ៍សែន​ជ័យ និង​យុគ​យក្ស​ផ្លែ ក្លិប​អប់រំ​កាយ​កីឡា​ខេត្ត​បាត់ដំបង ត្រូវ​ជួប​ប្រកួត​ជាមួយ​អ្នក​ប្រដាល់​ថៃ ក្នុង​កម្មវិធី​បើក​ប្រដាល់​ថ្មី​Leo Beer របស់​បាយ័ន នា​យប់​ថ្ងៃ​សៅរ៍​ទី​១៧ ​ខែ​មករា ខាងមុខនេះ នៅលើ​សង្វៀន​រោង​សៀក​ទល់មុខ​រដ្ឋសភា។

ថៃ ប៊ុន​ហាន គេ​នឹងត្រូវ​ជួប​អ្នក​ប្រដាល់​ថៃ​ឈ្មោះ​Than Pakorn lek Aor.Kwan meung ក្នុង​ប្រភេទ​ទម្ងន់​៦៥​គីឡូក្រាម។ អ្នក​ប្រដាល់​ថៃ​រូបនេះ ពុំដែល​មក​កម្ពុជា​ពីមុនមក។ ប៉ុន្តែ​បើតាម​អ្នក​ផ្គូផ្គង ឲ្យដឹងថា Than Pakorn lek Aor.Kwan meung នេះ គេ​មកពី​បាងកក ហេតុនេះ​មិនធម្មតា​នោះឡើយ។

នេះ​ជា​លើក​ទី​១ របស់​ថៃ ប៊ុន​ហាន​ហើយ ដែល​ជួប​ប្រកួត​ជាមួយ​ថៃ​នេះ។ ប៊ុន​ហាន គេ​ជា​ម្ចាស់​ខ្សែក្រវាត់​គូ​បូ​តា​ទម្ងន់​៦៥​គីឡូក្រាម កាលពី​ថ្ងៃ​ទី​២៨ ខែ​​ធ្នូ​ ឆ្នាំ​២០១៤។ គេ​មាន​ស្នៀត​ប្រដាល់​មិនសូវ​ជា​ល្អ​ណាស់ណា​ទេ តែ​គេ​មាន​កម្លាំង​ខ្លាំង ហើយក៏​ជា​អ្នក​ប្រដាល់​ម្នាក់​ដែល​មាន​មុខរឹង វាយ​មិន​ឈឺ។

សម្រាប់​ការប្រកួត​លើក​នេះ ពុំ​ដឹងថា​ថៃ ប៊ុន​ហាន អាច​វាយ​ឈ្នះ​Than Pakorn បាន ឬ​អត់​នោះទេ​? អ្នក​ប្រដាល់​ថៃ​មក​លើក​នេះ លឺ​ថា​ខ្លាំង​ផង ដោយមាន​ប្រវត្តិ​ប្រកួត​ចំនួន​៩០ ដង ឈ្នះ ៧០ ដង ចាញ់​១៥​ដង​និង​ស្មើ​៥​ដង។

ប៉ុន្តែ​យ៉ាងណា ប៉ះ​ជាមួយ​ប៊ុន​ហាន ដែល​វាយ​គ្មាន​សំចៃ​ដៃ​នោះ Than Pakorn មិនជា​ស្រួលខ្លួន​នោះឡើយ។ ដូច្នេះ​ចាំមើល រវាង​ថៃ ប៊ុន​ហាន និង អ្នក​ប្រដាល់​ថៃ​Than Pakorn lek Aor.Kwan meung តើ​ន​រណា​ជា អ្នកឈ្នះ​នោះ ?

ចំណែក យុគ យក្ស​ផ្លែ គេ​នឹងត្រូវ​ជួប​ជាមួយ​អ្នក​ប្រដាល់​ថៃ​ឈ្មោះ Watchark Sak Tor Sirachai ក្នុង​ប្រភេទ​ទម្ងន់​៥៧​គីឡូក្រាម។ យក្ស​ផ្លែ គេ​មិន​អស់ចិត្ត​នៅ​ពេល​ដែល​វាយ​ចាញ់​ពិន្ទុ​អ្នក​ប្រដាល់​ថៃ Ketchsaharat កាលពី​ថ្ងៃ​ទី​២១​ ខែ​ធ្នូ​កន្លងមក​នោះ ។ លើក​នេះ ទោះជា​គូ​សងសឹក​មិន​បាន​មក​ក៏ដោយ ក៏​យក្ស​ផ្លែ​អះអាង​ថា នឹង​យកឈ្នះ​ដៃគូ​ប្រកួត ​Watchark Sak Tor Sirachai ឲ្យ​ទាល់តែ​បាន ដើម្បី​ស្តារ​កេរ្តិ៍ឈ្មោះ​ឡើងវិញ។

អ្នក​ប្រដាល់​ថៃ Watchark Sak Tor Sirachai នេះ មិនដែល​មក​ប្រកួត​នៅ​ស្រុក​ខ្មែរ​ទេ​។ បើតាម​ប្រវត្តិ​ប្រកួត​របស់គេ​ប្រហែល​ជាខ្លាំង​ហើយ ព្រោះ​ធ្លាប់​ឡើង​ប្រកួត​ចំនួន​១១៥​ដង ឯណោះ ក្នុងនោះ​វាយ​ឈ្នះ​៩០​ដង ចាញ់​២៥​ដង មិនដែល​ស្មើ​នោះ​ទេ ហើយ​គេ​ធ្លាប់​ផ្តួល​គូប្រកួត​ឲ្យ​សន្លប់​ចំនួន​២៥​ដង។ បើ​ប្រៀបធៀប​ជាមួយ​យុគ យក្ស​ផ្លែ គឺ​តិចជាង​តែ​៥​ដង​ប៉ុណ្ណោះ ដោយ​យក្ស​ផ្លែ​គេ​មាន​ប្រវត្តិ​ប្រកួត​ចំនួន​១២០​ដង ឈ្នះ ៨៥ ដង ចាញ់ ៣១ ដង និង​ស្មើ​៤​ដង។ ជាមួយនេះ គេ​ធ្លាប់​ផ្តួល​ដៃគូ​ប្រកួត​ឲ្យ​សន្លប់​លើស​ង្វៀន​ចំនួន​៣៦​ដង​ឯណោះ។

ទោះជា​យ៉ាងនេះ​ក្តី គេ​មិនទាន់​ប្រាកដថា យុគ យក្ស​ផ្លែ ឈ្នះ Watchark Sak Tor Sirachai នោះទេ។ ដោយសារ​អ្នក​ប្រដាល់​កម្ពុជា​យើង​រូប​នេះ មាន​កម្ពស់​ទាប​ជាង​អ្នក​ប្រដាល់​ថៃ ដោយ​យក្ស​ផ្លែ​មាន​កម្ពស់​១,៦៣​ម៉ែត្រ ខណៈ​អ្នក​ប្រដាល់​ថៃ​មាន​កម្ពស់​១,៦៨​ម៉ែត្រ​ ហើយ​ Watchark Sak Tor Sirachai នេះ ក៏​ជា​អ្នក​ប្រដាល់​ជើង​ខ្លាំង​មកពី​បាងកក​ដែរ។ ចាំមើល លើក​នេះ​យុគ យក្ស​ផ្លែ អាច​យកឈ្នះ Watchark Sak Tor Sirachai បានដែរ​ឬ​អត់​នោះ​?

ជាមួយនឹង​ការប្រកួត​ជា​លក្ខណៈ​អន្តរជាតិ​នេះ ក៏មាន​ការប្រកួត​ពិសេស​ដណ្តើម​រង្វាន់​ទឹកប្រាក់​១,០០០​ដុល្លារ​អាមេរិក​ផង​ដែរ ដែល​អ្នកឈ្នះ​ទទួល​បាន​៦០០​ដុល្លារ អ្នក​ចាញ់​បាន​៤០០​ដុល្លារ រវាង​អ្នក​ប្រដាល់​អ៊ុំ ចំរើន អ្នក​ប្រដាល់​ក្លិប​តា​ឡី​ដំរី​មាន​រិ​ទ្ធ ជាមួយ​ធានុ​រាជ អ្នក​ប្រដាល់​ក្លិប​ពោធិ​ជ័យ​កីឡា។ ពួកគេ​ទាំងពីរ មិន​ធ្លាប់​ដែល​ប្រកួត​គ្នា​ទេ​កន្លងមក។

អ៊ុំ ចំរើន ជា​ជើង​ខ្លាំង​ស្រករ​ក្រោយ ឯ ធា ​នុ​រាជ ជា​ជើង​ខ្លាំង​ស្រករ​មុន។ ទោះជា​យ៉ាង​នេះ​ក្តី ការ​ជួបគ្នា​លើក​នេះ​ធា នុ​រាជ ទំនងជា​មិន​អាច​ឈ្នះ​ចំរើន​នោះ​ឡើយ ព្រោះ​ចំរើន​គេ​វាយ​ខ្លាំង​ជាង ស៊ុហ្វ​ល្អ​ជាង៕