ព្រឹត្តិការណ៍ប្រកួតជម្រុះHun Sen Cup តាមតំបន់ទាំង៦បានបញ្ចប់អស់ហើយ គិតត្រឹមល្ងាចថ្ងៃទី១២ ខែមករា ឆ្នាំ២០១៥នេះ។
សម្រាប់តំបន់ខាងកើត ដែលលេងនៅខេត្តព្រៃវែងនោះ ការប្រកួតជុំចុងក្រោយនេះ ក្រុមបាល់ទាត់ខេត្តព្រៃវែង ដណ្ដើមបានកៅអីសម្រាប់ឡើងមកលេងវគ្គ១៦ក្រុមចុងក្រោយ។
ក្នុងការប្រកួតចុងក្រោយនេះ ក្រុមខេត្តព្រៃវែងឈ្នះក្រុមខេត្តត្បូងឃ្មំ ២ ទល់ ១ទាំងលំបាក។ ២ប្រកួតរបស់ខេត្តព្រៃវែងឈ្នះទាំង២ប្រកួតបាន៦ពិន្ទុ ក្នុងខណៈដែល ២ ក្រុមទៀត គឺកណ្ដាល និង ខេត្តត្បូងឃ្មុំបាត់បង់ឱកាសសម្រាប់ឡើងមកលេងបន្តវគ្គ១៦ក្រុមចុងក្រោយនោះ។
ដោយឡែកសម្រាប់មណ្ឌលភ្នំពេញក្រៅពីគីរីវង់សុខ សែនជ័យដែលមានកៅអីហើយនោះ ក្រុម Albirex Niigataក៏ដណ្ដើមបានកៅអីសម្រាប់លេងនៅវគ្គ១៦ក្រុមចុងក្រោយដែរ។ Albirex Niigataដែលជាក្រុមចំណាត់ថ្នាក់លេខ ២ ពូល B នោះលេងប្រជែងកៅអីជាមួយក្រុមព្រែកជ័យកីឡារបស់ខណ្ឌច្បារអំពៅ ដោយទទួលជ័យជំនះ១ ទល់ ០ ទាំងប្រផឹតប្រផើយ។
គួរបញ្ជាក់ថា សម្រាប់តំបន់រាជធានីភ្នំពេញយក៣ក្រុមទៅលេងវគ្គ១៦ ក្រុមចុងក្រោយ ដែលពេលនេះរកឃើញហើយគឺក្រសួងការពារជាតិ គីរីវង់សុខសែនជ័យ និង Albirex Niigata។
ចំពោះការប្រកួតនៅតំបន់កណ្តាលវិញ ក្រុមដែលឡើងគឺក្រុមខេត្តសៀមរាប និងតំបន់ខាងត្បូងក្រុមខេត្តកំពត។ រីឯតំបន់ខាងលិច គឺក្រុមខេត្តបាត់ដំបង ហើយតំបន់ខាងជើង គឺខេត្តក្រចេះ។
ដូច្នេះ៨ក្រុមដែលឡើងមកវគ្គ១៦ក្រុមចុងក្រោយនេះ គឺក្រសួងការពារជាតិ គីរីវង់សុខសែនជ័យ Albirex Niigata ព្រៃវែង សៀមរាប កំពត បាត់ដំបង និង ក្រចេះ ដែលទាំង៨ក្រុមនឹងជួបជាមួយក្រុមLeagueអង្គុយចាំទាំង៨ក្រុម រួមមាន ភ្នំពេញក្រោន ចំការកៅស៊ូបឹងកេត ណាហ្គាខប អគ្គស្នងការដ្ឋាននគរបាលជាតិ ស្វាយរៀង ត្រាយអាស៊ី បៀលប្រាយនិងអាស៊ីអឺរ៉ុប។
គួរបញ្ជាក់ថា ការចាប់ឆ្នោតរើសពូលសម្រាប់វគ្គ១៦ក្រុមចុងក្រោយ ដែលមាន៤ពូល ក្នុងមួយពូលមាន៤ក្រុមនោះ នឹងចាប់ផ្តើមនៅព្រឹកថ្ងៃពុធទី១៤ ខែមករានេះ នៅស្នាក់ការសហព័ន្ធបាល់ទាត់ក្នុងពហុកីឡដ្ឋានជាតិ៕
0 Comments