បន្ទាយមានជ័យ ៖ ប្រជាពលរដ្ឋនិងសមត្ថកិច្ចមានការភ្ញាក់ផ្អើលយ៉ាងខ្លាំងដោយប្រទះឃើញសពបុរសមិនស្គាល់អត្តសញ្ញាណម្នាក់ត្រូវគេប្រទះឃើញស្លាប់អណ្ដែតទឹកនៅក្នុងស្រះមួយកន្លែងក្នុងស្រុកមង្គលបូរីក្រោយពីធ្វើការត្រួតពិនិត្យនិងធ្វើកោសល្យវិច័យ រួចមកឃើញថាបុរសរូបនេះស្លាប់ដោយអំពើឃាតកម្ម។
ហេតុការណ៍នេះកើតឡើងកាលពីវេលាម៉ោង៨ព្រឹក ថ្ងៃទី៩ ខែមករា ឆ្នាំ២០១៥ នៅចំណុចស្រះឈូក កណ្ដាលវាលស្រែ ចម្ងាយពីភូមិប្រហែល១គីឡូម៉ែត្រ ស្ថិតនៅភូមិនាងកេត ឃុំឫស្សីក្រោក ស្រុកមង្គលបូរី ខេត្តបន្ទាយមានជ័យ។ លោក ស៊ី ឌី អធិការនគរបាលស្រុកមង្គលបូរី ប្រាប់ឲ្យដឹងថា សពបុរសរងគ្រោះត្រូវបានសមត្ថកិច្ចអូសយកមកត្រួតពិនិត្យឃើញមានអត្តសញ្ញាណប័ណ្ណសញ្ជាតិខ្មែរ ដែលមានឈ្មោះ លីន ឡងឌី អាយុ២៥ឆ្នាំ រស់នៅភូមិព្រែកស្នាយ ឃុំព្រែកគយ ស្រុកស្អាង ខេត្តកណ្តាល និងមានប័ណ្ណឆ្លងដែនចូលប្រទេសថៃ មួយសន្លឹកទៀតផងដែរ។ សពមានស្នាមរបួសត្រូវគេវាយដោយវត្ថុរឹងចំថ្ងាស និងរយះបែកមាត់ ថែមទាំងបាក់កទៀតផង។ សពមានសភាពហើមស្អុយ សមត្ថកិច្ចធ្វើការសន្និដ្ឋានត្រូវគេវាយសម្លាប់យកទម្លាក់ចោលក្នុងទឹកស្រះមានរយៈពេល៣ថ្ងៃមកហើយ។ លោកអធិការប្រាប់ឲ្យដឹងទៀតថា សពជនរងគ្រោះបន្ទាប់មកត្រូវបានសមត្ថកិច្ចដឹកយកមករក្សាទុកនៅក្នុងវត្ត ក្នុងស្រុកមង្គលបូរី ហើយសមត្ថកិច្ចបានទំនាក់ទំនងក្រុមគ្រួសារនៅខេត្តកណ្តាលឲ្យមកទទួលយកសព ដើម្បីយកទៅចាត់ចែងធ្វើបុណ្យតាមប្រពៃណី។ ករណីអំពើឃាតកម្មនេះ សមត្ថកិច្ចកំពុងរង់ចាំការសាកសួរពីក្រុមគ្រួសារ ដើម្បីធ្វើការស្រាវជ្រាវស៊ើបអង្កេតស្វែងរកចាប់ឃាត់ខ្លួនជនល្មើសយកមកផ្ដន្ទាទោសតាមផ្លូវច្បាប់៕
គង្គា
0 Comments