អភិបាលក្រុងឡូវែលសហរដ្ឋអាមេរិកនឹងមកទស្សនកិច្ចរាជធានីភ្នំពេញរយៈពេល៥ថ្ងៃ
ភ្នំពេញ ៖ លោក រ៉ូដនី អិម អ៊ីលៀត (Rodney M. ELLIOTT) អភិបាលក្រុងឡូវែល រដ្ឋម៉ាស្សាឈូសេត សហរដ្ឋអាមេរិក នឹងដឹកនាំគណៈប្រតិភូមកបំពេញទស្សនកិច្ច នៅប្រទេសកម្ពុជារយៈពេល៥ ថ្ងៃ ហើយនៅចុងបញ្ចប់ នឹងបានចុះហត្ថលេខាលើអនុស្សរណៈ នៃការយោគយល់គ្នាស្ដីពីការបង្កើតចំណងមេត្រីភាពរវាងរាជធានីភ្នំពេញ ជាមួយទីក្រុងឡូវែល។
យោងតាមសេចក្ដីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃទី១០ ខែមករា ឆ្នាំ២០១៥ បានឲ្យដឹងថា តាមការអញ្ជើញរបស់លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស និងសហប្រតិបត្តិការអន្តរជាតិ លោក រ៉ូដនី អិម អ៊ីលៀត (Rodney M. ELLIOTT) អភិបាលក្រុងឡូវែល រដ្ឋម៉ាស្សាឈូសេត សហរដ្ឋអាមេរិក នឹងដឹកនាំគណៈប្រតិភូមកបំពេញទស្សនកិច្ច នៅទីក្រុងភ្នំពេញ ពីថ្ងៃទី១៣ ដល់ថ្ងៃទី១៧ ខែមករា ឆ្នាំ២០១៥ ហើយនៅក្នុងដំណើរទស្សនកិច្ចនោះ លោក រ៉ូដនី អិម អ៊ីលៀត នឹងចូលបង្គំគាល់ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នឹងចូលជួបសម្ដែងការគួរសមដាច់ដោយឡែកជាមួយ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងលោកឧបនាយករដ្ឋមន្ត្រី ហោ ណាំហុង។
សេចក្ដីជូនព័ត៌មានបានឲ្យដឹងដែរថា ក្នុងអំឡុងស្នាក់នៅរាជធានីភ្នំពេញ លោក រ៉ូដនី អិមអ៊ីលៀត នឹងជួបដាច់ដោយឡែកជាមួយរដ្ឋមន្ត្រីមួយចំនួនទៀត ហើយចុះហត្ថលេខាលើអនុស្សរណៈ នៃការយោគយល់គ្នាស្ដីពីការបង្កើតចំណងមេត្រីភាពរវាងរាជធានីភ្នំពេញ និងទីក្រុងឡូវែល ជាមួយលោក ប៉ា សុជាតិវង្ស អភិបាលរាជធានីភ្នំពេញ៕
កោះកែវ
0 Comments