អ្នកប្រដាល់កម្ពុជាឈឿន ឆៃដែន ក្លិបនិរោធមានជ័យបានផ្តួលអ្នកប្រដាល់ថៃSeanrak Kiatmana នៅក្នុងទឹកទី៤ នៅក្នុងព្រឹត្តិការណ៍ប្រកួតប្រដាល់មិត្តភាពអន្តរជាតិកម្ពុជា-ថៃខារ៉ាបាវ លើសង្វៀនបាយ័នស្ទឹងមានជ័យ នាយប់ថ្ងៃអាទិត្យទី១១ ខែមករា ឆ្នាំ២០១៥នេះ។
ឆៃដែន ពីដំបូងរាងយ៉ាប់ជាមួយSeanrak Kiatmana ដែលទើបមានអាយុ១៨ឆ្នាំនោះ ដោយអ្នកប្រដាល់ថៃរូបនេះ វាយរហ័សរហួន ហើយមានកណ្តាប់ដៃ ទាត់ កែងនិងជង្គង់យ៉ាងប៉ិនប្រសប់ទៀតផង។ ប្រការនេះ ធ្វើឲ្យឆៃដែនទ្រមខ្លួនមិនស្ទើរទេ តែទោះជាយ៉ាងនេះក៏ដោយ ក៏ឆៃ ដែនគេនៅតែព្យាយាមវាយសម្រុកទៅលើSeanrak Kiatmana ដែលក្នុងទឹកទី៣ឆៃដែនបានដណ្ដើមប្រៀបឈ្នះវិញ ដោយវាយអ្នកប្រដាល់ថៃរូបនោះ ឲ្យគាំងម្តងៗទៅហើយ។
មកដល់ទឹកទី៤Seanrak Kiatmana ត្រូវឆៃដែនចាប់វាយអុកជង្គង់រហូតទាល់តែដួល ហើយត្រូវអាជ្ញាកណ្ដាលរាប់៨។ បន្ទាប់ពីរាប់នោះ អ្នកប្រដាល់ថៃគេវាយបានមួយប្រាវទៀតអស់ស៊ុហ្វ ដែលជាឱកាសល្អហុចឲ្យឆៃដែន សង្គ្រុបចាប់អុកពោះទឹកSeanrak ប្រមាណ៣-៤ បណ្ដាលឲ្យអ្នកប្រដាល់ថៃរូបនេះដួលក្រោកលែងរួច។
អាជ្ញាកណ្ដាលលោកធន់ សុភា បានសម្រេចបញ្ឈប់Seanrak Kiatmanaលែងឲ្យប្រកួតត្រឹមនេះ និងផ្តល់ជ័យជំនះឲ្យទៅឆៃដែន ក្រោយពីពិនិត្យមើលឃើញSeanrak Kiatmana ទៅលែងរួចហើយនោះ។
ឃីម ឌីម៉ា អ្នកប្រដាល់កម្ពុជាមកពីក្លិបរស្មីភូមិគាបខេត្តបន្ទាយជ័យបានប្រកួតចាញ់អ្នកប្រដាល់ថៃKaithong Sor.Wirachai ដោយពិន្ទុទាំងមិនអស់ចិត្ត បន្ទាប់ពីវាយគ្នាប្រាំទឹកពេញនោះ។
ឌីម៉ា បានស្តារពិន្ទុបានមកវិញនៅពីរទឹកចុងក្រោយប៉ុណ្ណោះ ខណៈដែលបីទឹកដំបូង គេចាញ់Kaithong Sor.Wirachaiដាច់នោះ។ នៅក្នុងទឹកទី១ ឌីម៉ា ត្រូវអ្នកប្រដាល់ថៃរូបនេះ ដាល់ត្រូវមួយដៃយ៉ាងដំណំចំមុខ បណ្តាលឲ្យដួលដាច់ផ្ងារត្រូវអាជ្ញាកណ្តាលរាប់៨ម្តង។ ក្រោយមក ឌីម៉ាក៏ត្រូវKaithong Sor.Wirachaiវាយឲ្យដួលជាលើកទី២ ត្រូវអាជ្ញាកណ្តាលរាប់៨ម្តងទៀតក្នុងទឹកដដែលនេះ។
Kaithong Sor.Wirachai អ្នកប្រដាល់ថៃរូបនេះ ឈ្នះលើឃីម ឌីម៉ា គឺឈ្នះរាប់ឌីម៉ា២ ដងនេះឯង ហើយបើឌីម៉ាចង់ឈ្នះនោះ ទាល់តែវាយអ្នកប្រដាល់ថៃរូបនេះឲ្យសន្លប់ទើបអាចឈ្នះបាន។ អ្នកប្រដាល់ថៃនេះ នៅក្នុងទឹកទី៤ បានបែកឈាមក្បាលដោយសារកែងរបស់ឌីម៉ា ដែលគេសម្រុកចូលវាយប្តូរកែងនោះ។ ប៉ុន្តែវាយឺតពេលទៅហើយ មិនអាចស្តារ ជ័យជំនះបាននោះឡើយ ល្គឹកណាដែលឌីម៉ាវាយKaithong Sor.Wirachaiឲ្យសន្លប់ទើប អាចឈ្នះវិញបាន។
*អេ យ៉ានុត វាយឈ្នះបុប្ផាមករា
កីឡាការិនីអេ យ៉ានុត ក្លិបអេភូថងកីឡា បានវាយឈ្នះកីឡាការិនីបុប្ផា មករា ក្លិបនិរោធមានជ័យដោយពិន្ទុ ក្នុងការជួបគ្នាលើសង្វៀនរោងសៀកមុខរដ្ឋសភា កាលពីរសៀលថ្ងៃអាទិត្យទី១១ខែមករានេះដែរ។
យ៉ានុត នាងវាយឈ្នះពិន្ទុលើបុប្ផា មករាដាច់តែម្តង ដោយសារតែបុប្ផាមករា នាងវាយបានតែពីរទឹកដំបូងគឺអស់ស៊ុហ្វនោះ ហើយក្នុងបីទឹកចុងក្រោយ ក្រៅតែពីចាប់បោកយ៉ានុតនោះ គឺមករាគ្មានធ្វើអ្វីកើតនោះឡើយ ព្រោះនាងទន់ខ្លួនដូចសំឡីទៅហើយ។
ចំណែកអ្នកប្រដាល់ចាន់ សុខហួន ក្លិបនិរោធមានជ័យវិញនោះ បានផ្តួលវុធ សំណាងអ្នកប្រដាល់ក្លិបពោធិជ័យកីឡាឲ្យសន្លប់ក្នុងទឹកទី២។ វុធ សំណាង ត្រូវសុខហួនដាល់ចូលមុខ និងអុកមួយជង្គង់ចូលពោះទឹក ធ្វើឲ្យចុករមួលលែងក្រោកតែម្តង។
ងួន គា អ្នកប្រដាល់ក្លិបតាឡីដំរីមានរិទ្ធ ដែលមុនការប្រកួតមានគេទាយថានឹងចាញ់នោះ បានវាយស្មើពិន្ទុជាមួយស្រិល ទ្រី អ្នកប្រដាល់ក្លិបគុជសាកីឡា។
ពីរនាក់នេះ វាយគ្នាប្រាំទឹកពេញ ដែលពីរទឹកដំបូងគេឃើញស្រិល ទ្រី មានប្រៀបឈ្នះលើងួនគាទៅហើយ តែមកដល់ពីរទឹកចុងក្រោយបែរជាចាញ់ប្រៀបងួន គាវិញ ធ្វើឲ្យចប់ការប្រកួតស្រិល ទ្រី បានត្រឹមស្មើជាមួយងួន គា ប៉ុណ្ណោះ។
ចំពោះចៅ ផលឌឿ អ្នកប្រដាល់ក្លិបសំរោងកោងខេត្តបាត់ដំបង បានប្រកួតឈ្នះម៉ូ រដ្ឋា អ្នកប្រដាល់ក្លិបព្រៃទទឹងខេត្តបាត់ដំបងដោយពិន្ទុ។ ក្នុងការប្រកួតគ្នាប្រាំទឹកនោះ ម៉ូរដ្ឋា វាយចាញ់ផលឌឿដាច់តែម្តង ដោយចៅក្រមទាំង៥រូបបានផ្តល់ពិន្ទុឲ្យផលឌឿឈ្នះ ទាំងអស់។
ដោយឡែក ការប្រកួតដណ្តើមពានរង្វាន់អនុស្សាវរីយ៍បាយ័នទម្ងន់៦៣,៥០០គីឡូក្រាម ដែលមានអ្នកប្រដាល់៤រូបចូលរួមប្រកួតប្រជែងគ្នាដណ្តើមយក កាលពីថ្ងៃសៅរ៍ទី១០ ខែមករាលើសង្វៀនស្ទឹងមានជ័យនេះដែរ លទ្ធផលបានធ្លាក់ទៅលើអ្នកប្រដាល់សុខ សុវណ្ណ ក្លិបកងពលតូចលេខ៣១។
ក្នុងការប្រកួតជម្រុះលើកទី១ដែលមានតែបីទឹក១ទឹក៣នាទីនោះ សុខ សុវណ្ណ គេបានវាយឈ្នះឱម សំរេច ក្លិបកងទ័ពឆត្រយោង៩១១ដោយពិន្ទុ។ ឯ ឯម លីថូ ក្លិបឫទ្ធីពោធិសែនជ័យ បានវាយឈ្នះសល់ ពិសិដ្ឋ ក្លិបកុសលកីឡាដោយពិន្ទុ។
ការប្រកួតផ្តាច់ព្រ័ត្រ ឯម លីថូ ដែលត្រូវជួបប្រកួតជាមួយសុខ សុវណ្ណ នោះ ក្រោយ ពីប្រកួតគ្នាប្រាំទឹក១ទឹកមាន២នាទីនោះ សុខ សុវណ្ណបានទទួលជ័យជំនះដោយពិន្ទុ ដែលធ្វើឲ្យសុវណ្ណក្លាយជាម្ចាស់ជើងឯកពានរង្វាន់អនុស្សាវរីយ៍បាយ័នដើមឆ្នាំ២០១៥នេះ។
*សង្វៀនបាយ័នបឹងស្នោ
ពេជ្រ ម៉ាប់ អ្នកប្រដាល់ក្លិបសាលវ័ន្តកីឡា ដែលឡើងសាកកណ្តាប់ដៃជាមួយសូយ យក្សតឿ អ្នកប្រដាល់ក្លិបពោធិជ័យកីឡាលើសង្វៀនបាយ័នបឹងស្នោល្ងាចថ្ងៃអាទិត្យទី១១ ខែមករានោះ ត្រូវយក្សតឿវាយសន្លប់ក្នុងទឹកទី២។
នៅក្នុងការប្រកួតទឹកទី១ ពេជ្រ ម៉ាប់ វាយរាងប្រដំប្រសងជាមួយសូយ យក្សតឿ ប៉ុន្តែចូលដល់ទឹកទី២ ក្រោយពេលដែលយក្សតឿគេសម្រុកវាយនោះ ពេជ្រ ម៉ាប់ ចាញ់ដាច់តែម្តង ដោយមិនអាចទប់បានជាមួយកណ្តាប់ដៃនិងសន្ទុះជើងទាត់របស់យក្សតឿបាន។
ឈាន រស្មី អ្នកប្រដាល់ក្លិបបង្ក្រាបគ្រឿងញៀនខេត្តរតនគិរី បានប្រកួតចាញ់ឃីម សាវ៉េត អ្នកប្រដាល់ក្លិបព្រះខ័នរាជដោយពិន្ទុជាលើកទី២។ រស្មីឡើងសងសឹកលើកនេះ គឺ វាយអន់ជាងលើកមុនទៅទៀត ហើយថែមទាំងវាយត្រូវប្រដាប់ការពារពងរបស់សាវ៉េតម្តង ជាពីរដងថែមទៀត។ចំពោះ មាស ឆូយ អ្នកប្រដាល់ក្លិបសុភានូមានជ័យ បានប្រកួតចាញ់សល់ រីប៊ែល អ្នកប្រដាល់ក្លិបកុសលកីឡាដោយពិន្ទុ ក្រោយពីវាយគ្នាប្រាំទឹកពេញនោះ។ ក្នុងទឹកទី៣ មាស ឆូយ ត្រូវរីប៊ែលវាយកែងត្រូវមួយកែងបណ្ដាលឲ្យដួល ហើយត្រូវអាជ្ញាកណ្តាលរាប់ដល់៨។ ក្រោយពីរាប់ មាស ឆូយ គេបានតស៊ូប្រកួតរហូតដល់ចប់ទឹកទី៥ និងចាញ់ត្រឹមពិន្ទុប៉ុណ្ណោះ៕
0 Comments