ក្រចេះ ៖ ជនសង្ស័យចំនួន២នាក់ត្រូវបានមន្ត្រីជំនាញផ្នែករដ្ឋបាលជលផលព្រែកប្រសព្វ សហការជាមួយកម្លាំងនគរបាលប៉ុស្តិ៍រដ្ឋបាលឃុំ កោះតាស៊ុយ ចាប់ឃាត់ខ្លួន កាលពីវេលាម៉ោង២រសៀលថ្ងៃទី១០ ខែមករា ឆ្នាំ២០១៥ ខណៈជនសង្ស័យទាំង២នាក់កំពុងធ្វើសកម្មភាព ដោយប្រើប្រាស់នូវឧបករណ៍ឆក់ត្រី នៅចំណុចអូរវែងកណ្តាលកោះតាស៊ុយ ភូមិចុងកោះ ឃុំកោះតាស៊ុយ ស្រុកព្រែកប្រសព្វ។
ប្រភពពីមន្ត្រីជំនាញបានឲ្យដឹងថា ការចាប់ជនសង្ស័យទាំងពីរនាក់ខាងលើនេះធ្វើឡើងបន្ទាប់ពីមានប្រជាពលរដ្ឋរាយការណ៍ទៅលោកនួនលាងហេង មេឃុំកោះតាស៊ុយ អំពីសកម្មភាពឆក់ត្រីនៅចំណុចខាងលើ ហើយលោកមេឃុំ បានស្នើសុំ កម្លាំងមន្ត្រីជំនាញជលផលផ្នែកព្រែកប្រសព្វ និងកម្លាំងនគរបាលប៉ុស្តិ៍រដ្ឋបាល ចុះឃាត់ចាប់បានជនសង្ស័យទាំង២នាក់ភ្លាមៗ។
លោក បែន ប៊ុណ្ណារ៉ាវុធ នាយផ្នែករដ្ឋបាលជលផលព្រែកប្រសព្វ បានបញ្ជាក់ឲ្យដឹងថា ជនសង្ស័យទាំង២នាក់មានទី១.ឈ្មោះសេង ហុង ភេទប្រុស អាយុ៣១ឆ្នាំ ជនជាតិខ្មែរ មានទីលំនៅភូមិជ្រោយអំពិល១ ឃុំចំបក់ ស្រុកព្រែកប្រសព្វ និងទី២.ឈ្មោះ ប៊ីន ដា ភេទប្រុស ជាតិខ្មែរ អាយុ២៧ឆ្នាំ រស់នៅភូមិថ្មី២ ឃុំខ្សាច់អណ្តែត ស្រុកឆ្លូង ខេត្តក្រចេះ។
លោកបានបន្តថា នៅក្នុងការចាប់ឃាត់ខ្លួនជនសង្ស័យ សមត្ថកិច្ចរឹបអូសបានវត្ថុតាង ឧបករណ៍ល្មើសច្បាប់មួយចំនួនដូចជា អាំងវែទ័រឆក់ត្រីចំនួន១គ្រឿង ដងឆក់១គូ ថ្នងដងត្រីចំនួន១ អាគុយ៧០អំពែចំនួន១គ្រឿង និងត្រីចម្រុះទម្ងន់ជិត១០គីឡូក្រាម ផងដែរ។
លោក សៀន គិន នាយខណ្ឌរដ្ឋបាលជលផលក្រចេះ បានបញ្ជាក់ឲ្យដឹងដែរថា បច្ចុប្បន្នជនសង្ស័យទាំង២នាក់ត្រូវបានសមត្ថកិច្ចជំនាញកំពុងកសាងសំណុំរឿងតាមផ្លូវច្បាប់ ដើម្បីបញ្ជូនទៅកាន់សាលាដំបូងខេត្តក្រចេះ ចាត់ការបន្តតាមនីតិវិធីនៅព្រឹកថ្ងៃច័ន្ទនេះ។
ក្នុងនាមខណ្ឌរដ្ឋបាលជលផលក្រចេះ លោកសូមអំពាវនាវដល់បងប្អូនប្រជានេសាទទាំងអស់មេត្តាកុំប្រើប្រាស់ឧបករណ៍នេសាទខុសច្បាប់ ជាពិសេសដូចជាឧបករណ៍ឆក់ត្រីនេះជាដើម ព្រោះវាបង្កឲ្យមហន្តរាយយ៉ាងធ្ងន់ធ្ងរដល់ធនធានជលផលនៅក្នុងធម្មជាតិរបស់យើង។ជាមួយគ្នានេះដែរ ច្បាប់ស្តីពីជលផល ត្រង់មាត្រា៩៨ ចំណុចទី៤ បានចែងថា ការធ្វើនេសាទដោយឧបករណ៍ឆក់ គ្រឿងផ្ទុះ និងសារធាតុពុលគ្រប់ប្រភេទនៅក្នុងដែននេសាទ ត្រូវជាប់ពន្ធនាគារពី៣ឆ្នាំទៅ៥ឆ្នាំ និងវត្ថុតាងទាំងអស់ត្រូវរឹបអូសជាសម្បត្តិរដ្ឋ ឬបំផ្លាញចោល៕
0 Comments