កំពង់ឆ្នាំង ៖ ចម្ការស្វាយមួយកន្លែងត្រូវបានភ្លើងឆេះព្រៃបំផ្លាញ ដែលម្ចាស់ចម្ការប្រាប់ថាខូចខាតទឹកប្រាក់ជាង២ពាន់ដុល្លារ។ ហេតុការណ៍នេះបានកើតឡើងនៅវេលាម៉ោង៣និង៣០នាទីរសៀលថ្ងៃទី៩ ខែមករា ឆ្នាំ២០១៥ ស្ថិតនៅក្នុងភូមិទី៤ សង្កាត់ខ្សាម ក្រុងកំពង់ឆ្នាំង។
មន្ត្រីនគរបាលក្រុងកំពង់ឆ្នាំងបាននិយាយថា ម្ចាស់ចម្ការស្វាយនោះមានឈ្មោះ ពេជ ប៊ុនថន អាយុ៥៦ឆ្នាំ ជាមន្ត្រីកសិកម្មចូលនិវត្តន៍។ ពេលកើតហេតុ ស្រាប់តែគេឃើញភ្លើងឆេះព្រៃបានឆេះរាលដាលលើស្មៅខ្ពស់ៗក្រោមដើមស្វាយជាច្រើនដើម ហើយបានឆេះរាលដាលពេញបន្ទុកដោយពុំមានអ្នកណាជួយពន្លត់បានឡើយ ម្យ៉ាងទៀតម្ចាស់ចម្ការក៏មិនបាននៅចាំចម្ការនោះដែរ នៅពេលភ្លើងឆេះបានលឺសំឡេងផ្ទុះជាច្រើនគ្រាប់ទើបដឹង ធ្វើឲ្យមានការភ្ញាក់ផ្អើលដល់មន្ត្រីនគរបាលមូលដ្ឋាន នាំគ្នាចុះទៅពិនិត្យ។ ពេលនោះដែរកូនប្រុសម្ចាស់ចម្ការបានត្រឡប់មកដល់ រួចនាំគ្នាដងទឹកពន្លត់ ទើបរលត់តែដើមស្វាយមួយចំនួនបានឆេះជ្រុះផ្លែគរពេញដី។
មន្ត្រីនគរបាលបានបញ្ជាក់ឲ្យដឹងថា ការផ្ទុះនោះគឺផ្ទុះដើមឫស្សី និងផ្ទុះកំប៉ុងហ្គាស៍ចាស់ចំនួន២កំប៉ុងដូចគ្រាប់កាំភ្លើងដែរ។ ចំណែកការខូចខាតមានដើមស្វាយកំពុងផ្លែផ្កាចំនួន១៤២ដើម ទុយោជ័រសម្រាប់បូមទឹកស្រោចដើមស្វាយ មួយចំនួន និងម៉ាស៊ីនគោយន្តឆេះខូចតិចតួច ដែលបុរសជាម្ចាស់ចម្ការបានប្រាប់មន្ត្រីនគរបាលថា បើគិតតែត្រឹមស្វាយមួយដើមថ្លៃត្រឹមតែ២០ដុល្លារក៏ត្រូវខាតបង់ជាង២ពាន់ដុល្លារដែរ ចំពោះមូលហេតុវិញមិនទាន់ដឹងច្បាស់នៅឡើយទេ៕
0 Comments