ឃីម ឌី​ម៉ា និង ឈឿន ឆៃ​ដែន​ឡើង​ប្រកួត​ក្នុង​ព្រឹត្តិការណ៍​ប្រដាល់​មិត្តភាព​កម្ពុជា​-​ថៃ

ឃីម ឌី​ម៉ា និង ឈឿន ឆៃ​ដែន​ឡើង​ប្រកួត​ក្នុង​ព្រឹត្តិការណ៍​ប្រដាល់​មិត្តភាព​កម្ពុជា​-​ថៃ

អ្នក​ប្រដាល់​ជើង​ខ្លាំង​របស់​កម្ពុជា​២​រូប គឺ​ឃីម ឌី​ម៉ា ក្លឹប​រស្មី​ភូមិ​គាប​ខេត្តបន្ទាយមានជ័យ និង​ឈឿន ឆៃ​ដែន ក្លឹប​និរោធ​មានជ័យ ត្រូវ​ជួប​ប្រកួត​ជាមួយ​អ្នក​ប្រដាល់​ថៃ ក្នុង​កម្មវិធី​ប្រដាល់​ថ្មី​របស់​បាយ័ន​ដែលមាន​ឈ្មោះថា ប្រដាល់​មិត្តភាព​កម្ពុជា​-​ថៃ នា​យប់​ថ្ងៃអាទិត្យ​ទី​១១ មករា ខាងមុខនេះ នៅ​លើ​សង្វៀន​ស្ទឹងមានជ័យ។

អ្នក​ប្រដាល់​កម្ពុជា​ឃីម ឌី​ម៉ា ត្រូវ​អ្នក​ផ្គូផ្គង​ប្រចាំ​សង្វៀន​បាយ័ន​ផ្គូផ្គង​អោយ​ជួប​ប្រកួត​ជាមួយ​អ្នក​ប្រដាល់​ថៃ​ឈ្មោះKaitong S.Wirachai ដោយ​ប្រកួត​ក្នុង​ទម្ងន់​៦៣,៥០០​គីឡូ ក្រាម។

Kaitong S.Wirachai មិន​ធ្លាប់​មក​ប្រកួត​នៅ​ស្រុក​ខ្មែរ​ទេ​កន្លងមក។ អ្នក​ប្រដាល់​ថៃ រូ ប​នេះ បើ​តាម​លោក​នាង ស៊ី​វុត្ថា ប្រធាន​អ្នក​ផ្គូផ្គង​កីឡាករ​ប្រាប់​អោយ​ដឹង​នោះ​ថា អ្នក​ប្រដាល់​ជនជាតិ​ថៃ​ម្នាក់​នេះ ធ្លាប់​ប្រកួត​បាន​៨៨​ដង​ហើយ ដោយ​វាយ​ឈ្នះ​៦៣​ដង ចាញ់​២៣​ដង និង​ស្មើ​៣​ដង។

ឃីម ឌី​ម៉ា ជា​អ្នក​ប្រដាល់​ជើង​ខ្លាំង​របស់​កម្ពុជា ដែល​ធ្លាប់​ប្រកួត​ជាមួយ​អ្នក​ប្រដាល់ ថៃ មិន​តិច​ជាង​១០​នាក់​ទេ​នា​ពេល​កន្លងមក ដោយ​វាយ​ឈ្នះ​ថៃ​៦​នាក់ ស្មើ​ម្នាក់ និង​ចាញ់ ៣​នាក់។ និយាយ​ជា​រួម ក្នុង​ការ​ប្រកួត​ចំនួន​៥១​ដង​របស់​ឌី​ម៉ា គេ​វាយ​ឈ្នះ​៤៣​ដង ចាញ់​៥​ដង និង​ស្មើ​៣​ដង ហើយ​ធ្លាប់​ផ្តួល​ដៃគូ​អោយ​សន្លប់​ចំនួន​១៣​ដង។ ការប្រកួត​ចុងក្រោយ​របស់​គេ គឺ​វាយ​ចាញ់​អ្នក​ប្រដាល់​ឡាវ​អូ​រ៉ូ​ណូ ចំប៉ា​ស័​ក្ត​ដោយ​ពិន្ទុ។

ទោះជា​យ៉ាងនេះ​ក្តី សំរាប់​ការ​ជួប​អ្នក​ប្រដាល់​ថៃ Kaitong S.Wirachai លើក​នេះ មិន​ដឹង​ថា ឃីម ឌី​ម៉ា​អាច​យកឈ្នះ​បាន​ឬ​អត់​នោះ​ទេ​ព្រោះថា​អ្នក​ប្រដាល់​ថៃ​រូបនេះ ក៏​ជា​អ្នកខ្លាំង​មួយរូប​ដែរ។ ចាំមើល តើ​ឃីម​ឌី​ម៉ា​ឈ្នះ​ឬ Kaitong S.Wirachaiឈ្នះ ?។

ឈឿន ឆៃ​ដែន ត្រូវ​ជួប​ប្រកួត​ជាមួយ​អ្នក​ប្រដាល់​ថៃ​ឈ្មោះ Seanrak Kiatmana ក្នុង​ប្រភេទ​ទម្ងន់​៦០​គីឡូក្រាម។ ពីរ​នាក់​នេះ មាន​កម្ពស់​ប្រហែល​គ្នា​គឺ​១,៧០​ម៉ែត្រ និង​មាន​ប្រវត្តិ​ប្រកួត​ប្រហាក់ប្រហែល​គ្នា​ដែរ។

Seanrak Kiatmana នេះ ធ្លាប់​ប្រកួត​ចំនួន​៦៥​ដង ឈ្នះ​៥១​ដង ចាញ់​១៣​ដង និង​ស្មើ​០១​ដង។ បើ​តាម​អ្នក​ផ្គូផ្គង​អោយ​ដឹង​នោះ​ថា អ្នក​ប្រដាល់​ថៃ​រូប​នេះ ខ្លាំង​គួរសម​ដែរ ប៉ុន្តែ​គេ​មិន​ធ្លាប់​ដែល​មក​ប្រកួត​នៅ​ស្រុក​ខ្មែរ​ម្តង​ណា​នោះ​ឡើយ​ទេ។

ចំណែក ឈឿន ឆៃ​ដែន វិញ គេ​ក៏​មិន​ធ្លាប់​ប្រកួត​ជាមួយ​អ្នក​ប្រដាល់​បរទេស​ដែរ ហើយ​នេះ​ជា​លើក​ទី​១​សម្រាប់​រូបគេ​ហើយ​ដែល​បាន​ប្រកួត​ជាមួយ​ថៃ​នេះ។ ឆៃ​ដែន គេ​ជា​ម្ចាស់​ខ្សែក្រវាត់​ជើងឯក​ទម្ងន់​៦០​គ​.​ក្រ របស់​អាជ្ញាធរ​ជាតិ​ប្រយុទ្ធ​ប្រឆាំង​គ្រឿងញៀន។ គេ​មាន​កណ្តាប់ដៃ​ខ្លាំង​គួរសម​ដែរ ។​ក្នុង​ប្រវត្តិ​ប្រកួត​ចំនួន​៦៦​ដង គេ​វាយ​ឈ្នះ​៤៩​ដង ចាញ់​១២​ដង និង​ស្មើ​០៥​ដង ហើយ​ធ្លាប់​ផ្តួល​ដៃគូ​អោយ​សន្លប់​ចំនួន​១៥​ដង។

ប៉ុន្តែ​យ៉ាងណា ឈឿន ឆៃ​ដែន ឡើង​ប្រកួត​លើក​នេះ អាច​នឹង​ជួប​ការ​លំបាក​ដោយ សារ​ជា​ការ​ប្រកួត​លើកដំបូង​របស់​គេ​ជាមួយ​អ្នក​ប្រដាល់​បរទេស​នោះ។ ឆៃ​ដែន ប្រកួត​ចុងក្រោយ​នេះ គេ​វាយ​ឈ្នះ​ជើង​ខ្លាំង​ឡៅ ចន្ទ្រា ក្លឹប​កងពលតូច​ទ័ព​ឆ័​ត្រ​យោង​៩១១​ដោយ​ពិន្ទុ កាលពី​ថ្ងៃទី​២៧​ធ្នូ​២០១៤។

ចាំ​មើល រវាង​ឈឿន ឆៃ​ដែន និង អ្នក​ប្រដាល់​ថៃ​Seanrak Kiatmana តើន​រណា​ជា​អ្នកឈ្នះ​ក្នុងការ​ជួបគ្នា​នេះ ?៕