ភ្នំពេញ ៖ សាលាខណ្ឌពោធិ៍សែនជ័យកាលពីព្រឹកថ្ងៃទី៥ខែមករាឆ្នាំ២០១៥បានរៀបចំកម្មវិធីសិក្ខាសាលាសមាហរណកម្មផែនការសង្កាត់នៅថ្នាក់ខណ្ឌសំរាប់កម្មករវិធីវិនិយោគបីឆ្នាំរំកិលដែលបណ្ដាសង្កាត់ទាំង១០ទូទាំងខណ្ឌបានលើកជាគម្រោងសរុបទាំងអស់ជាង៣០០គម្រោងដើម្បីសុំការគាំទ្រពីមន្ទីរជំនាញក៏ដូចអង្គភាពពាក់ព័ន្ធនានា ដែលមានការអញ្ជើញចូលរួមជាអធិបតីពីសំណាក់លោកជ្រាង សុផាន់អភិបាលរងនៃគណៈអភិបាលរាជធានីភ្នំពេញ។
លោកហែមដារិទ្ធិអភិបាលនៃគណៈអភិបាលខណ្ឌពោធិ៍សែនជ័យបានឲ្យដឹងថា សំរាប់រយៈពេលបីឆ្នាំនេះគឺចាប់ពីឆ្នាំ២០១៥ដល់ឆ្នាំ២០១៧នេះគ្រប់បណ្ដាសង្កាត់ទាំង១០ទូទាំងខណ្ឌបានលើកគម្រោងរបស់ខ្លួនសរុបចំនួន៣០៣គម្រោងក្នុងនោះមានគម្រោងផ្សេងៗជាច្រើន ដូចជាគម្រោងផ្នែកកសិកម្ម គម្រោងផ្នែកអាជីវកម្ម គម្រោងផ្នែកអប់រំគម្រោងផ្នែកសុខភាពសាធារណៈគម្រោងភាពងាយរងគ្រោះ គម្រោងផ្នែកបរិស្ថាន គម្រោងផ្នែករដ្ឋបាលនិងសន្ដិសុខ និងផ្នែកយេនឌ័រ។ លោកបន្ដថា រាល់គម្រោងទាំងអស់នេះគឺលើកឡើងដើម្បីឲ្យមន្ទីរជំនាញក៏ដៃគូអភិវឌ្ឍន៍នានាជួយគាំទ្រ ប៉ុន្តែទោះជាយ៉ាងណាក៏ដោយការលើកគម្រោងទាំងនោះមិនសុទ្ធតែបានត្រូវគាំទ្រទាំងអស់នោះទេតែគេសង្ឃឹមថា ការគាំទ្រគម្រោងអាចទួលបានរហូតដល់ទៅចាប់ពី៦០ភាគរយឡើង។
ជាមួយគ្នានេះលោកជ្រាង សុផាន់ក៏បានលើកឡើងដែរថា រាល់គម្រោងទាំងដែលបានលើកយកមកពិនិត្យពិភាក្សានាពេលនេះយើងត្រូវចែកឲ្យដាច់ថា តើគម្រោងណាដែលត្រូវគាំទ្រដោយខណ្ឌនិងគម្រោងណាដែលត្រូវគាំទ្រដោយថ្នាក់សង្កាត់នោះ។ លោកបន្ដថា ការអនុវត្តន៍គម្រោងដែលបានគាំទ្រត្រូវមានការសហាការនិងពិភាក្សាបន្ថែមទៀតជាមួយបណ្ដាខណ្ឌ សង្កាត់និងខិតខំអនុវត្តន៍ឲ្យទាន់ពេលវេលាកំណត់ ដើម្បីចូលរួមចំណែកក្នុងការអភិវឌ្ឍមូលដ្ឋានឲ្យកាន់តែមានប្រសិទ្ធភាពខ្ពស់និងប្រកបដោយតម្លាភាព៕
វិទូ
0 Comments