បន្ទាយមានជ័យ ៖ សត្វទាចំនួន២៥ក្បាលចុះស៊ីចំណីក្នុងអាងទឹកប្រសាទតាដោក ត្រូវបានប្រជាពលរដ្ឋចាប់បាន ហើយម្ចាស់ទាទាន់បានដាក់ពាក្យប្ដឹងចូលមេភូមិទាសំណងពីប្រជាពលរដ្ឋចំនួន២៣លានរៀល។ ហេតុការនេះបានកើតឡើងនៅក្នុងភូមិថ្មីត្បូង ឃុំភូមិថ្មី ស្រុកថ្មពួក ខេត្តបន្ទាយមានជ័យ។ បញ្ជាក់ទឹកអាងនេះ គឺពលរដ្ឋទុកសម្រាប់ប្រើប្រាស់ទៅពេលរដូវប្រាំងខាងមុខជាប្រចាំ ដោយនៅក្នុងតំបន់នេះគ្មានប្រព័ន្ធទឹកស្អាតសម្រាប់ប្រើនោះទេ។ ទឹកអាងនេះមានប្រជាពលរដ្ឋចំនួន៤ប្រើប្រាស់គឺភូមិដឺ ភូមិគោកខ្ពស់ ភូមិស្ដៅនិងភូមិថ្មី ឃុំគោកកឋិន ស្រុកថ្មពួក ខេត្តបន្ទាយមានជ័យ រឿងប្រជាពលរដ្ឋចាប់ទានេះបានលើកយកមកដោះស្រាយនៅសាលាឃុំនាថ្ងៃទី១៨ ខែមករា ឆ្នាំ២០១៥ តែនៅមិនទាន់មានការព្រមព្រៀងគ្នានៅឡើយ។ ម្ចាស់ទាអ្នកស្រី សេង លាងគីប្រាប់ថា គាត់បានសុំការអនុញ្ញាតពីមេឃុំភូមិថ្មីយកទាមកចិញ្ចឹមឲ្យស៊ីចំណីក្នុងទឹកដីដែលគាត់កាន់កាប់ដោយជូនប្រាក់ចំនួន៥០ម៉ឺននិងសន្យាជូនកាតទូរស័ព្ទ៥ដុល្លារទៅមេភូមិម្នាក់ក្នុង១ភូមិ តែនៅពេលដឹកទាមកដល់វាស្រែ មានមនុស្ស១គោយន្ត បានដេញវាយចាប់ទារបស់គាត់បាត់រហូតដល់ ១១៥០ក្បាល រកឃើញវិញតែ៥០ក្បាលប៉ុណ្ណោះ។ ម្ចាស់ទាថា គាត់បានប្ដឹងទាសំណង២៣លានរៀលដោយចោទប្រជាសហគមន៍ ពីបទលួចទាចិញ្ចឹមរបស់គាត់ ដោយគិត១ក្បាល២ម៉ឺនរៀល។ លោក ឆាម ឈឿ មេភូមិដឺនិងជាតំណាងសហគមន៍ប្រើប្រាស់ទឹកក្នុងអាងប្រាសាទតាដោកប្រាប់ថា ពលរដ្ឋដែលជាប្រជាសហគមន៍ក្នុងភូមិដឺ ឃុំគោកកឋិន ស្រុកថ្មពួកនេះគាត់ចាប់ទាចំនួន២៥ក្បាលជាវត្ថុតាងយកមកដាក់ពាក្យបណ្ដឹងដែរថា ម្ចាស់បានលែងទាមកស៊ីក្នុងអាងទឹកដែលគាត់ប្រើប្រាស់ជារៀងរាល់ឆ្នាំ និងសុំឲ្យអាជ្ញាធរបញ្ឈប់ជាបន្ទាន់កុំឲ្យគេយកទាមកចុះស៊ីចំណីក្នុងអាងទឹក ដែលពួកគាត់ប្រើប្រាស់បន្តទៀត បើមិនដូននេះទេ ក្នុងរដូវប្រាំងខាងមុខពួកគាត់ខ្វះទឹកប្រើហើយ។ លោក ឆាម ឈឿ ថាលោកបានរាយការណ៍ជូនទៅមេឃុំ អភិបាលស្រុករួចហើយ ករណីនេះគាត់ក៏បានហាមទៅម្ចាស់ចិញ្ចឹមទាតាំងពីថ្ងៃទី១៣ ខែមករា ឆ្នាំ២០១៥មកម្ល៉េះ តែម្ចាស់ទានិងអ្នកឃ្វាលទាមិនស្ដាប់ ប្រហែលមានអ្នកកាងនៅពីក្រោយ ទើបមិនព្រមស្តាប់ប្រជាសហគមន៍សោះ។ ពួកគាត់ការពារទឹកសម្រាប់ផឹកប្រើប្រាស់ក្នុងអាងតាដោកនេះពីការលែងទាឲ្យចុះស៊ីចំណី បង្កភាពកខ្វក់ ដោយចាប់ត្រឹមទា២៥ក្បាល ម្ចាស់ទាបានទៅប្ដឹងមេភូមិឲ្យពួកគាត់ត្រូវបង់ប្រាក់ដល់ម្ចាស់ទា២៣លានទៅវិញ ប្រជាពលរដ្ឋបញ្ជាក់ថា ចុះការដែលទាមកចុះស៊ីចំណីក្នុងទឹកដែលពួកគាត់ទុកសម្រាប់ផឹក និងប្រើប្រាស់មានអ្នកណាចេញមុខសងវិញដែរឬទេ៕
0 Comments