ភ្នំពេញ ៖ យោងតាមរបាយការណ៍របស់អគ្គស្នងការដ្ឋាននគរបាលជាតិបានឲ្យដឹងថា ក្នុងឆ្នាំ២០១៤ នេះបទល្មើសព្រហ្មទណ្ឌជារួមមានការកើនឡើងបន្តិច ដោយសារបាតុកម្ម កូដកម្មកើតមានច្រើនដូចនេះកម្លាំងនគរបាលជាប់មមាញឹកក្នុងកិច្ចការការពារ ក្នុងនោះមានការកើនឡើងភាគច្រើនជា សកម្មភាពលួច ឆក់ ក្នុង បទមជ្ឈិម។
ជាមួយគ្នានោះសកម្មភាពបង្ក្រាបទទួលលទ្ធផលខ្ពស់ ទាំងការបង្ក្រាបបទល្មើសព្រហ្មទណ្ឌ បទល្មើសគ្រឿងញៀន បទល្មើសជួញដូរស្ត្រី និងកុមារ ព្រមទាំងសកម្មភាពក្មេងទំនើង ក្នុងនោះកត់សំគាល់ការបង្ក្រាបគ្រឿងញៀនមានករណីជាច្រើនបង្ក្រាបចំមេខ្លោង។
របាយការណ៍បានបញ្ជាក់ដែរថា ការបង្ក្រាបបទល្មើសព្រហ្មទណ្ឌជាក់ស្តែង កើតឡើង ២.៨១៤លើ២.៧១៦លើក កើនឡើង៩៨លើក ស្មើ៣,៦% ក្នុងនោះ បទឧក្រិដ្ឋ ៧១៦/៧៩០លើក ថយចុះ ៧៤លើក ស្មើ៩% បទមជ្ឈឹម ២.០៩៨/១.៩២៦លើក កើន ១៧២លើកស្មើ ៨,៩៣%។
ចំពោះលទ្ធផលបង្ក្រាបបទល្មើសរបស់កងកម្លាំងនគរបាលជាតិបង្ក្រាបបាន២.១០៨ ករណី ដោយឃាត់ខ្លួន៣.០៧៦នាក់ (ឧក្រិដ្ឋ៤៦៤ករណី ឃាត់ខ្លួន៦៧៤នាក់ និងមជ្ឈិម១.៦៤៤ករណី ឃាត់ខ្លួន២.៤០២នាក់ ) ក្នុងនោះបង្ក្រាបជាក់ស្តែង១.៩៤៧ករណី ស្មើ៩២,៣៥% ឃាត់ខ្លួន២.៧៧៥នាក់ និងបង្ក្រាបតាមដីកា៤៧៦ករណី មនុស្ស៤៧៤នាក់ (ឧក្រិដ្ឋ១៣១ករណី មនុស្ស១៣១នាក់ និង មជ្ឈិម៣៤៥ករណី មនុស្ស៣៤៣នាក់)។
វត្ថុតាងដែលបានដកហូតរួមមាន អាវុធវែង៤៣ដើម ខ្លី៣៧ដើម គ្រាប់បែក៩គ្រាប់ ម៉ូតូ៥៥២គ្រឿង រថយន្ត៣៨គ្រឿង (បាញ់ស្លាប់ក្នុងកិច្ចប្រតិបត្តិការ៣នាក់) និងឧបករណ៍ សំភារៈ មាសប្រាក់ និងភស្តុតាងមួយចំនួនទៀត បញ្ជូនទៅតុលាការតាមច្បាប់៕
សំអឿន
0 Comments