កណ្តាល ៖ យ៉ាងហោចណាស់មានមនុស្ស៥នាក់បានរងរបួសស្រាល នៅក្នុងឧប្បត្តិហេតុគ្រោះថ្នាក់ចរាចរណ៍មួយ ដែលបង្កឡើងដោយរថយន្តម៉ាកស៊ើហ្វ បុកបុកជាមួយគោយន្ត ដែលមានទិសដៅស្របគ្នា កាលពីវេលាម៉ោងជាង៦ព្រឹក ថ្ងៃទី០១ ខែមករា ឆ្នាំ២០១៤ នៅលើកំណាត់ផ្លូវជាតិលេខ៥ ចន្លោះគីឡូម៉ែត្រ៣៣-៣៤ ស្ថិតក្នុងសង្វរ ឃុំកំពង់លួង ស្រុកពញាឮ ខេត្តកណ្តាល។
សាក្សីក្បែរកន្លែងកើតហេតុបានឲ្យដឹងថា មុនពេលកើតហេតុមានរថយន្តមួយគ្រឿងម៉ាក ស៊ើហ្វ (SUFE) បើកបរតាមបណ្តោយផ្លូវជាតិលេខ៥ មានទិសដៅពីលិចមកកើត ក្នុងល្បឿនយ៉ាងលឿន លុះមកដល់ចំណុចកើតហេតុ បានជ្រុលទៅបុកជាមួយគោយន្ត ដែលបើកមានទិសដៅស្របគ្នា ពីក្រោយពេញមួយទំហឹង បណ្តាលឲ្យ គោយន្តក្រឡាប់ ហើយរងរបួសស្រាល៥ នាក់ទាំងអ្នករួមដំណើរក្នុងគោយន្ត។
ប៉ូលិសបានបញ្ជាក់ថា ក្រោយកើតហេតុ សមត្ថកិច្ចបានដឹកបញ្ជូនជនរងគ្រោះទាំង៥នាក់ទៅសង្គ្រោះនៅមន្ទីរពេទ្យ រីឯវត្ថុតាងរថយន្ត គោយន្ត សមត្ថកិច្ចបានដឹកយកទៅរក្សាទុកនៅអធិការដ្ឋាននគរបាលស្រុកពញាឮ ដើម្បីចាត់ការតាមនីតិវិធី ៕
0 Comments