ពោធិ៍សាត់ ៖ មានករណីអំពើហិង្សាដ៏ផុយស្រួយមួយបានកើតឡើង រហូតឈានដល់នាំបក្សពួកជាច្រើននាក់ ប្រដាប់ដោយ អង្កត់ឈើជាច្រើនកំណាត់និងពូថៅ ព្រួតគ្នាវាយនិងកាប់យ៉ាងសាហាវព្រៃផ្សៃ បណ្ដាលឲ្យជីវិតជនរងគ្រោះម្នាក់ស្លាប់ក្នុងថ្លុកឈាមនៅនឹងកន្លែងភ្លាមៗ ដោយគ្រាន់តែជនរងគ្រោះ វាយមួយដៃទៅលើគូទំនាស់តែប៉ុណ្ណោះ។
តែឈាមស្រែកដង្ហោយហៅរបស់ជនរងគ្រោះ បានសណ្ដំសមត្ថកិច្ចជំនាញនគរបាលបច្ចេកទេសខេត្ត ស្រុក និងផ្នែកការិយាល័យព្រហ្មទណ្ឌខេត្ត ស្រុក សហការណ៍ជាមួយអាជ្ញាធរ បានតាមស្រាវជ្រាវយ៉ាងក្ដៅគគុក អស់មួយកំណាត់ព្រឹក ក៏វែកមុខជនសង្ស័យដ៏កំណាចនោះ ជាមួយនឹងវត្ថុតាងចាប់បានចំនួនបីនាក់ ក្នុងនោះជនដៃដល់មុនគេម្នាក់តែបក្សពួករបស់គេមួយចំនួនដែលពាក់ព័ន្ធលើករណីនេះបានរត់ភៀសខ្លួនពីភូមិបាត់។
ហេតុការណ៍ហិង្សានេះបានកើតឡើងកាលពីវេលាម៉ោង ១០យប់ថ្ងៃទី៤ ខែមករា ឆ្នាំ២០១៥ ត្រង់ចំណុច(អូរឈ្នួល) ស្ថិតក្នុងភូមិអូរឈ្នួល ឃុំស្វាយស ស្រុកក្រគរ ខេត្តពោធិ៍សាត់ ខណៈដែលអ្នកភូមិធ្វើបុណ្យពូនភ្នំស្រូវដាក់ធុងបាសរាំសប្បាយ។
លោក ម៉ោល សុត អធិការរងទទួលបន្ទុកករណីនេះបានឱ្យដឹងថា ជនសង្ស័យទាំងបីនាក់ក្នុងចំណោមគ្នាច្រើននាក់ដែលចាប់ខ្លួនបាននោះ ទី១ឈ្មោះ អន រិត អាយុ២០ឆ្នាំ ទី២ឈ្មោះ ឡាត់ ឡុញ អាយុ៣២ឆ្នាំនិងទី៣ឈ្មោះ ឡេះ ពូកើត អាយុ២២ឆ្នាំជាខ្មែរអិស្លាម បុរសទាំងបីនេះមានទីលំនៅភូមិកើតហេតុខាងលើ។ ដោយឡែកជនរងគ្រោះដែលត្រូវគេវាយសម្លាប់នោះឈ្មោះ ចាន់ ធារ៉ា អាយុ២១ឆ្នាំរស់នៅភូមិក្បាលទាហាន ឃុំឈើតុំ ស្រុកក្រគរ ខេត្តពោធិ៍សាត់៕
លាន គ្រន
0 Comments