បាត់ដំបង ៖ សពយុវជនម្នាក់ដែលបានធ្វើអត្តឃាតដោយចងកសម្លាប់ខ្លួន ត្រូវបានគេប្រទះឃើញ
នៅព្រឹកថ្ងៃទី០៥ ខែមករា ឆ្នាំ២០១៥ ត្រង់ចំណុចក្នុងរោងបាយរបស់វិហារកាតូលិកមួយកន្លែង ស្ថិតក្នុងភូមិតាហែន១ ឃុំរកា ស្រុកសង្កែ ខេត្តបាត់ដំបង បន្ទាប់ពីបានវិលត្រឡប់មកពីដើរកំសាន្តនៅក្រុងប៉ោយប៉ែតជាមួយនឹងក្រុមសាសនាកាតូលិករួចមក។
យោងតាមសំដីរបស់អាណាព្យាបាលសពបានរៀបរាប់ថា កូនរបស់គាត់មានឈ្មោះ ឆែម វ៉ាន់នូ អាយុ១៧ឆ្នាំ រស់នៅក្នុងភូមិ/ឃុំកើតហេតុ ហើយជាសិស្សរៀននៅក្នុងវិទ្យាល័យអន្លង់វិល ប៉ុន្តែមួយរយៈក្រោយមកនេះ កូនប្រុសរបស់គាត់បានចូលក្នុងសាសនាកាតូលិក ព្រមទាំងបានទៅស្នាក់នៅក្នុងវិហារកាតូលិកនោះតែម្តង ដោយមិនសូវបានទៅលេងផ្ទះទេព្រោះរវល់រៀន។
ប្រភពបានបន្តថា នៅរយៈពេលប៉ុន្មានថ្ងៃមុនថ្ងៃកើតហេតុនេះ គឺខាងសាសនាកាតូលិកបានបង្កើតកម្មវិធីដោយបាននាំសិស្សទាំងអស់ដែលជាសមាជិកក្នុងក្រុមកាតូលិកទៅកំសាន្តនៅក្រុងប៉ោយប៉ែត ខេត្តបន្ទាយមានជ័យ ដោយពេលនោះកូនប្រុសរបស់គាត់ក៏បានរួមដំណើរទៅកំសាន្តជាមួយនឹងគេដែរ ប៉ុន្តែក្រោយពេលដែលត្រឡប់មកដល់កន្លែងវិញស្រាប់តែព្រឹកឡើងត្រូវបានគេប្រទះឃើញកូនប្រុសរបស់គាត់បានចងកសម្លាប់ខ្លួនបាត់ទៅហើយ ដោយវាបានយកកន្សែងក្រណាត់ក្រឡាការ៉ូទៅចងនឹងរឹតផ្ទះបាយខាងក្រោយវិហារកាតូលិកដោយមិនដឹងអំពីមូលហេតុនៃការសម្លាប់ខ្លួននេះឡើយ។ ពាក់ព័ន្ធនឹងការធ្វើអត្តឃាតដោយចងកសម្លាប់ខ្លួននៅក្នុងឃុំរកានេះដែរ គឺមានមជ្ឈដ្ឋានជាច្រើនបានធ្វើការចាប់អារម្មណ៍ និងផ្ដោតយ៉ាងខ្លាំងទៅនឹងបញ្ហាមេរោគអេដស៍ដោយសារតែកន្លងមកក្នុងឃុំនេះមានការចំលងមេរោគអេដស៍យ៉ាងផុលផុសពីសំណាក់គ្រូពេទ្យភូមិម្នាក់ ដូច្នេះ
ហើយបានជាកម្លាំងជំនាញបានធ្វើការស្រាវជ្រាវ និងសិក្សាឲ្យបានស៊ីជំរៅទៅលើមូលហេតុដែលបណ្ដាលឲ្យយុវជនរូបនេះដាច់ចិត្តធ្វើអត្តឃាតបែបនេះ។
ទាក់ទិនទៅនឹងបញ្ហានេះផងដែរ ក្នុងជួរថ្នាក់ដឹកនាំនៃអធិការដ្ឋានហាក់បីដូចជានាំគ្នាលាក់បំពួនក្នុងរឿងនេះ ដោយមិនចង់ឲ្យព័ត៌មាននេះមានការបែកធ្លាយទៅខាងក្រៅឡើយ។
បើទោះបីជាមានការព្យាយាមបិទបាំងយ៉ាងណាក៏ដោយក៏មានមជ្ឈដ្ឋានជាច្រើនកំពុងតែចង់ដឹងចង់ឮនូវរឿងហេតុដែលពាក់ព័ន្ធទៅនឹងឃុំរកានេះផងដែរ។ បន្ទាប់ពីការស្រាវជ្រាវទៅលើសាច់ញាតិ ក្រុមគ្រួសារ និងប្រភពនានាដែលនៅខាងក្រៅទើបដឹងថា យុវជនរូបនេះពុំមានពាក់ព័ន្ធទៅនឹងមេរោគអេដស៍នេះឡើយ ឯមូលហេតុនៃការពាក់ព័ន្ធគឺជារឿងស្នេហានៅក្នុងថ្នាក់រៀននៃវិទ្យាល័យអន្លង់វិលទៅវិញ ដោយសារតែយុវជនរូបនេះមានការលួចបេតីទៅលើសិស្សស្រីម្នាក់ ប៉ុន្តែនាងពុំបានស្រលាញ់វិញឡើយទើបធ្វើឲ្យមានការខូចចិត្តរហូតដាច់ចិត្តធ្វើអត្តឃាតដោយចងកសម្លាប់ខ្លួនតែម្តងទៅ។ បច្ចុប្បន្នក្រោយពីការត្រួតពិនិត្យ និងធ្វើកោសល្យវិច័យរួចមកក្រុមគ្រួសារបានទទួលយកសពទៅធ្វើបុណ្យនៅលំនៅដ្ឋានក្នុងឃុំរកានោះហើយ៕
និយមរ័ត្ន
0 Comments