ស្ត្រី​បម្រើការ​ក្នុង​ខារ៉ាអូខេ​ "យីហោ​ម្លប់​ដូង" ត្រូវ​បាន​រថយន្ត​បុក​ឲ្យ​ស្លាប់​ទាំង​២​នាក់​សង្សារ ក្រោយ​ពេល​ស្រវឹង​ធ្លាក់​ភ្នែក

កំពង់ធំ ៖ ហេតុការណ៍​ដ៏​រន្ធត់​មួយ​បាន​បង្ក​ឲ្យ​មានការ​ភ្ញាក់ផ្អើល ដោយសារតែ​មច្ចុរាជ​យាន​យន្ត បាន​ផ្តាច់​ជីវិត​គូសង្សារ​មួយគូ បណ្ដាល​ឲ្យ​ស្លាប់​ភ្លាមៗ​នៅ​នឹង​កន្លែង​កើតហេតុ ដែល​បាន​បង្ក​ឡើង​ដោយ​សារ​តែ​ទឹក​ប្ដូរ​និស័្សយ​ ក្រោយពេល​ចេញពី​ហាង​ខារ៉ាអូខេ "​ម្លប់​ដូង​" ទៅ​រក​ទីឋាន​សួរ​សុខ​ទុក ក៏​ប្រទះ​នឹង​គ្រោះថ្នាក់​ចរាចរណ៍ បណ្ដាល​ឲ្យ​ស្លាប់​យ៉ាង​អាណោចអាធ័ម។​

តាម​ការ​បញ្ជាក់​ពី​លោក ហ៊ុន ហៀ​ត អធិការរង​ស្រុក​ស្ទោង​ទទួល​ផែន​ចរាចរណ៍ សណ្ដាប់​ធ្នាប់​បាន​ឲ្យ​ដឹង​ថា នៅ​វេលា​ម៉ោង​១២​និង​៣០​នាទី​យប់ ដោយមាន​រថយន្ត​មិន​ស្គាល់​អត្តសញ្ញាណ បាន​ធ្វើ​ដំណើរ​ពី​ខេត្តសៀមរាប​ឆ្ពោះទៅ​ខេត្ត​ខេត្តកំពង់ធំ លុះ​មកដល់​ចំណុច​កើតហេតុ ត្រូវ​បាន​បុក​ម៉ូតូ​ម៉ាក​សង់​សេ​១២៥​សេរី​ឆ្នាំ​២០១១ បណ្ដាល​ឲ្យ​មនុស្ស​២​នាក់​ស្លាប់​ភ្លាមៗ​នៅ​នឹង​កន្លែង​កើតហេតុ នៅ​ចំណុច​ភូមិ​ឈើទាល ឃុំ​កំពង់ចិនត្បូង ស្រុក​ស្ទោង ខេត្តកំពង់ធំ។​

ជនរងគ្រោះ​ទី​១-ត្រូវ​បាន​គេ​ស្គាល់ឈ្មោះ​ សរ ស្រី​កា ហៅ​ស្រី​នាង ភេទ​ស្រី អាយុ​៣១​ឆ្នាំ រស់​នៅ​ខេត្តស្វាយរៀង​មក​ធ្វើ​អ្នក​បម្រើ​ភ្ញៀវ​ក្នុង​ខារ៉ាអូខេ​"យីហោ​ម្លប់​ដូង" ដែល​ជា​កម្មសិទ្ធិ​របស់​លោក គ្រូ សារ៉ន ដែល​ជា​គ្រូបង្រៀន​ស្ថិតនៅ​ភូមិ​មធ្យាយ ឃុំ​កំពង់ចិនត្បូង ស្រុក​ស្ទោង ខេត្តកំពង់ធំ ទី​២- ឈ្មោះ សុខ កង ភេទ​ប្រុស អាយុ​៣៥​ឆ្នាំ មាន​មុខរបរ​ជាជាង​ផ្ទះ រស់នៅ​ភូមិ​បេង ឃុំ​បន្ទាយ​ស្ទោង ស្រុក​ស្ទោង ខេត្តកំពង់ធំ។​

សូម​បញ្ជាក់​ផង​ដែរ មុន​ពេល​កើតហេតុ​គ្រោះថ្នាក់​ចរាចរណ៍​មាន​ស្ត្រី​ម្នាក់​បាន​អះ​អាង​ថា ជា​ប្រពន្ធ​ជនរងគ្រោះ​បាន​តាម​រក​ប្ដី​របស់​គាត់​ស្ទើរ​ពេញ​មួយ​យប់ ដោយ​មិនឃើញ​ទៅផ្ទះ​ក្រោយមក​ទើប​ដឹង​ថា បុរស​ដែល​បាន​ស្លាប់​ជាមួយ​ស្រី​ស្នេហ៍​ខារ៉ាអូខេ ដែល​បណ្ដាល​មក​ពី​រថ​យន្ត​បុក​នោះ ជា​ប្ដី​របស់​គាត់ អំណាច​នៃ​ការ​ខឹង នឹង​លោក​ប្ដី​របស់​គាត់ គឺ​មិន​ខ្ចី​ស្រក់​ទឹកភ្នែក​សូម្បី​តែមួយ​តក់ ដោយ​សារ​តែ​ឃើញ​លោក​ប្ដី​បាន​ស្លាប់​ជាមួយ​ស្រី​ម្នាក់​ជា​អ្នក​បម្រើការ​នៅក្នុង​ខារ៉ាអូខេ ហើយ​បាន​ឲ្យ​គេ​លើកយក​សាកសព​ទៅផ្ទះ​ទាំងយប់ ចំណែក​ស្រី​សាកសព​ស្រី​រងគ្រោះ ត្រូវ​បាន​សមត្ថកិច្ច ដឹក​យក​ទៅ​តម្កល់ទុក​នៅ​វត្ត​ព្រះ​នាង​រង់ចាំ​សាច់ញាតិ​មក​ទទួល​យក​ទៅ​ធ្វើបុណ្យ​តាម​ប្រពៃណី តែបើ​អត់​មាន​សាច់ញាតិ នឹង​ត្រូវ​បូជា​តែម្តង ​ចំណែក​រថយន្ត​មិន​ស្គាល់​ម៉ាក​បាន​ដាក់​មេ​ប្រូច​បាត់​ស្រមោល៕​

​ ប៊ុន រដ្ឋា