ភ្នំពេញ ៖ ក្នុងកិច្ចប្រជុំនៅព្រឹកថ្ងៃទី១៩ ខែមករា ឆ្នាំ២០១៥នេះ រវាងអាជ្ញាធររាជធានីភ្នំពេញ និងសហគមន៍បឹងកក់ សហគមន៍បូរីកីឡា និងសហគមន៍ប្រលានយន្តហោះអន្តរជាតិភ្នំពេញ SOS សាលារាជធានីភ្នំពេញ មិនអនុញ្ញាតឲ្យក្រុមស្ត្រីអ្នកតវ៉ាពាក់ព័ន្ធដីធ្លីធ្វើបាតុកម្មរយៈពេល១ខែនៅទីលានប្រជាធិបតេយ្យនោះទេ។ ការមិនអនុញ្ញាតិនេះ គឺយោងតាមការស្នើសុំមិនមានលក្ខណៈផ្លូវច្បាប់ និងម្យ៉ាងទៀត ដោយសារច្បាប់មិនមានការអនុញ្ញាតឲ្យធ្វើការបាតុកម្មរយៈពេល១ខែបែបនេះទេ។ លោក ឃួង ស្រេង អភិបាលរងសាលារាជធានីភ្នំពេញបានមានប្រសាសន៍ថា ការស្នើសុំធ្វើបាតុកម្មនេះ គឺមិនសមស្របទៅនឹងផ្លូវច្បាប់ទេ ម្យ៉ាងទៀតច្បាប់ក៏មិនមានការអនុញ្ញាតឲ្យធ្វើការបាតុកម្មរយៈពេល១ខែនោះដែរ។ ដូច្នេះសាលារាជធានីភ្នំពេញមិនអនុញ្ញាតឲ្យមានការធ្វើបាតុកម្ម នៅទីលានប្រជាធិបតេយ្យទេ ហើយបើក្រុមអ្នកតវ៉ានៅតែបន្តធ្វើបំពានការណែនាំរបស់សាលារាជធានីភ្នំពេញនោះ អាជ្ញាធររាជធានីភ្នំពេញនឹងមានវិធានការតាមផ្លូវច្បាប់ហើយ។
លោក ឃួង ស្រេង បានបន្តថា ទោះបីជាយ៉ាងណាក្តីអាជ្ញាធររាជធានីភ្នំពេញបានបើកចំហចំពោះការដោះស្រាយជាមួយសហគមន៍បឹងកក់ និងបូរីកីឡា លើកលែងតែថ្ងៃសៅរ៍ និងថ្ងៃអាទិត្យ ដែលជាថ្ងៃឈប់សម្រាកប៉ុណ្ណោះ។ លោកក៏បានបញ្ជាក់ផងដែរថា ជំហររបស់លោក ប៉ា សុជាតិវង្ស អភិបាលរាជធានីភ្នំពេញបានបញ្ជាក់ថា បញ្ហាប្រឈមនានា ពិសេសបូរីកីឡា និងបឹងកក់ អាជ្ញាធររាជធានីភ្នំពេញនឹងធ្វើការដោះស្រាយបញ្ចប់ ក្នុងពេលឆាប់ៗខាងមុខនេះ ឲ្យបានកាន់តែឆាប់ កាន់តែល្អ។
លោក ឃួង ស្រេង បានបញ្ជាក់ថា ពាក់ព័ន្ធការស្នើសុំឲ្យមានការដោះលែងសកម្មជនដែលជាប់នៅក្នុងពន្ធនាគារនោះ គឺអាជ្ញាធររាជធានីភ្នំពេញគ្មានសិទ្ធិដោះលែងនោះទេ គឺមានតែតុលាការប៉ុណ្ណោះ ទើបមានសិទ្ធីលើករណីនេះ។ លោកបានបញ្ជាក់ឲ្យក្រុមស្ត្រីអ្នកតវ៉ាទៅរកមេធាវីឬក្រុមអ្នកច្បាប់ដើម្បីដោះស្រាយបញ្ហានេះ។ លោក ឃួង ស្រេង បាននិយាយថា "ការដោះលែងសកម្មជនទាំងនោះ គឺមានតែមានការព្រះរាជទានទោសពីព្រះមហាក្សត្រ ក្រោយពេលពួកគេអនុវត្តទោសក្នុងពន្ធនាគារបាន២ភាគ៣នៃទោសរបស់ខ្លួនជាមុនសិន"។
អ្នកស្រី យោម បុប្ផា តំណាងឲ្យក្រុមអ្នកតវ៉ាបានបញ្ជាក់ថា "ខ្ញុំនឹងនាំពាក្យសំដីរបស់អាជ្ញាធររាជធានីភ្នំពេញទៅប្រាប់ក្រុមស្ត្រីអ្នកតវ៉ាថា អាជ្ញាធររាជធានីភ្នំពេញមិនអនុញ្ញាតឲ្យធ្វើបាតុកម្មនៅទីលានប្រជាធិបតេយ្យនោះទេ ប៉ុន្តែការធ្វើបាតុកម្ម ឬមិនធ្វើបាតុកម្មនោះ អ្នកស្រី មិនដឹងនោះទេ សម្រេចលើក្រុមអ្នកវ៉ាធ្វើការសម្រេចប៉ុណ្ណោះ"។
ក្នុងឱកាសនោះដែរ អ្នកស្រី យោម បុប្ផា បានស្នើសុំឲ្យអាជ្ញាធររាជធានីភ្នំពេញពន្លឿនការដោះស្រាយជូនពលរដ្ឋបូរីកីឡា និងពលរដ្ឋបឹងកក់ឲ្យបានឆាប់រហ័ស កុំចេះតែពន្យារពេលដោះស្រាយ បញ្ហាដីធ្លី ពីព្រោះថា ពួកគាត់ពិបាករស់នៅណាស់ ដោយបញ្ហាទឹកលិច និងសំរាមស្អុយរលួយជាដើម។
សូមបញ្ជាក់ថា នៅព្រឹកថ្ងៃទី១៩ ខែមករា ឆ្នាំ២០១៥នេះ សហគមន៍បឹងកក់សហគមន៍បូរីកីឡា សហគមន៍ប្រលានយន្តហោះអន្តរជាតិភ្នំពេញ SOS បានធ្វើការតវ៉ានៅមុខសាលារាជធានីភ្នំពេញ ក្នុងគោលបំណងជំរុញឲ្យមានការដោះស្រាយបញ្ចប់ដីធ្លីនៅតំបន់បឹងកក់ និងបូរីកីឡា ហើយបើយោងតាមសេចក្តីជូនដំណឹងរបស់សហគមន៍ បានស្នើសុំទៅអាជ្ញាធររាជធានីភ្នំពេញ ដើម្បីធ្វើបាតុកម្មអហិង្សានៅទីលានប្រជាធិបតេយ្យក្នុងរយៈមួយខែជារៀងរាល់ថ្ងៃ ចាប់ពីម៉ោង៧ព្រឹក ដល់ម៉ោង៥និង៣០នាទីល្ងាច ចាប់ពីថ្ងៃទី២០ ខែមករា ឆ្នាំ២០១៥ ដល់ថ្ងៃទី២០ ខែកុម្ភៈ ឆ្នាំ២០១៥។
ក្រុមសហគមន៍ទាំងពីរខាងលើ បានទាមទារឲ្យរាជរដ្ឋាភិបាលផ្តល់ដំណោះស្រាយ និងបញ្ចប់បញ្ហាដីធ្លីនៅបឹងកក់ និងបូរីកីឡា ប្រលានយន្តហោះអន្តរជាតិភ្នំពេញនឹងត្រូវផ្តល់សំណងដល់ប្រជាពលរដ្ឋដែលរងគ្រោះ ដោយការអភិវឌ្ឍន៍បឹងកក់។ បញ្ចប់ជម្លោះនយោបាយ និងភាពច្របូកច្របល់នៅក្នុងសង្គមកម្ពុជា និងការស្នើសុំឲ្យមានការដោះលែងសកម្មជនដីធ្លី និងសកម្មជនផ្សេងទៀតពីពន្ធនាគារព្រៃសជាបន្ទាន់៕
ស្រីរ័ត្ន
0 Comments