កងទ័ព និងពួកមន្ត្រីរដ្ឋាភិបាលនិយាយថា ពួកយុទ្ធជនឥស្លាមនិយមដែលគេសង្ស័យថា ជាពួកបូកូហារ៉ាមមកពីប្រទេសនីហ្សេរីយ៉ានោះ បានចាប់ពង្រត់មនុស្សប្រហែល៨០នាក់ ដែលភាគរើនគឺជាកុមារ ហើយនិងបានសម្លាប់មនុស្សបីនាក់ទៀតនៅថ្ងៃអាទិត្យ នៅក្នុងការវាយប្រហារឆ្លងដែន មួយទៅលើភូមិ នៅភាគខាងជើងប្រទេសកាំរ៉ូន។
ក្រុមដែលបានសម្លាប់មនុស្សរាប់ពាន់នាក់ និងចាប់ពង្រត់រាបរយនាក់ នៅក្នុងកិច្ចប្រឹងប្រែងរបស់ខ្លួនដើម្បីបង្កើតរដ្ឋឥស្លាមមួយនៅភាគខាងជើងប្រទេសនីហ្សេរីយ៉ា នោះក៏បានសំដៅផងដែរទៅលើ ប្រទេសកាំរ៉ូន និងប្រទេសនីហ្សេរីយ៉ាកាលពីឆ្នាំមុន នៅពេលខ្លួនស្វះស្វែងពង្រីកតំបន់ប្រតិបត្តិការរបស់ខ្លួន។
ការចាប់ពង្រត់នៅថ្ងៃអាទិត្យដែលស្ថិតនៅក្នុងចំណោមការចាប់ពង្រត់ដ៏ធំបំផុតនៅក្នុងទឹកដីរបស់ប្រទេសកាំរ៉ូននោះ កើតឡើងនៅពេលប្រទេសឆាដជិតខាងបានបញ្ជូនកងទ័ពដើម្បីគាំទ្រកងកម្លាំងរបស់ប្រទេសកាំរ៉ូននៅក្នុងតំបន់នោះ។
តាមព័ត៌មានបឋមបានឲ្យដឹងថា មនុស្សពេញវ័យប្រហែល៣០នាក់ ក្មេងស្រី និងក្មេងប្រុស៥០នាក់ ត្រូវបានគេចាប់ពង្រត់។ ការវាយប្រហារនៅពេលព្រឹកព្រលឹមនោះបានសំដៅទៅលើភូមិម៉ាបាស់ និងភូមិផ្សេងៗទៀត នៅតាមបណ្តោយព្រំដែនដែលមានផ្លូវលំតូចៗជាច្រើន។ ពួកទាហានបានធ្វើអន្តរាគមន៍ និងបាញ់តបតជាមួយពួកវាឆ្មក់ប្រហែលពីរម៉ោង៕
រឹទ្ធ
0 Comments