ភ្នំពេញ ៖ មន្ត្រីអាវុធហត្ថលើផ្ទៃប្រទេសដែលគេស្គាល់ថាជាកូនប្ដីចុងរបស់ម្តាយមានទំនាស់ជាមួយកូនប្ដីដើម បានបើកម៉ូតូតាមវាយទាត់ធាក់ និងដកកាំភ្លើងវាយក្បាលដល់មុខផ្ទះដេកដួលស្ទើរស្លាប់ស្ទើររស់ដល់ពេលទៅប្ដឹងប៉ូលិសនិងមន្ត្រីកងរាជអាវុធហត្ថខណ្ឌចំការមនឆ្លើយដាក់គ្នាមិនទទួលពាក្យបណ្ដឹងជនរងគ្រោះ។ អំពើហិង្សានេះបានកើតឡើងកាលម៉ោង៨នឹង៣៥នាទីយប់ ថ្ងៃទី៥ ខែមករា ឆ្នាំ២០១៥ នៅមុខផ្សារទំនើបអ៊ីអនម៉ល ស្ថិតក្នុងភូមិទី៨ សង្កាត់ទន្លេបាសាក់ ខណ្ឌចំការមន។ជនបង្កឈ្មោះ សុខា សីហា ជាមន្ត្រីអាវុធហត្ថលើផ្ទៃប្រទេស។
ជនរងគ្រោះមានឈ្មោះ យូ ជុងឆាយយ៉ា អាយុ២៣ឆ្នាំ មានមុខរបរជាអ្នកធ្វើការនៅក្នុងការ៉ាសឡានមួយកន្លែង មានទីលំនៅក្នុងកន្លែងកើតហេតុខាងលើបានឱ្យដឹងថា នៅមុនពេលកើតហេតុរូបគេបានចេញពីកន្លែងធ្វើការនៅម្តុំផ្សារបឹងកេងកងដូចសព្វដង ខណៈមកដល់មុនផ្ទះខ្លួនក៏បានអង្គុយលេងនៅខាងមុខផ្ទះជាមួយនឹងក្រុមគ្រួសារ ភ្លាមនោះស្រាប់តែយុវជនម្នាក់ជាកូនប្ដីចុងម្តាយរបស់ខ្លួន មានឈ្មោះ សុខា សីហា ជាមន្ត្រីអាវុធហត្ថលើផ្ទៃប្រទេសបានជិះម៉ូតូមួយគ្រឿងមកឈប់នៅមុខផ្ទះ រួចក៏បានដើរសំដៅមករកខ្លួន ហើយក៏បានធ្វើសកម្មភាពវាយទាត់ធាក់មកលើរូបគេយ៉ាងចាស់ដៃ ព្រមទាំងបានដកកាំភ្លើងចេញពីចង្កេះវាយក្បាលថែមទៀតផង បណ្ដាលឱ្យរងរបួសយ៉ាងដំណំ។ ហើយបង្កឱ្យមានការភ្ញាក់ផ្អើលដល់ប្រជាពលរដ្ឋជិតខាងមកចោមរោមមើល ប៉ុន្តែមិនមានអ្នកណាម្នាក់ហ៊ានចូលទៅជួយឃាត់នោះទេ សូម្បីតែក្រុមគ្រួសារគេក៏ដោយ ព្រោះតែជនបង្កស្រែកគំរាមថា បើអ្នកណាហ៊ានចូលមកជួយ អញនឹងបាញ់ទាំងអស់។
សាក្សីបានឃើញហេតុការណ៍បានឲ្យដឹងថា បន្ទាប់ពីបានដកកាំភ្លើងវាយក្បាលជនរងគ្រោះរួចមក ជនបង្កមិនទាន់អស់ចិត្តបានយកកាំភ្លើងភ្ជង់ក្បាលជនរងគ្រោះនិងគំរាមបាញ់ ព្រមទាំងបានជេរប្រមាថយ៉ាងខ្លាំង ហើយថែមទាំងបានស្រែកថា បើអ្នកណាហ៊ានចូលមកជួយអញនឹងបាញ់ទាំងអស់ ហើយមួយសន្ទុះក្រោយមកជនបង្កបានឡើងជិះម៉ូតូចេញទៅវិញបាត់ សូម្បីតែកម្លាំងសមត្ថកិច្ចមូលដ្ឋានដែលចុះទៅដល់កន្លែងកើតហេតុក៏មិនហ៊ានធ្វើការចាប់ជនបង្កនោះដែរ ដោយខ្លាចអំណាចជនអាក្រក់នោះ។ ក្រោយពេលកើតហេតុជនរងគ្រោះត្រូវបានក្រុមគ្រួសារនាំយកមកដាក់ពាក្យបណ្ដឹងនៅប៉ុស្តិ៍នគរបាលទន្លេបាសាក់ ប៉ុន្តែដោយសារតែជនបង្កជាមន្ត្រីអាវុធហត្ថ សមត្ថកិច្ចបានរុញឲ្យទៅប្តឹងនៅទីបញ្ជាការកងរាជអាវុធហត្ថខណ្ឌចំការមន ដល់ពេលទៅដល់ទីបញ្ជាការអាវុធហត្ថខណ្ឌចំការមន ក៏គ្មានអ្នកណាទទួលដោយមន្ត្រីទាំងនោះរុញទៅប្ដឹងនៅនគរបាលខណ្ឌវិញ ព្រោះគេជាអាជ្ញាធរមូលដ្ឋាន។
ប្រភពពីអ្នកជិតខាងបានឲ្យដឹងថា ជនរងគ្រោះនិងជនបង្កជាកូនប្ដីចុងរបស់ម្តាយ ហើយជនរងគ្រោះជាមួយកូនប្ដីដើម កន្លងមកធ្លាប់មានទំនាស់ហ្នឹងគ្នាកាលពីពេលកន្លងមក ហើយមុនពេលកើតហេតុ អ្នកទាំងពីរមានទំនាស់គ្នាម្តងទៀតធ្វើឲ្យជនបង្កមានកំហឹងក៏ជិះម៉ូតូទៅវាយជនរងគ្រោះដល់ផ្ទះតែម្តង៕
ឌួងវិរះជ័យ
0 Comments